ភ្នំពេញ ៖ រថយន្តឡិចស៊ីស មួយគ្រឿង បើកបរមិនគោរពភ្លើងស្តុប ត្រូវម៉ូតូមួយគ្រឿងជិះដោយនារី ២នាក់ជ្រុលទៅបុក បណ្ដាលឱ្យធ្លាក់កាងមុខ ដល់ដី ចំនែកអ្នកជិះម៉ូតូរងរបួសរលាត់ដៃជើង ខាងរថយន្តសងសំណង ១០ដុល្លារមិនព្រមយក ចាំសាច់ញាតិមកដល់ទើបដឹងថា ខាងរថយន្តជាអ្នកជិតខាងគ្នា ដែលហេតុការណ៍នេះ កើតឡើងនៅយប់ ថ្ងៃទី១៩ ខែមិថុនា ឆ្នាំ២០១៧ ចំនុចស្តុបផ្សារដើមអំពិល ផ្លូវ៣១០ កែងនិងផ្លូវ១៦៣ សង្កាត់ទួលស្វាយព្រៃ១ ខណ្ឌចំការមន ។
តាមប្រភពពត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញ បុរស ២នាក់បានបើករថយន្តម៉ាកឡិចស៊ីស RX330 ពណ៌ស ពាក់ស្លាកលេខ ភ្នំពេញ 2AE-3397 បានធ្វើដំនើរតាមផ្លូវ ១៦៣ ក្នុងទិសដៅពីជើងទៅត្បូង ខណៈមកដល់កើតហេតុ ដែលជាផ្លូវបំបែកជាបួន ព្រមទាំងមានភ្លើងស្តុប ពណ៌ក្រហម តែអ្នកបើករថយន្តនៅតែបំពានបើកឆ្លងកាត់ ។
ខណៈពេលនោះ ក៏ស្រាប់តែមាននារី ២នាក់ បានជិះម៉ូតូម៉ាក PCX ពណ៌ខៀវ ពាក់ស្លាកលេខ ភ្នំពេញ 1DA-2986 បានធ្វើដំនើរតាមផ្លូវ ៣១០ក្នុងទិសដៅពីកើតទៅលិច ក្នុងល្បឿនលឿន ក៍ជ្រុលទៅបុកនិងរថយន្តឡិចស៊ីស ចំកាងមុខចំហៀងខាងឆ្វេង បណ្ដាលឱ្យរថយន្តធ្លាក់កាងមុខមកដល់ដី ។ ចំនែកអ្នកជិះម៉ូតូវិញ ដួលរងរបួសរលាត់ដៃជើងតិចតួច រីឯម៉ូតូរងការខូចខាត ក្រឡិតថ្នាំមួយចំហៀងខាងឆ្វេង ។
ភ្លាមៗនោះដែរ ភាគីខាងរថយន្តបានសុំធ្វើការសម្របសម្រួល ដោយសុំសងសំនងជាលុយចំនួន១០ដុល្លារ អោយទៅខាងម៉ូតូ តែពេលនោះខាងម៉ូតូដែលជិះដោយនារី ២នាក់មិនព្រមយកនោះទេរង់ចាំឱ្យបងប្អូនមកសិន ចាំដោះស្រាយគ្នា ។
ក្រោយពេលកើតហេតុ បន្តិចក្រោយមក ខាងបងប្អូនខាងនារី ២នាក់ បានមកដល់ ស្រាប់តែស្គាល់គ្នាជាមួយនិងអ្នកបើកបររថយន្តថាជាអ្នកជិតខាងនិងគ្នា រួចហើយបានអោយខាងរថយន្តយកម៉ូតូទៅជួយជុល វិញដើម្បីបញ្ចប់រឿង ៕ សហការី KBN-LIVE.com
