ភ្នំពេញ ៖ រថយន្តក្រឡុកបេតុង របស់ក្រុមហ៊ុន លាយបេតុង ហ្គោលឌីន ប៊ី អេសធី ខូអិលធីឌី បានបើកបុកម៉ូតូជិះដោយបុរសពីរនាក់ពីក្រោយ បណ្ដាលឱ្យរងរបួសធ្ងន់ ទាំងពីរនាក់ ហើយអ្នកបើកបររថយន្ត មិនបានឈប់ដោះស្រាយនៅកន្លែងកើតហេតុនោះទេ គឺបានព្យាយាមបើករថយន្តរត់បត់ត្រឡប់វិញ ជ្រុលទៅបុកនិងផ្ទះលក់បាយរបស់ប្រជាពលរដ្ឋ បណ្ដាលឱ្យរងកាខូចខាតមួយចំនួនធំ ។
ហេតុការណ៍នេះបានកើតឡើងនៅវេលាម៉ោង១០និង៤០នាទីយប់ ថ្ងៃទី១៦ ខែមិថុនា ឆ្នាំ២០១៧ ចំនុចស្តុបបញ្ញាសសក្តិ ផ្លូវ២៧១កែងនិងផ្លូវ៣៧១ ភូមិក្បាលទំនប់ សង្កាត់ចាក់អង្រែលើ ខណ្ឌមានជ័យ ។ ជនរងគ្រោះដែររងរបួសធ្ងន់ទាំងពីរនាក់ មិនទាន់ឱ្យស្គាល់អត្តសញ្ញាណនៅឡើយទេ គ្រាន់តែដឹងថា ជិះម៉ូតូម៉ាកហុងដាឌ្រីម ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ ភ្នំពេញ 1CO-7446 ។
តាមប្រភពព័ត៌មាន ពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញ បុរសរងគ្រោះទាំងពីរនាក់ បានជិះម៉ូតូម៉ាកហុងដាឌ្រីម ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ ភ្នំពេញ 1CO-7446 បានធ្វើដំណើរតាមផ្លូវ ៣៧១ ក្នុងទិសដៅពីលិចទៅកើត ខណៈមកដល់ចំនុចកើតហេតុ អ្នកបើកម៉ូតូបានបត់ស្តាំឡើងទៅផ្លូវ២៧១ ខណៈពេលនោះ ក៍ស្រាប់តែមានបុរសម្នាក់សង្ស័យស្រវឹងស្រា បានបើករថយន្តក្រឡុកបេតុង របស់ក្រុមហ៊ុន លាយបេតុង ហ្គោលឌិន ប៊ី អេស ធី ខូអិលធីឌី ម៉ាក SINOTRUK ពណ៌ខៀវចាស់ លាយទឹកប្រាក់ ពាក់ស្លាកលេខ ភ្នំពេញ 5A-0962 បានធ្វើដំនើរតាមផ្លូវទិសដៅស្របគ្នា ក្នុងល្បឿនលឿន ក៍ជ្រុលទៅបុកនិងម៉ូតូ ដែលជិះដោយបុរស ២នាក់ ចំពីក្រោយពេញទំហឹង កិនអូសពីលើម៉ូតូ ធ្វើឱ្យអ្នកបើកម៉ូតូរងរបួស បែកប្រអប់ដៃខាងឆ្វេង ចំនែកអ្នកអង្គុយខាងក្រោយរងរបួសសន្លប់ស្ដូកស្ដឹង ។
ទាំងពីរនាក់ត្រូវបានរថយន្តសង្គ្រោះ ដឹកយកទៅសង្គ្រោះនៅគ្លីនិកឯកជន ម៉ូតូរងការខូចខាតខ្ទេចខ្ទីមួយកំណាត់ ។ ដោយឡែកអ្នកបើកបររថយន្តបង្ក ឃើញស្ថានភាពបែបនេះ បានបន្ថែមល្បឿនបួងចង្កូត បត់ត្រឡប់ក្រោយ ដើម្បីរត់គេចចូលទៅក្រុមហ៊ុនវិញមាន ចម្ងាយ១០០ម៉ែត្រពីកន្លែងកើត ស្រាប់តែអ្នកបើកបររថយន្ត បានបើកទ្វាររថយន្តលោតចុះចោលចង្កូត រត់ចូលទៅក្នុងក្រុមហ៊ុនបាត់ស្រមោល ដោយបន្សល់ទុករថយន្តដែលមិនទាន់អស់ល្បឿន ក៍ជ្រុលទៅបុកចូលផ្ទះលក់បាយរបស់ប្រជាពលរដ្ឋ ដែលនៅក្បែរក្រុមហ៊ុននោះ បណ្តាលអោយរងការខូចខាតសំភារៈ ចាន ឆ្នាំង តុទូ កៅអី និងម្ហូបអាហារ អស់មួយចំនួនធំ តែសំណាងល្អ មិនគ្រោះថ្នាក់ដល់អ្នករស់នៅក្នុងផ្ទះ ។
ចំណែកម្ចាស់ផ្ទះវិញ បានឱ្យដឹងថា នៅមុនពេលកើតហេតុ ក្រុមគ្រួសាររបស់គាត់បានបើកទ្វារផ្ទះ រួចហើយនាំគ្នាចូលដេកអស់ ខណៈនោះក៍តែឮសំឡេងគ្រាំង ចូលទៅដល់ក្បាលគ្រែរបស់គាត់ លុះពួកគាត់ក្រោកឡើង ស្រាប់តែឃើញរថយន្ត ក្រឡុកបេតុងនោះ ចូលទៅដល់ក្នុងផ្ទះគាត់បាត់ទៅហើយ ។ ប្រភពដដែលបានបន្តបន្តទៀត នេះសំណាងល្អហើយ ការបុកចូលផ្ទះរបស់គាត់នេះ គឺខ្វះតែកន្លះម៉ែត្រទៀត កុំអីច្បាស់ជាមានអ្នករងរបួសធ្ងន់ អាចបណ្ដាលឱ្យស្លាប់បាត់បង់ជីវិតផងដែរ ។
ក្រោយពេលកើតហេតុ សមត្ថកិច្ចមូលដ្ឋាន និងជំនាញបានចុះទៅដល់កន្លែងកើតហេតុ រួចហើយបានធ្វើការវាស់វែង រួចយករថយន្ត និងម៉ូតូយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីអោយម្ចាស់ក្រុមហ៊ុនចូលខ្លួនទៅធ្វើការដោះស្រាយ ៕ សហការី KBN-LIVE.com
