មិនមែនមានតែមនុស្សនោះទេ ដែលមានចិត្តគំនិត ចេះដឹងគុណដល់អ្នកដែលមានគុណ តែសត្វប្រភេទខ្លះ ក៏មានចិត្តគំនិត ចេះដឹងគុណដូចមនុស្សផងដែរ ។ កាលណាមនុស្សធ្វើល្អដាក់វា នោះពួកសត្វទាំងនោះ មិនត្រឹមតែរកវិធីជួយ ឬសងគុណមនុស្សវិញនោះទេ ពួកវាថែមទាំងជួយមើលថែ គ្រួសាររបស់អ្នកផងដែរ ។
ជាក់ស្តែងក្នុងហេតុការណ៍ ដ៏សែនចម្លែកមួយ បានកើតឡើងនៅប្រទេសចិន ដែលតួឯក គឺជាពស់ថ្លាន់យក្សដ៏ធំ ហើយវែងមួយក្បាល ហើយពេលដែលមនុស្សឃើញវា ច្បាស់ជាភ័យខ្លាចជាក់ជាមិនខាន ។
បើតាមការរៀបរាប់ ពីបុរសម្នាក់ ដែលរស់នៅជាមួយ ពស់ថ្លាន់យក្សមួយក្បាលនេះ បានរៀបរាប់ឲ្យដឹងថា “អស់រយៈកាល៩ឆ្នាំ កន្លងមកហើយ ដែលលោកបានរស់នៅជាមួយពស់ថ្លាន់ យក្សមួយក្បាលនេះ។ កាលពីដំបូងរូបលោក បានជួបសត្វពស់១ក្បាលនេះ នៅក្បែរថ្នល់ ដោយវាមានរបួសកន្ទុយ ហើយពេលនោះវាមើលទៅ ដូចជាគួរឲ្យអាណិតណាស់ ទើបគាត់នាំយកពស់នោះ ទៅក្នុងផ្ទះ ហើយបានព្យាបាលរបួស និងមើលថែវារហូតមក។”
ពស់មួយក្បាលនោះ ក៏បានធំឡើងៗ ក្លាយជាសមាជិកក្នុងគ្រួសារគាត់ មួយបន្ថែមទៀត ហើយនៅពេលដែលវារស់នៅជាមួយគាត់ កាន់តែយូរ ពស់នេះកាន់តែស្រលាញ់ និងចូលចិត្តរូបគាត់ខ្លាំងឡើងៗ ហើយពស់នេះ មិនដែលធ្វើបាបក្មេងៗ និងរូបគាត់ម្តងណាឡើយ ។
ពេលដែលគាត់មិននៅផ្ទះ ពស់នេះបាននាំកូនប្រុសរបស់គាត់ លេងជាមួយគ្នា ដូចជាមិត្តភក្តិជិតស្និទ្ធិរបស់វាអញ្ចឹង ហើយបើតាមរូបភាព មើលទៅគួរឲ្យខ្លាច តែអ្វីដែលកូនប្រុសរបស់គាត់ចូលចិត្តនោះ គឺការដេកលេងជាមួយ និងសត្វពស់នេះតែម្តង ។
ហើយអ្វីដែលពស់ថ្លាន់យក្សមួយក្បាលនេះ ចូលចិត្តលេងជាងគេនោះ គឺការលេងទឹក វាពិតជាចូលចិត្តខ្លាំងណាស់។ មានមនុស្សជាច្រើន បានសុំទិញពស់នេះយកទៅចិញ្ចឹម ដោយអោយតំលៃយ៉ាងច្រើន តែរូបគាត់មិនព្រមលក់វាជាដាច់ខាត ទោះបីជាគាត់មិនសូវមានលុយច្រើនក៏ដោយ ៕
ប្រភព៖ ដកស្រង់ពីសារព័ត៌មាន ចិន
ប្រែសម្រួលដោយ៖ សហការី KBN
