ភ្នំពេញ ៖ យុវជនម្នាក់ ដឹកព្រះសង្ឃទៅរៀន ត្រូវរថយន្តកុងតឺន័រ បត់ចូលក្រុមហ៊ុន ក្នុងល្បឿនលឿន ហើយអត់ស៊ីញ៉ូ បានបុកម៉ូតូខ្ទេចខាងមុខ កិនអ្នកបើកម៉ូតូបែកក្បាល ធ្លាយខួរស្លាប់ ចំណែកព្រះសង្ឃ ដែលរួមដំណើរជាមួយ មិនមានរងរបួសទេ។ ហេតុការណ៍នេះ កើតឡើងកាលពីវេលាម៉ោង៤ល្ងាច ថ្ងៃទី២ ខែឧសភា ឆ្នាំ២០១៧ នៅតាមបណ្ដោយ ផ្លូវជាតិលេខ៣ នៅមុខក្រុមហ៊ុន អេស ប៊ី អិល អាហរណ័ នីហរណ័ នឹងដឹកជញ្ជួន ភូមិពងទឹក សង្កាត់ពងទឹក ខណ្ឌដង្កោ ។
យុវជនដែលស្លាប់ មានឈ្មោះ ឱក សុផាន់ អាយុ១៧ឆ្នាំ មុខរបរនៅផ្ទះ ស្នាក់នៅភូមិព្រៃវែង សង្កាត់ពងទឹក ខណ្ឌដង្កោ ចំណែកព្រះសង្ឃ ដែលរួមដំណើរជាមួយ មានព្រះនាម ពួន សីហា ព្រះជន១៨វស្សា គង់នៅវត្តព្រៃវែង ក្នុងភូមិព្រៃវែង សង្កាត់ពងទឹក ខណ្ឌដង្កោ ។
តៃកុងរថយន្តបង្ក មិនបានស្គាល់អត្គសញាណទេ បើកបររថយន្តម៉ាក FREIGHTLINER ពណ៌ស ពាក់ស្លាកលេខភ្នំពេញ ៣C4523 ចំណែកម៉ូតូ របស់យុវជនរងគ្រោះ ម៉ាកzooMERx ពណ៌ស ពាក់ស្លាកលេខភ្នំពេញ 1-DH៤០៩៣ ។
ប្រភពព័ត៌មានពីកន្លែងកើតហេតុ បានឲ្យដឹងថា ជនរងគ្រោះមានផ្ទះ នៅក្បែរវត្តព្រៃវែង មុនពេលកើតហេតុ ព្រះសង្ឃបានពឹងឲ្យឌុបព្រះអង្គទៅរៀន ដោយជិះម៉ូតូម៉ាក zooMERx ដឹកព្រះសង្ឃមួយអង្គ ពីវត្តព្រៃវែង ទៅរៀននៅវត្តជម្ពូវន្ត បើកបរតាមផ្លូវជាតិលេខ៣ ពីត្បូងទៅជើង ចំណែករថយន្តបង្ក ជាប្រភេទរថយន្តកុងតឺន័រ របស់ក្រុមហ៊ុនអេស ប៊ី អិល អាហរណ័ នីហរណ័ នឹងដឹកជញ្ជួន បើកបរពីជើងទៅត្បូង ក្នុងទិសដៅច្រាសគ្នា ខណៈមកដល់ចំណុចកើតហេតុ រថយន្តបើកលឿន ហើយបត់ឆ្វេងចូលក្រុមហ៊ុន ដោយមិនបានស៊ីញ៉ូទេ បានបុកម៉ូតូ ខ្ទេចផ្នែកខាងមុខ កិនអ្នកបើកម៉ូតូ បែកក្បាលធ្លាយខួរស្លាប់ ចំណែកព្រះសង្ឃ ដែលរួមដំណើរជាមួយ លោតចេញពីម៉ូតូទាន់ មិនមានរងរបួសទេ ។
ក្រោយពេលកើតហេតុ រថយន្តបានបើកកិនម៉ូតូ ហើយបើកចូល ទៅក្នុងក្រុមហ៊ុនបាត់ស្រមោល រីឯតៃកុងរថយន្តរត់គេចខ្លួន ។ សពត្រូវបានគ្រួសារដឹកយកទៅធ្វើបុណ្យ តាមប្រពៃណី រីឯរថយន្តបង្ក ត្រូវបាននគរបាលចរាចរណ៍ ចូលទៅយកទៅរក្សាទុក នៅការិយាល័យនគរបាលចរាចរណ៍ រួមជាមួយម៉ូតូជនរងគ្រោះ ៕
សហការី KBN-live.com