ភ្នំពេញ៖ នៅឆមាសទី១ នាឆ្នាំ២០១៧នេះ គ្រោះថ្នាក់សង្គមបានកើតឡើងចំនួន ៣ ៥៧៧ករណី ថយចុះ១១៥ករណី ស្មើនឹង៣ភាគរយ បើធៀបនឹងរយៈពេលដូចគ្នា កាលពីឆ្នាំ២០១៦ បណ្តាលឲ្យមនុស្សស្លាប់ ២ ១១៧នាក់ ថយចុះ៤៧នាក់ និងរបួស ៣ ៦៩៥នាក់ ថយចុះ៨៥៥នាក់។
នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ ថ្លែងឲ្យដឹងនៅក្នុងកិច្ចប្រជុំបូកសរុបលទ្ធផលការងារ សភាពការណ៍សណ្តាប់ធ្នាប់សាធារណៈ និងកិច្ចប្រតិបត្តិការ និងលើកទិសដៅការងារ សម្រាប់ឆមាសទី២ ឆ្នាំ២០១៧ នាព្រឹកថ្ងៃទី២៤ ខែកក្កដា ឆ្នាំ២០១៧នេះ នៅអគ្គស្នងការដ្ឋាននគរបាលជាតិ។ កិច្ចប្រជុំនេះបានប្រព្រឹត្តទៅ ក្រោមអធិបតីភាព លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងមានការចូលរួមពីនាយកដ្ឋាន និងស្នងការនគរបាល ចំណុះឲ្យអគ្គស្នងការនគរបាលជាតិទាំងអស់។
របាយការណ៍ដដែល បានបន្ថែមថា ក្នុងចំណោមគ្រោះថ្នាក់សង្គមដែលកើតឡើង ទាំង៣ ៥៧៧លើក ក្នុងនោះរួមមាន៖ គ្រោះថ្នាក់ចរាចរណ៍ ១ ៩០៧លើក ស្លាប់៩៣១នាក់ និងរបួស៣ ០០៦នាក់។ គ្រោះថ្នាក់អាវុធជាតិផ្ទុះ (គ្រាប់មីន-គ្រាប់បែក) ១៥លើក ស្លាប់៦នាក់ និងរបួស២១នាក់។ គ្រោះអគ្គិភ័យ ៣០៩លើក ស្លាប់៩នាក់ និង៦៩នាក់របួស បំផ្លាញតូបលក់ដូរ២៣៦ និងផ្ទះ៣៣០ខ្នង។ ខ្យល់ព្យុះចំនួន ១៤៩លើក ស្លាប់មនុស្ស២នាក់ និង៤០នាក់របួស ប៉ើងដំបូលផ្ទះ២០០១ខ្នង និងរលំផ្ទះ១៩២ខ្នង។ រន្ទះបាញ់ចំនួន៦៩លើក ស្លាប់មនុស្ស៤៥នាក់ និង៣៨នាក់របួស។ ទឹកជំនន់២លើក គ្មានអ្នកស្លាប់ និងអ្នករបួសឡើង។ អំពើអត្តឃាត ៣២៧លើក ស្លាប់៣២០នាក់ និង៧នាក់របួស និងគ្រោះថ្នាក់សង្គមផ្សេងៗ ៧៩៩លើក ស្លាប់៨០៤លើក របួស៥១៤នាក់៕ សហការី KBN
