ខេត្តណ្ដាល៖ សមត្ថកិច្ចនគរបាលស្រុកខ្សាច់កណ្ដាល បានចុះទៅឃាត់ខ្លួនជនសង្ស័យម្នាក់ជាប់ពាក់ព័ន្ធនឹងករណីលួចទូរស័ព្ទដៃចំនួន២គ្រឿង កាលពីវេលាម៉ោង៨ និង៣០នាទីព្រឹក ថ្ងៃទី២០ ខែកក្កដា ឆ្នាំ២០១៧ ស្ថិតក្នុងភូមិស៊ីធរលិច ឃុំស៊ីធរ ស្រុកខ្សាច់កណ្តាល។
មន្រ្ដីនគរបាលស្រុកខ្សាច់កណ្ដាល បានឲ្យដឹងថា ជនសង្ស័យ ឈ្មោះ សៃ សានម៉ៅ ភេទប្រុស អាយុ២៤ឆ្នាំ ជនជាតិខ្មែរ មុខរបរមិនពិតប្រាកដ មានលំនៅក្នុងភូមិស៊ីធរលិច ឃុំស៊ីធរ ស្រុកខ្សាច់កណ្តាល។ រីឯជនរងគ្រោះ ឈ្មោះ នាង សំណាង ភេទប្រុស អាយុ៣៧ឆ្នាំ ជនជាតិខ្មែរ មុខរបរជាអ្នកចម្រៀង មានលំនៅក្នុងភូមិទឹកនឹម ឃុំកណ្តោក ស្រុកកណ្តាលស្ទឹង ខេត្តកណ្តាល។ ដោយឡែកវត្ថុតាង ដែលសមត្ថកិច្ចដកហូតបាន រួមមានទូរស័ព្ទដៃចំនួន២គ្រឿង (ម៉ាកiPhone7+១គ្រឿង និងម៉ាកSamsung Galaxy Note4១គ្រឿង) ។
ប្រភពដដែលបន្ដថា កាលពីថ្ងៃទី១៧ ខែកក្កដា ឆ្នាំ២០១៧ ជនរងគ្រោះបាននាំប្រពន្ធនិងកូនមកស្នាក់នៅផ្ទះឪពុករបស់ខ្លួនឈ្មោះ នាង នង នៅភូមិ-ឃុំកើតហេតុ ដើម្បីយកប្រពន្ធមកព្យាបាលជំងឺ។ នៅពេលនោះ ជនរងគ្រោះបានយកទូរស័ព្ទរបស់ខ្លួនចំនួន២គ្រឿង ដាក់ក្នុងថង់ខ្មៅ ដើម្បីសាកថ្ មនៅក្នុងផ្ទះពីចំហៀងខាងកើត រួចហើយនាំប្រពន្ធកូនដេកយ៉ាងលង់លក់បាត់ទៅ។ លុះពេេលភ្ញាក់ពីដេក នាថ្ងៃទី១៨ ខែឆ្នាំដដែល ជនរងគ្រោះរកទូរស័ព្ទមិនឃើញ ក៏ដើរតាមរក ស្រាប់តែឃើញស្រោមទូរស័ព្ទដៃរបស់ខ្លួនទាំង២គ្រឿង នៅក្នុងផ្ទះជីតារបស់ជនសង្ស័យ(ផ្ទះគ្មានមនុស្សនៅ)។
មន្ត្រីនគរបាលដដែល បានបន្តថា បន្ទាប់ពីបាត់ទូរស័ព្ទហើយ ទើ់បនៅថ្ងៃទី១៩ ខែកក្កដា ឆ្នាំ២០១៧ ជនរងគ្រោះបានទៅដាក់ពាក្យបណ្ដឹង នៅប៉ុស្ដិ៍នគរបាលរដ្ឋបាលស៊ីធរ ដើម្បីឲ្យសមត្ថកិច្ចជួយអន្ដរាគមន៍ចាប់ខ្លួនជនសង្ស័យ នាំមកចាត់ការតាមច្បាប់។ លុះមកដល់ព្រឹកថ្ងៃទី២០ ខែកក្កដានេះ សមត្ថកិច្ចក៏បានស្រាវជ្រាវ រហូតចាប់ខ្លួនជនសង្ស័យបាន។
ក្រោយពេលឃាត់ខ្លួនរួចមក សមត្ថកិច្ចបាននាំខ្លួនជនសង័្សយ ទៅកាន់ប៉ុស្ដិ៍នគរបាលរដ្ឋបាល ដើម្បីសាកសួរ រួចហើយបញ្ជូទៅកាន់អធិការដ្ឋាននគរបាលស្រុក ចាត់ការបន្ត៕ សហការី KBN
