កំពង់ស្ពឺ៖ នៅវេលាម៉ោងប្រហែល៣រសៀល ថ្ងៃទី៣ មិថុនា ២០១៧ នេះមានគ្រោះថ្នាក់ចរាចរណ៍មួយ បានកើតឡើងនៅលើផ្លូវជាតិ ចន្លោះគីឡូម៉ែត្រលេខ៩០-៩១ ក្នុងភូមិ៣ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បានបណ្តាលឲ្យមនុស្ស៥នាក់ របួសធ្ងន់ ។
បើតាមអ្នកឃើញហេតុការណ៍ បានឲ្យដឹងថា មុនកើតហេតុគេឃើញរថយន្ត ម៉ាកឡិចស៊ីស ពណ៌ស្ករ RX300 ស្លាកលេខ ភ្នំពេញ 2W 1399 ជិះគ្នា៥នាក់ បើកបរពីលិចទៅកើត លុះមកដល់ចំណុចកើតហេតុខាងលើ រថយន្តក៏បានផ្ទុះកង់ក្រោយខាងស្តាំ បណ្តាលឲ្យរេចង្កូត ទៅបុកដើមឈើនៅខាងជើងផ្លូវ បណ្តាលឲ្យអ្នកបើកបរ និងអ្នកជិះក្នុងឡាន រងរបួសធ្ងន់ទាំងអស់គ្នា។
អ្នករបួសទាំងអស់ត្រូវបានគេស្គាល់ឈ្មោះ ១.ដេត សៅវិញ ភេទប្រុស អាយុ ២២ឆ្នាំ រស់នៅភូមិឃ្លាំងឃុំរីករាយ ស្រុករវៀង ខេត្តព្រះវិហា ២.ឈ្មោះ ជា ណារិទ្ធ ភេទប្រុស ស្នាក់នៅ ផ្ទះជួល ម្ដុំចោមចៅ ៣.ឈ្មោះ ដាំ ស៊ាវឡេង ភេទស្រី អាយុ៣០ឆ្នាំ ផ្ទះលេខ ១២AEZ២ ផ្លូវ១៦៦ ភូមិ១សង្កាត់អូរឫស្សី៣, ៤.អ្នកបើកបរ មិនស្គាល់ឈ្មោះ (សន្លប់) និងឈ្មោះ ជីវ គើ ភេទប្រុស ធ្វើការ នៅជិនថាវើលគ្រុប។
ក្រោយពេលកើតហេតុ ជនរងគ្រោះទាំង៥ ត្រូវបានរថយន្តសង្គ្រោះកងពលលេខ៣១ ចំនួន២គ្រឿងបានដឹកយកទៅកាន់ មន្ទីរពេទ្យបង្អែកខេត្តកំពង់ស្ពឺ ដើម្បីសង្គ្រោះបន្ទាន់ ចំណែករថយន្តកើតហេតុ ត្រូវយកទៅរក្សាទុកនៅអធិការដ្ឋាន នគរបាលស្រុកភ្នំស្រួច ដើម្បីរង់ចាំម្ចាស់ចូលមកដោះស្រាយ៕
