ប្រទេសថៃ៖ បុរសខ្ទើយម្នាក់បានលួចអារកសម្លាប់មិត្្តភក្ដិ ក៏ត្រូវសមត្ថកិច្ចចាប់ញាត់គុក ហើយទើបនឹងត្រូវតុលាការដោះលែងឲ្យមានសេរីភាពឡើងវិញរយៈពេល២ឆ្នាំ បែរជាគេបាញ់សម្លាប់ក្មួយរបស់ខ្លួន ក៏ត្រូវសមត្ថកិច្ចថៃចាប់ញាត់គុុកសាជាថ្មី កាលពីពីវេលាម៉ោង១០ព្រឹក ថ្ងៃទី១៨ ខែកក្កដា ឆ្នាំ២០១៧កន្លងទៅថ្មីៗនេះ។
ប្រភពព័ត៌មានពីប្រទេសថៃ បានឲ្យដឹងថា ឃាតកដៃឆៅដែលសមត្ថកិច្ចឃាត់ខ្លួន ឈ្មោះនាយ ថៈនិត ឬយ័ន អាយុ៣០ឆ្នាំ រស់នៅផ្ទះលេខ៣៤៥ ភូមិ១៣ ខេត្តជ័យភូមិ ប្រទេសថៃ ហើយជននេះទើបនឹងចេញពីពន្ធនាគារ(គុក) មានសេរីភាពរយៈពេល២ឆ្នាំ ដោយសារជាប់ពាក់ព័ន្ធនឹងករណីចាក់កសម្លាប់មិត្តភក្ដិ។ រីឯជនរងគ្រោះ ឈ្មោះនាយអាត់ដេធ ម៉័នកានឬតុន អាយុ១៨ឆ្នាំ រស់នៅផ្ទះលេខ៥៦៥ ភូមិ១៣ ខេត្តជ័យភូមិ របួសធ្ងន់ធ្ងរផ្នែកក្បាល និងបានស្លាប់ពេលបញ្ជូនទៅដល់មន្ទីរពេទ្យ។
ប្រភពព័ត៌មានដដែល បានបន្តថា បន្ទាប់ពីកើតមាននូវអំពើឃាតកម្មបាញ់សម្លាប់ក្មួយបង្កើតរបស់ខ្លួន កាលពីថ្ងៃទី១៧ ខែកក្កដា ឆ្នាំ២០១៧ នោះមក សមត្ថកិច្ចក៏បានតាមស្រាវជ្រាវ រហូតឃាត់ខ្លួនជនដៃដល់បាន នៅថ្ងៃបន្ទាប់។
នៅក្នុងអំឡុងពេលសមត្ថកិច្ចសាកសួរនោះ ជនដៃដល់បានសារភាពថា មុនពេលកើតហេតុ ខ្លួន និងក្មួយបានផឹកស្រាជាមួយគ្នារហូតស្រវឹងរៀងៗខ្លួន។ នៅពេលនោះ ក្មួយរបស់គេបានទាញទូរស័ព្ទខ្លួនយកទៅលេងដោយមិនបានប្រាប់ ព្រមទាំងបានចុចលុបprogram មួយចំនួនទៀតផង។ ដោយសារតែបញ្ហានេះ ទើបធ្វើឲ្យពួកគេទាំង២នាក់មានការឈ្លោះប្រកែកគ្នា ធ្វើឲ្យរូបគេផ្ទុះកំហឹងយ៉ាងខ្លាំង រហូតអត់ទ្រាំលែងបាន ក៏ស្ទុះទៅទាញកាំភ្លើងនៅលើផ្ទះ មកគំរាម។ ប៉ុន្តែនៅពេលនោះ ជនរងគ្រោះបានស្ទុះទៅយកដំបង វាយមកលើគេ ទ់ើបគេបាញ់មួយគ្រាប់ បណ្ដាលឲ្យរងរបួសក្បាល រួចហើយរត់គេចខ្លួនបាត់។
ជនដៃដល់បានបន្តថា ក្មួយរបស់គេ មិនដែលគោរពរូបគេជាពូទេ។ កន្លងមក ក្មួយតែងតែនិយាយមើលងាយខ្លួនរហូត ទើបពេលខឹងខ្លាំង ធ្វើឲ្យរូបគេនឹកឃើញរឿងចាស់ ក៏បាញ់មួយគ្រាប់ទុកជាការព្រមាន ហើយគេក៏មិននឹកស្មានថា ត្រូវក្មួយស្លាប់បែបនេះឡើយ។
សមត្ថកិច្ចថៃបានអះអាងដែរថា ជនសង្ស័យធ្លាប់ជាប់គុក ដោយសារតែគេអាករសម្លាប់មិត្តជិតស្និទ្ធម្នាក់ ហើយទើបនឹងត្រូវដោះលែងឲ្យមានសេរីភាព កាលពី២ឆ្នាំមុននេះ៕ សហការី KBN
