សិល្បៈ ៖ តារាចម្រៀងលោក សួស សងវាចា បានធ្លាក់ខ្លួនមានជំងឺ និងពិការភាពជិតពីរឆ្នាំមកនេះ ដោយត្រូវចំណាយលុយព្យាបាលជាប្រចាំ ក្រៅពីនេះលោកក៏មានជំងឺទឹកនោមផ្អែមថែមទៀត។ ពេលជំងឺទាំងពីរលោកមិនទាន់បានប្រសើរគ្រួសារលោកក៏មានជីវភាពកាន់តែយ៉ាប់ រហូតគ្មានថវិកាទិញថ្នាំ និងទៅធ្វើចលនារាងកាយនៅមន្ទីរពេទ្យ ដោយគ្មានលុយឲ្យពេទ្យ។
ទោះជាព្យាបាលអស់រយៈពេលជិតពីរឆ្នាំទៅហើយក្ដី ប៉ុន្តែរហូតមកដល់ពេលនេះស្ថានភាពជំងឺដាច់សរសៃឈាមខួរក្បាល និងជំងឺទឹកនោមផ្អែមលោក សួស សងវាចា មិនទាន់បានធូរស្រាលនៅឡើយ ខណៈដែលដៃខាងឆ្វេងរបស់លោកមិនទាន់កម្រើកបាន ដូច្នេះហើយលោកត្រូវចំណាយលុយព្យាបាលជាប្រចាំក្នុងមួយខែៗខ្ទង់ជិតមួយពាន់ដុល្លារ ម៉្លោះហើយទើបគ្រួសារលោកមានសភាពកាន់តែយ៉ាប់ ព្រោះប្រភពចំណូលប្រចាំគ្រួសារពីរូបលោក បានកាត់ផ្ដាច់ទាំងស្រុង។
គួរបញ្ជាក់ដែរថា លោក សួស សងវាចា ក្រៅពីមានជំងឺដាច់សរសៃឈាមខួរក្បាល លោកក៏មានជំងឺទឹកនោមផ្អែមកម្រិតធ្ងន់មួយមុខទៀត ដែលត្រូវចាក់ថ្នាំការពារជាប្រចាំផងដែរ។ បញ្ហាទាំងនេះហើយដែលធ្វើឲ្យលោក ខិតខំជម្នះសាកល្បងហាត់ច្រៀងជាថ្មី ប៉ុន្តែច្រៀងមិនបានឆាប់ហត់៕ ផ្ដល់សិទ្ធដោយ៖ Kqube
