ក្រុមចម្រៀង BLACKPINK កំពុងទទួលបានការចាប់អារម្មណ៍ជាថ្មីក្រោយមានសេចក្តីរាយការណ៍ថា ក្រុមនេះត្រូវបានជ្រើសរើសឱ្យទទួលគ្រឿងឥស្សរិយយសវប្បធម៌ពីរដ្ឋាភិបាលកូរ៉េខាងត្បូង ក្នុងឱកាសគម្រប់ខួប ១០ ឆ្នាំនៃការបង្កើតក្រុម។![]()
យោងតាមប្រព័ន្ធផ្សព្វផ្សាយកូរ៉េ បានបង្ហាញពីការទទួលស្គាល់ចំពោះស្នាដៃ និងការរួមចំណែករបស់ BLACKPINK ក្នុងការផ្សព្វផ្សាយវប្បធម៌កូរ៉េខាងត្បូងទៅកាន់ឆាកអន្តរជាតិ តាមរយៈតន្ត្រី ការសម្តែង និងឥទ្ធិពលរបស់ខ្លួនលើវិស័យកម្សាន្តពិភពលោក។សមាជិកទាំងបួនរូបរបស់ BLACKPINK បានកសាងប្រជាប្រិយភាពយ៉ាងទូលំទូលាយនៅទូទាំងពិភពលោក ចាប់តាំងពីការបង្ហាញខ្លួនជាផ្លូវការក្នុងឆ្នាំ២០១៦។ ក្រៅពីបទចម្រៀងដែលទទួលបានការគាំទ្រខ្លាំង ក្រុមនេះក៏មានឥទ្ធិពលលើវិស័យម៉ូត និងវប្បធម៌យុវវ័យអន្តរជាតិផងដែរ។
គ្រឿងឥស្សរិយយសដែលក្រុមនេះនឹងទទួលគឺគ្រឿងឥស្សរិយយសវប្បធម៌ថ្នាក់ Okgwan ដែលជាកិត្តិយសមួយរបស់កូរ៉េខាងត្បូង សម្រាប់ការរួមចំណែកដល់ការអភិវឌ្ឍ និងការផ្សព្វផ្សាយវប្បធម៌។
ពិធីប្រគល់រង្វាន់លើកទី១៧ ដែលរៀបចំឡើងដោយក្រសួងវប្បធម៌ កីឡា និងទេសចរណ៍កូរ៉េ សហការជាមួយទីភ្នាក់ងារមាតិកាច្នៃប្រឌិតកូរ៉េ ត្រូវបានគ្រោងនឹងធ្វើឡើងនៅថ្ងៃទី២៩ ខែតុលា នៅរោងមហោស្រពជាតិក្នុងទីក្រុងសេអ៊ូល។ នៅឆ្នាំនេះ បុគ្គល និងក្រុមចំនួន ៣៦ នាក់ នឹងទទួលបានមេដាយ ឬវិញ្ញាបនបត្របញ្ជាក់គុណសម្បត្តិ ដើម្បីទទួលស្គាល់ការចូលរួមចំណែករបស់ពួកគេចំពោះវប្បធម៌ពេញនិយមកូរ៉េ។
.png)
បញ្ជីឈ្មោះនេះត្រូវបានជ្រើសរើសតាមរយៈដំណើរការពិនិត្យការតែងតាំងដែលចាប់ផ្តើមនៅក្នុងខែមេសា ដោយផ្អែកលើរយៈពេលនៃការបម្រើការងារ សមិទ្ធផលទាំងក្នុងស្រុក និងអន្តរជាតិ និងការចូលរួមចំណែកដល់ឧស្សាហកម្ម និងសង្គម។ ក្នុងចំណោមនោះ បុគ្គល និងក្រុមចំនួន ១០ នាក់បានទទួលគ្រឿងឥស្សរិយយសវប្បធម៌ ៧ នាក់ទទួលបានវិញ្ញាបនបត្រគុណសម្បត្តិពីប្រធានាធិបតី ៨ នាក់ទទួលបានវិញ្ញាបនបត្រគុណសម្បត្តិពីនាយករដ្ឋមន្ត្រី និង ១១ នាក់ទទួលបានវិញ្ញាបនបត្រគុណសម្បត្តិពីរដ្ឋមន្ត្រីក្រសួងវប្បធម៌ កីឡា និងទេសចរណ៍។
គួរឱ្យដឹងថាកន្លងមក BLACKPINK ធ្លាប់ទទួលគ្រឿងឥស្សរិយយសកិត្តិយស MBE ពីព្រះមហាក្សត្រ ឆាល (King Charles) ផងដែរ៕










