ខេត្តបាត់ដំបង ៖ មានហេតុការណ៍ដ៏រន្ធត់មួយ បានកើតឡើងកាលពីវេលាម៉ោង ១២និង៣០នាទីរំលងអាធ្រាត ឈានចូលថ្ងៃទី២០ មិថុនា ២០១៧ ដោយមានករណីផ្ទុះធុងហ្គាសមួយ បណ្តាលឲ្យរបួសធ្ងន់ប្តីប្រពន្ធ២នាក់ និងស្លាប់កូនស្រីម្នាក់ ខូចខាតផ្ទះ១ខ្នង ទំហំ៥ម៉ែត្រគុណ៦ម៉ែត្រ ធ្វើពីឈើប្រក់ស័ង្កសី ម៉ូតូចាស់ចំនួន២គ្រឿង ហេតុការណ៍នេះកើតឡើងនៅចំណុច ភូមិបេងស្អាត ឃុំ-ស្រុកភ្នំព្រឹក ។
ជនរងគ្រោះត្រូវបានគេស្គាល់ ប្តីឈ្មោះ កាន សុឌឿន អាយុ៣៣ឆ្នាំ របួសធ្ងន់, ប្រពន្ធឈ្មោះ ចាន់ នី អាយុ២៥ឆ្នាំ របួសធ្ងន់ និងកូនស្រី ឈ្មោះ ឌឿន នីកា អាយុ៣ឆ្នាំ បានស្លាប់នៅក្នុងមន្ទីរពេទ្យ ។
មូលហេតុនៃការផ្ទុះនេះ មិនទាន់មានប្រភពអះអាងច្បាស់លាស់ នៅឡើយនោះទេ ។ ក្រោយកើតហេតុសមត្ថកិច្ចបានចុះទៅដល់ និងបានជួយបញ្ជូនជនរងគ្រោះ ទៅព្យាបាលនៅមន្ទីរពេទ្យបង្អែកស្រុកសំពៅលូន និងបានពិនិត្យកន្លែងកើតហេតុ ដោយធ្វើការសន្និដ្ឋានដំបូងថា ពិតជាករណីផ្ទុះធុងហ្គាស ពិតប្រាកដមែន ។
ក្នុងករណីនេះ សមត្ថកិច្ចសន្និដ្ឋានថា អាចបណ្តាលមកពីឆ្លងចរន្តអគ្គិសនី ពីខ្សែរភ្លើងប៉ះត្រូវធុងហ្គាស ទើបបណ្តាលឲ្យផ្ទុះតែម្តង ៕
