ខេត្តបន្ទាយមានជ័យ៖ បុរសម្នាក់រវល់តែទៅរត់តាក់ស៊ី រកលុយចិញ្ចឹមគ្រួសារ ទុកប្រពន្ធឲ្យនៅមើលផ្ទះ ហើយនាងក៏បានអុជទៀនធូប ថ្វាយកុងម៉ា នាថ្ងៃសីលសុំសេចក្ដីសុខចម្រើន រួចចេញទីធ្វើការ ភ្លេចមើល ធ្វើឲ្យកម្ទេចធូប ធ្លាក់មកលើជើងធូប បង្កឲ្យកើតជាអគ្គិភ័យឆាបឆេះយ៉ាងសន្ធោសន្ធៅ ផ្អើលដល់ប្រជាពលរដ្ឋ និងសមត្ថកិច្ច នាំគ្នាចេញទៅជួយអន្តរាគមន៍ បាញ់ទឹកពន្លត់ កាលពីវេលាម៉ោង១០ និង៤៥នាទីព្រឹក ថ្ងៃទី២៣ ខែមិថុនា នៅក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
មន្ត្រីនគរបាលក្រុងសិរីសោភ័ណ បានឲ្យដឹងថា ផ្ទះដែលរងនូវគ្រោះអគ្គិភ័យនោះ មានបណ្ដោយប្រវែង៨ម៉ែត្រ និងទទឹងប្រវែង៥ម៉ែត្រ ធ្វើពីថ្មក្រោម ឈើលើ ដំបូលប្រក់ស័ង្កសី ជាកម្មសិទ្ធិរបស់ឈ្មោះ យី ម៉ៅ ភេទប្រុស អាយុ៣៧ឆ្នាំ មុខរបរជាអ្នករត់ឡានតាក់ស៊ី ប៉ោយប៉ែត-សិរីសភ័ណ ប្រពន្ធជាបុគ្គលិកក្រុមហ៊ុនរោងចក្រកាត់ដេរស៊ីសុផុន។ ក្រៅពីឆេះផ្ទះអស់ទាំងមូលនោះ គ្រោះអគ្គិភ័យនេះបានលេបត្របាក់ជម្រុកស្រូវ០១ខ្នង ចង្ក្រានបាយ១ខ្នង រួមនឹងទ្រព្យសម្បត្តិជាច្រើនទៀត។
មន្ត្រីនគរបាលដដែល បានបន្តថា មុនពេលកើតមាននូវគ្រោះអគ្គិភ័យនោះ បុរសជាប្ដីបានបើករថយន្តតាក់ស៊ីដឹកម៉ូយពីក្រុងសិរីសោភ័ណ ទៅកាន់ឡែម ស្រុកកំរៀង ខេត្តបាត់ដំបង។ ស្របពេលប្ដីចេញទៅបាត់នោះ ប្រពន្ធរបស់គាត់ក៏នឹកឃើញថា ថ្ងៃនេះជាថ្ងៃសីលផង នាងក៏ដុតធូបថ្វាយកុងម៉ា និងជំនៀងផ្ទះ សុំសេចក្ដីសុខចម្រើន រួចហើយក៏ចេញទៅក្រៅ ដើម្បីបំពេញការងារចិញ្ចឹមជីវិត។ លុះមកដល់វេលាខាងលើ ស្រាប់តែកើតមាននូវអគ្គិភ័យ ឆាបឆេះយ៉ាងសន្ធោសន្ធៅឡើង បង្កឲ្យភ្ញាក់ផ្អើល ដល់អ្នកភូមិ និងសមត្ថកិច្ចបើករថយន្តពន្លត់អគ្គិភ័យ ចេញមកជួយអន្តរាគមន៍បាញ់ទឹកពន្លត រហូតធ្វើឲ្យភ្លើងរលត់អស់ទៅវិញ នៅវេលាម៉ោងជាង១១ព្រឹកថ្ងៃដដែលនោះ។
ទោះជាយ៉ាងណា នៅក្នុងហេតុការណ៍គ្រោះអគ្គិភ័យនេះ ក្រៅពីបំផ្លាញអស់ផ្ទះទាំងមូលនោះ វាក៏មិនបានបណ្ដាលឲ្យមនុស្សណាម្នាក់រងរបួស ឬក៏ស្លាប់នោះដែរ។ រីឯទំហំ នៃការខូចខាត គិតជាទឹកប្រាក់ប៉ុន្មាននោះគឺសមត្ថកិច្ចមិនទាន់ដឹងនោះឡើយ៕ សហការី KBN-LIVE.com