ភ្នំពេញ ៖ ជនសង្ស័យម្នាក់ក្នុងចំនោម ៣នាក់ បានធ្វើសកម្មភាពឆក់កាបូបមិនបានសំរេច បណ្តាលឱ្យដួលម៉ូតូហើយរត់ចោលម៉ូតូបានបន្តិច ស្តាយម៉ូតូពេកត្រឡប់មកសុំម៉ូតូវិញត្រូវអាវុធហត្ថខណ្ឌពោធិ៍សែនជ័យ ឃាត់ខ្លួនបានម្នាក់ កាលពីវេលាម៉ោង១០និង៤៥នាទីយប់ ថ្ងៃទី៨ ខែមិថុនា តាមបណ្តោយផ្លូវសហពន្ធ័រុស្ស៊ី ចំណុចផ្ទះលេខ៣៦ ភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យខាងលើមានឈ្មោះ រតនៈ ដាវី ភេទប្រុស អាយុ ២០ឆ្នាំ មុខរបរមិនពិតប្រាកដ ស្នាក់នៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅខេត្តតាកែវ ជិះម៉ូតូធ្វើសកម្មភាពម៉ាកហុងដាឌ្រីម ស៊េរី០១៧ ពណ៍ខ្មៅ ពាក់ស្លាកលេខ ភ្នំពេញ 1GE-5893 ជិះគ្នា ៣នាក់ ក្នុងទិសដៅពីកើតទៅលិច ។ ស្រ្តីរងគ្រោះមិនបានប្រាប់ឈ្មោះ អាយុជាង ២០ឆ្នាំ ជិះម៉ូតូឌុប ។
ប្រភពព័ត៌មានបានឱ្យដឹងថា មុនពេលកើតហេតុ ជនសង្ស័យមានគ្នា ៣នាក់ជិះម៉ូតូមួយគ្រឿង ទិសដៅពីកើតទៅលិច ចំណែកស្រ្តីរងគ្រោះ ជិះម៉ូតូឌុបមួយគ្រឿងម៉ាកហុងដាឌ្រីម ពណ៌ខ្មៅ ជិះពីភូមិត្រពាំងឈូក សង្កាត់ទឹកថ្លា ខណ្ឌសែនសុខ ឆ្ពោះទៅរង្វង់មូលចោមចៅ ក្នុងតំលៃ ៧០០០រៀល ។ ខណៈមកចំនុចកើតខាងលើ ស្រាប់តែមានជនសង្ស័យបានឆក់យកកាបូបលុយដែលស្ពាយជាប់នឹងខ្លួន តែឆក់មិនបានសម្រេច ដោយសារខ្សែកាបូបមិនបានដាច់ បណ្តាលឱ្យដួលម៉ូតូជនរងគ្រោះ រងរបួសស្រាលទាំង ២នាក់ ចំណែកឯជនសង្ស័យ ក៏ដួលដែរ ហើយបានរត់គេចខ្លួនបាត់ស្រមោល ។
ក្រោយពេលកើតហេតុ ជនរងគ្រោះមិនបានទៅដាក់ពាក្យបណ្តឹងទេ ត្រូវរថយន្តសង្គ្រោះដឹក យកទៅព្យាបាលនៅគ្លីនិកចំរើន ចំណែកអ្នករត់ម៉ូតូឌុប មិនបានទៅព្យាបាលរបួសទេ បានជិះម៉ូតូត្រឡប់ទៅផ្ទះវិញ ។
ដោយឡែកខណៈពេលដែលសមត្ថកិច្ចកំពុងតែមកសួរនាំ នៅកន្លែងកើតហេតុ ស្រាប់តែមានជនសង្ស័យម្នាក់ ស្តាយម៉ូតូដែលទើបនឹងទិញផង បានដើរមកទាំងអត់ពាក់ស្បែកជើង បានសុំយកម៉ូតូវិញ ត្រូវកម្លាំងកងរាជអាវុអហត្ថខណ្ឌពោធិ៍សែនជ័យ ឃាត់ខ្លួនមកសាកសួរនៅអាវុធហត្ថខណ្ឌពោធិ៍សែនជ័យ ដើម្បីធ្វើការសួរនាំចាត់ការតាមច្បាប់ ៕
សហការី KBN-LIVE.com