កងទ័ពប៉ារ៉ារបស់អុីរ៉ាក់ ត្រូវបានរាយការណ៍មកថា ទើបបានបើកការវាយប្រហារ យ៉ាងកក្រើក នៅលើសមរភូមិប្រទេសស៊ីរី ដោយដណ្ដើមយកភូមិចំនួន ៩បន្ថែមទៀតពីកណ្ដាប់ដៃ ក្រុមសកម្មប្រយុទ្ធ ISIS។ នេះបើយោងតាមការចេញផ្សាយរបស់សារព័ត៌មាន theguardian។
បើតាមសេចក្ដីថ្លែងការណ៍របស់កងកម្លាំងរដ្ឋាភិបាលអុីរ៉ាក់ Hashed al-Shaabi ថា កាលពីថ្ងៃចន្ទ ទី០៥ ខែមិថុនា ម្សិលមិញ កងកម្លាំងរបស់ពួកគេបានបាញ់ប្រហារដោយប្រើរថក្រោះផ្លោងជាច្រើនគ្រាប់ទៅលើជុំរុំរបស់ក្រុមជ្រុលនិយម។ ក្នុងការប្រយុទ្ធនេះសមាជិក ISIS ប្រមាណជា ៣៧នាក់បានស្លាប់ ភូមិចំនួន ៩ត្រូវបានដណ្ដើមមកវិញ។
ប្រភពដដែលបន្ថែមថា រថយន្តយោធាពួកសកម្មប្រយុទ្ធចំនួន ៤គ្រឿង ត្រូវបានកងកម្លាំងអាកាសអ៊ីរ៉ាក់បាញ់កម្ទេចឆេះយ៉ាងសន្ធោសន្ធៅ ដែលស្ថិតនៅចម្ងាយ ២០គីឡូម៉ែត្រ ពីភាគខាងកើតព្រំដែនស៊ីរី។
គួរបញ្ជាក់ផងដែរថា សង្គ្រាមស៊ីវិលរាំរៃ ដែលបានផ្ទុះឡើងនៅក្នុងប្រទេស មកដល់ពេលនេះបើតាមរបាយការណ៍ពីអង្គការ UNICEF មានកុមារប្រមាណជាង ១សែននាក់កំពុងស្ថិតក្នុងគ្រោះថ្នាក់ ដោយពួកគេត្រូវបានក្រុមជ្រុលនិយមរដ្ឋឥស្លាម ចាប់ឃុំខ្លួន និងសម្លាប់ចោល ខណៈដែលប្រជាជនជាច្រើននាក់ផ្សេងទៀតគេចខ្លួន និងរស់នៅប្រឈមនឹងគ្រោះថ្នាក់គ្មានស្បៀងអាហារ ឬទីជម្រកឡើយ៕
ផ្តល់សិទ្ធដោយ៖ kqube.net