សិល្បៈ ៖ មុនផុតបង្ហើមលោក អ៊ិត សេដ្ឋា មានគោលបំណងពីរដែលមិនទាន់សម្រេចបាន គឺលោកចង់បានផ្ទះមួយឲ្យកូន និងម្ដាយជរាស្នាក់នៅ និងចង់ឃើញកូនៗរៀនបានចប់ចុងចប់ដើម ។ដើម្បីបំពេញបំណងនេះស្ថានីយទូរទស្សន៍ CTN បានរៀបចំឲ្យមាន«មូលនិធិ CTN» ដើម្បីរៃអង្គាសថវិកាជួយកូនៗកំព្រាទាំង៣នាក់របស់លោក អ៊ិត សេដ្ឋា ព្រមទាំងម្ដាយរបស់លោក។
តាមការបញ្ចេញព័ត៌មានខាងលើនេះបានឲ្យដឹងថា មូលនិធិនេះមានគំនិតផ្ដួចផ្ដើមពីឯកឧត្ដម ហ៊ុយ វណ្ណៈ ព្រមទាំងទទួលបានការគាំទ្រពីអ្នកឧកញ៉ា គិត ម៉េង ដើម្បីទិញផ្ទះ១ល្វែង ព្រមទាំងទ្រទ្រង់ជីវភាព និងផ្ដល់ការសិក្សាដល់កូនៗសពលោក អ៊ិត សេដ្ឋា រហូតដល់ចប់ ដើម្បីជាការជូនដំណើរវិញ្ញាណក្ខន្ធ លោក អ៊ិត សេដ្ឋា ទៅកាន់សុគតិភពដោយស្ងប់។
គួរបញ្ជាក់ដែរថា លោក អ៊ិត សេដ្ឋា បានចូលបម្រើការងារនៅក្រុមហ៊ុន CBS ដែលមានទូរទស្សន៍ CTN, CNC, MyTV, CTN International និង OneTVជាង១០ឆ្នាំមកហើយ។ កាលពីវេលាម៉ោង២រសៀលថ្ងៃទី០៤មិថុនា លោកបានទទួលមរណភាព ក្នុងជន្មាយុ៤៩ឆ្នាំ ដោយរោគាពាធ និងបានបន្សល់ទុកកូនកំព្រាតូចៗប្រុសស្រី៣នាក់ គ្មានផ្ទះសម្បែង និងគ្មានថវិកាទ្រទ្រង់ជីវភាពនោះទេ។
សូមបញ្ជាក់ដែរថា ការទទួលថវិកាសប្បុរសរបស់មូលនិធិនេះ នឹងធ្វើតាមតែប្រព័ន្ធធនាគារ Wing នឹងចាប់ពីថ្ងៃទី០៧ ខែមិថុនា ឆ្នាំ២០១៧ ដែលងាយគ្រប់គ្រងបាន និងដោយតម្លាភាព គឺធ្វើតែតាមរយៈមូលនិធិ CTN តែមួយគត់។ការទទួលថវិកាសប្បុរសចូលរួមបរិច្ចាគក្នុង “មូលនិធិ CTN ជួយកូនៗកំព្រារបស់លោក អុិត សេដ្ឋា” គឺចាប់ទទួល និងប្រព្រឹត្តិទៅនៅថ្ងៃទី០៨ ខែមិថុនា ឆ្នាំ២០១៧ ដោយផ្សាយផ្ទាល់នៅទូរទស្សន៍ CNC ចាប់ពីវេលាម៉ោង ២:០០នាទី ដល់ ៤:០០នាទី រសៀល ។
ព័ត៌មានបន្ថែម សូមមេត្តាទាក់ទងគណៈកម្មការមូលនិធិ តាមរយៈលេខទូរស័ព្ទ៖ ០១២ ២២១ ៧៨៩, ០១៧ ៧៩៩ ៧៧៧, ០១៧ ៥០២ ៥២៩ និង ០៩២ ១៣០ ០០៧៕
ផ្ដល់សិទ្ធដោយ៖ kqube