ថ្វីបើពិធីបុណ្យសព ព្រមទាំងពិធីបុណ្យគម្រប់ ៧ថ្ងៃរបស់អតីតពីធិករសំឡេងធ្ងន់ លោក អ៊ិត សេដ្ឋា បានបញ្ចប់ទៅហើយយ៉ាងណាក្ដី ក៏នៅតែមានមិត្តសិល្បៈករ សិល្បៈការិនី ជាច្រើនក្នុងប្រទេសនៅតែមានអារម្មណ៍នឹក ស្រមៃ ស្រណោះដល់វិញ្ញាណខណ្ឌ និងក្រុមគ្រួសារបស់លោក អ៊ិត សរដ្ឋា ជានិច្ច ជាពិសេសនឹកអាណិតដល់កូនៗ ដ៏ក្មេងខ្ចីប្រុសស្រីទាំង ៣នាក់ មិនដឹងមានអ្វីជាទីពឹងបន្តទៀត ក្រោយពេលបាត់បង់លោកឪពុកជាទីស្រឡាញ់ ខណៈដែលជីដូនក៏មានវ័យជរា ។
ជាការពិតណាស់ សម្រាប់សេចក្ដីព្រួយបារម្ភទាំងនេះ ទើបធ្វើឱ្យអ្នកនាង យុគ ចិន្ដា ដែលជាដៃគូការងារចាស់វស្សារបស់លោក អ៊ិត សេដ្ឋា នៅតែបន្តជួយ រៃអង្គាស់បច្ច័យ នៅលើទឹកដីសហរដ្ឋអាមេរិក ដើម្បីជួយដល់គ្រួសារនៃសពលោក អ៊ិត សេដ្ឋា ហើយការរៃអង្គាសនេះ អ្នកនាងនឹងរៀបចំជាពិធីបុណ្យមួយសម្រាប់បងប្អូនខ្មែរដែលរស់នៅ រដ្ឋ Texas នៃទីក្រុង Houston សហរដ្ឋអាមេរិក ។
ទាក់ទងជាមួយគ្នានេះអ្នកនាង យុគ ចិន្ដា ក៏បានប្រកាស់ដំណឹងនៅលើគណនីហ្វេសប៊ុកផ្ទាល់ខ្លួនរបស់នាងផងដែរ ដោយបានសរសេរថា ៖ «សូមជំរាបជូនដំណឹងដល់បងប្អូនខ្មែរដែលរស់នៅក្នុងរដ្ឋ Texas នៃទីក្រុង Houston សហរដ្ឋអាមេរិក នឹងបណ្តារដ្ឋផ្សេងទៀត ដែលមានបំណងចង់ចូលបច្ច័យជួយដល់ក្រុមគ្រួសារសពលោក អ៊ិត សេដ្ឋា អោយបានជ្រាបថា នាងខ្ញុំនឹងប្រារព្ធកម្មវិធីបុណ្យដើម្បីរៃអង្គាសបច្ច័យនៅថ្ងៃទី ១២ និង១៤ ខែមិថុនានេះ ហើយលោកក៏ អាចទំនាក់ទំនងតាមលេខទូរស័ព្ទ ?? 8323510241 ដើម្បីសួរព័ត៌មានលំអិត អំពីកម្មវិធីបុណ្យ និងទីកន្លែងប្រារព្ធពិធី ហើយបច្ច័យដែលប្រមូលបានទាំងអស់ នាងខ្ញុំនឹងយកត្រលប់ទៅប្រទេសកម្ពុជាវិញនៅថ្ងៃទី15/06/2017 ខាងមុខនេះដើម្បីប្រគល់ជូនដល់ក្រុមគ្រួសារនៃសព លោក អ៊ិត សេដ្ឋា សូមគោរពថ្លែងអំណរគុណចំពោះសន្តានចិត្តសប្បុរសរបស់អស់លោកអ្នក សូមលោកអ្នកជួបប្រទះតែសេចក្តីសុខ នឹងសុភមង្គលគ្រប់ក្រុមគ្រួសារ ដោយក្តីគោរពពីចំងាយ ពីនាងខ្ញុំ យុគ ចិន្តា » ។
គួរំឮកដែរថា ក្រោយពីលោក អ៊ិត សេដ្ឋា ស្លាប់ភ្លាម អ្នកនាង យុគ ចិន្តា មិនបានទៅមើល និងចូលរួមពិធីបុណ្យដូចសិល្បៈករ សិល្បៈការិនីដទៃឡើយ ព្រោះអ្នកនាងជាប់មានភារកិច្ចសំខាន់ ដែលត្រូវបំពេញជាដាច់ខាតនៅសហរដ្ឋអាមេរិក ប៉ុន្តែទន្ទឹមគ្នានេះ អ្នកនាង ក៏បានជួយរៃអង្គាសបច្ច័យពីបងខ្មែរនៅសហរដ្ឋអាមេរិក ដើម្បីជួយដល់គ្រួសារសព ហើយក្នុងនោះ អ្នកនាង ក៏បានសរសេរសំណេរទឹកភ្នែកមួយថា «សំណេរទាំងនេះគឺជាសាររបស់ យុគ ចិន្តា ”ប្អូនស្ដាយណាស់ដែលមិនបានមកចូលរួមជូនដំណើរបងមុនដង្ហើមចុងក្រោយ ស្ដាយណាស់ដែលមិនមានឱកាសជួបមុខបងជាចុងក្រោយ រួមការងារជាមួយគ្នាអស់រយៈពេលជាច្រើនឆ្នាំបងជាដៃគូការងារដ៏ល្អបំផុត ជាបងប្រុសដ៏ល្អម្នាក់ដែលមិនរួញរានឹងការងារ អត់ធ្មត់គ្រប់បែបយ៉ាង សែនមហាសោកស្ដាយដែលបងចាកចោលប្អូនដោយមិនមានពាក្យលា អារម្មណ៍ប្អូននៅឆ្ងាយតែការនឹករលឹកពីអនុស្សាវរីយការងារល្អៗជាច្រើនដែលពួកយើងបានធ្វើជាមួយគ្នានាពេលកន្លងមក ពេលនេះបងលាចាកលោកហើយ”។
សារ យុគ ចិន្តា បន្តថា “ពេលនេះប្អូនកំពុងតែស្នាក់នៅរដ្ឋម៉ាសាយូសេត ទីក្រុងឡូវែល ដើម្បីអង្គាសថវិកាដើម្បីជួយដល់ក្រុមគ្រួសារបង ហើយ៣ថ្ងៃទៀតប្អូននឹងបន្តស្នាក់នៅរដ្ឋតិចសាស់ចំនួន១សប្ដាហ៍ ប្អូននឹងត្រលប់ទៅប្រទេសកម្ពុជាវិញ ប្អូននឹងប្រមែប្រមូលបច្ច័យទាំងអស់ជូនដល់បង សូមលោកអ្នកមេត្តាបរិច្ចាគថវិកាតាមរយៈទូរស័ព្ទរបស់ម្ដាយខ្ញុំនៅសហរដ្ឋអាមេរិកតាមរយៈលេខ 8323510241 លាហើយបងប្រុសជាទីស្រលាញ់ លាហើយដៃគូរដ៏កម្សត់កម្រ លាដោយគ្មានថ្ងៃវិលត្រលប់វិញ …….សូមដួងវិញ្ញាណក្ខន្ធបងប្រុសបានទៅសោយសុខសុគតិភពកុំបីឃ្លៀងឃ្លាតឡើយ” ៕ យុទ្ធ KBN