ប្រព័ន្ធផ្សព្វផ្សាយចិន (Xinhua) បានរាយការណ៍ឲ្យដឹងថា មានហេតុការណ៍ផ្ទុះដ៏ខ្លាំងក្លាមួយ កើតឡើងនៅខាងក្រៅសាលាមត្តេយ្យមួយកន្លែង ស្ថិតក្នុងក្រុង Xuzhou ក្បែរឆ្នេរសមុទ្រខេត្ត Jiangsu ភាគខាងកើតនៃប្រទេសចិន វេលាម៉ោងប្រមាណ ៥ល្ងាចថ្ងៃព្រហស្បតិ៍ (ម៉ោងក្នុងស្រុក)។ នេះបើយោងតាមសារព័ត៌មាន reuters បានចេញផ្សាយនៅថ្ងៃសុក្រ ទី១៦ ខែមិថុនា ឆ្នាំ២០១៧។
រដ្ឋាភិបាលចិន បានចេញសេចក្ដីថ្លែងការណ៍បញ្ជាក់ថា គិតត្រឹមវេលាម៉ោង ៧៖៤៥នាទីយប់ថ្ងៃព្រហស្បតិ៍ មានហេតុការណ៍ដ៏តក់ស្លុតមួយ ដែលបណ្ដាលឲ្យមនុស្សស្លាប់ចំនួន ៨នាក់ និង ៦៦នាក់ផ្សេងទៀតរងរបួស។ ក្នុងចំណោមមនុស្ស ៨នាក់ ដែលស្លាប់មាន មនុស្ស ២នាក់បាត់បង់ជីវិតនៅកន្លែងកើតហេតុភ្លាមៗ និង៦នាក់ទៀតស្លាប់ក្នុងមន្ទីរពេទ្យ ដោយសាររងរបួសយ៉ាងធ្ងន់ធ្ងរមិនអាចព្យាបាលបាន។
គួរបញ្ជាក់ផងដែរថា អាជ្ញាធរចិន ពុំទាន់បញ្ជាក់ព័ត៌មានច្បាស់ការណាមួយនៅឡើយទេ អំពីមូលហេតុដែល បានបណ្ដាលឲ្យមានការផ្ទុះដ៏ខ្លាំងក្លានេះ ស្របពេលការស៊ើបអង្កេត កំពុងតែធ្វើប្រតិបត្តិការបន្ត៕ ផ្ដល់សិទ្ធដោយ៖ Kqube
