ខេត្តកណ្ដាល៖ សកម្មជនមាតាធម្មជាតិ ចំនួនពីរនាក់ ឈ្មោះ ថុន រដ្ឋា និង ម៉េង ហេង កំពុងព្រួយបារម្ភពីសុវត្ថិភាពផ្ទាល់ខ្លួន បន្ទាប់ពីពួកគេ បានចុះទៅសម្រួលពលរដ្ឋពីរឃុំ ដែលបានផ្ទុះការតវ៉ា អំពីការបាក់ច្រាំងទន្លេ បណ្ដាលឲ្យផ្ទះប្រជាពលរដ្ឋ ជាង១០ខ្នងបានបាក់ធ្លាប់ចូលទន្លេ ដោយពួកគេលើកឡើងថា បណ្ដាលមកពីការប៊ូមខ្សាច់ នៅតំបន់នោះ។
ថុន រដ្ឋា សកម្មជនម្នាក់ក្នុងចំណោមពួកគេ បានប្រាប់ Kqube.net ថា មកដល់ពេលនេះ ការតវ៉ារបស់ប្រជាពលរដ្ឋ ស្ថិតនៅឃុំសិត្បូ និងឃុំរកាខ្ពស់ អំពីការប៊ូមខ្សាច់ ដែលបណ្ដាលឲ្យបាក់ច្រាំងទន្លេចំនួនពីរកន្លែងនោះបានបញ្ឈប់ហើយ ដោយបានការអន្តរាគមន៍ ពីថ្នាក់ខេត្ត និងស្ថាប័នពាក់ព័ន្ធមួយចំនួនទៀត ប៉ុន្តែបញ្ហាដែលសំខាន់នោះ គឺពួកគេព្រួយបារម្ភ ពីសុវត្ថិភាពផ្ទាល់ខ្លួន ពេលត្រឡប់មកភ្នំពេញវិញ។
សកម្មជនរូបនេះ បានប្រាប់មូលហេតុថា កាលពីថ្ងៃសុក្រ កន្លងទៅនេះ ពួកគេបានឃើញប្រជាពលរដ្ឋ រស់នៅឃុំរកាខ្ពស់ ស្រុកស្អាង ខេត្តកណ្ដាល បានបង្ហោះតាមហ្វេសប៊ុក អំពីការបាក់ច្រាំងទន្លេ ដែលបណ្ដាលឲ្យមាន ការគំរាមកំហែងដល់ផ្ទះប្រជាពលរដ្ឋ ជាបន្តបន្ទាប់ទៀត ខណៈដែលការបាក់ច្រាំងនោះ មានផ្ទះប្រជាជន បានធ្លាក់ចូលទន្លេជាង១០ខ្នងរួចហើយ ទើបពួកគេចុះទៅទីនោះ ស្វែងយល់មូលហេតុបន្ថែម។
ថុន រដ្ឋា បន្តថា ក្រោយពួកគេទៅឃើញជាក់ស្ដែង គឺនៅទីនោះពិតជា មានការបាក់ច្រាំងទន្លេ និងមានផ្ទះពលរដ្ឋនៅទីនោះ ធ្លាក់ចូលទន្លេពិតមែន ហើយក៏មានប្រជាពលរដ្ឋ ជាច្រើនគ្រួសារទៀត ដែលទទួលរងនូវការគំរាម កំហែងពីច្រាំងទន្លេ ដែលចេះតែបាក់ខិតជិតដល់លំនៅឋានរបស់ខ្លួន ធ្វើឲ្យមានការព្រួយបារម្ភ នឹងបាននាំគ្នាមកតវ៉ា សូមឲ្យបញ្ឈប់ការបូមខ្សាច់ជាបន្តទៀត ក្នុងនោះពួកគេ (សកម្មជនមាតាធម្មជាតិ) បានធ្វើជាអ្នកសម្របសម្រួលក្នុងការតវ៉ានោះ ក្នុងគោលបំណងកុំឲ្យមានអំពើហិង្សាប៉ុណ្ណោះ។
លោកបន្តថា បន្តែនៅយប់ថ្ងៃទី១១ ខែមិថុនា ឆ្នាំ២០១៧ម្សិលមិញនេះ ស្រាប់តែមានមេប៉ុស្តិ និងកងសមត្ថកិច្ចជាច្រើននាក់បានមកព័ន្ធនៅគេហដ្ឋានពលរដ្ឋ ដែលពួកគេកំពុងស្នាក់នៅនោះទាំងយប់ ដោយយកហេតុផលថា សុំអត្តសញ្ញាណប័ណ្ណពួកគេ ដើម្បីរក្សានូវសុខសុវត្ថិភាពក្នុងមូលដ្ឋានខាងលើនេះ។
តាមការបញ្ជាក់ពីសកម្មជនរូបនេះដដែលថា រយៈពេលពីរថ្ងៃមកនេះ ពួកគេ(សមត្ថកិច្ច)នៅតែបន្តចង់បានអត្តសញ្ញាណ នៃសកម្មជនទាំងពីររូបដដែល រហូតនៅព្រឹកថ្ងៃទី១២ ខែមិថុនា ឆ្នាំ២០១៧នេះ មានពាក្យចចាមអារ៉ាមថា ពួកគេអាចនឹងត្រូវបានចាប់ខ្លួនតាមផ្លូវ បើសិនជាចាកចេញពីផ្ទះប្រជាពលរដ្ឋ ស្ថិតក្នុងអាសយដ្ឋានខាងលើនោះ៕
ផ្តល់សិទ្ធដោយ៖ kqube.net