ខេត្តបាត់ដំបង៖ ករណីដ៏សែនហួសចិត្តមួយ បានធ្វើឲ្យផ្អើលអ្នកលេងបណ្តាញសង្គម ជាពិសេសសមត្ថកិច្ចនគរបាល ខេត្តបាត់ដំបង ដោយសង្ឃ១អង្គបានធ្វើឲ្យប៉ះពាល់ ដល់ព្រះពុទ្ធសាសនាយ៉ាងធ្ងន់ធ្ងរបំផុត ដែលមិនអាចអត់ឱនឲ្យបាន។ បន្ទាប់ពីមានការចែកចាយ រូបភាពព្រះសង្ឃអង្គនោះ បានប្រើប្រាស់អាវុធជ័រ ដើម្បីថតបង្ហោះបង្អួតពីភាពសង្ហាររបស់ខ្លួន ក៏ត្រូវបានសមត្ថកិច្ច ចុះទៅនាំខ្លួន កាលពីរសៀលថ្ងៃ២១ មិថុនា ២០១៧នេះ តាមដីកាបង្គាប់លេខ ៩៥៨ ច.ខ របស់សាលាដំបូងខេត្តបាត់ដំបង ។
សមត្ថកិច្ចបាននាំខ្លួនសង្ឃអង្គនោះ ដែលគង់នៅវត្តដំរីស ភូមិកម្មករ សង្កាត់ស្វាយប៉ោ ក្រុងបាត់ដំបង ពីបទធ្វើឲ្យប៉ះពាល់ ដល់ព្រះពុទ្ធសាសនា និងកាន់កាប់រក្សាទុកអាវុធខុសច្បាប់ ។ សង្ឃអង្គនោះ មាននាម ហន សុផាន្នី ព្រះជន្ម២៥ឆ្នាំ មានទីលំនៅនៅភូមិសិរិសុខា ឃុំថ្មអណ្តើក ស្រុកចិត្តបុរី ខេត្តក្រចេះ ស្នាក់នៅកុដិលេខ១២ ក្នុងវត្តដំរីស ក្រុងបាត់ដំបង ខេត្តបាត់ដំបង ។
បើតាមការឲ្យដឹង ពីអ្នកឃើញហេតុការណ៍ផ្ទាល់ បានប្រាប់ថា ពេលសមត្ថកិច្ចចុះទៅឃាត់ខ្លួនសង្ឃអង្គនោះ គឺធ្វើពិធីផ្សឹក ដោយចូលរួមពីព្រះចៅអធិការវត្ត និងមន្ទីរធម្មការខេត្ត សម្រេចបកស្បង់ជីវរ ពីព្រះសង្ឃ ទៅជាគ្រហស្ថ ដើម្បីឲ្យសមត្ថកិច្ចនាំខ្លួន យកទៅសាកសួរទៅតាមផ្លូវច្បាប់ ៕
