Thai Airways បណ្ដេ.ញ CEO ចោល ក្រោយរងការរិះគ.ន់ពីភ្ញៀវបរទេសរឿងកកស្ទះវ៉ាលី

វិបត្តិទឹកជំនន់នៅបាងកកបានធ្វើឱ្យព្រលានយន្តហោះសុវណ្ណភូមិជួបភាពវឹកវរខ្លាំង ធ្វើឲ្យមានការលុបជើងហោះហើរ និងកកស្ទះវ៉ាលីសរបស់ភ្ញៀវបរទេសគរចោលជាង ៥,៦០០ កាបូប បានបង្ខំឲ្យក្រុមប្រឹក្សាភិបាលក្រុមហ៊ុន Thai Airways បានសម្រេចបណ្តេញលោក Chai Eamsiril ពីតំណែង CEO ភ្លាមៗ ក្រោយរងសម្ពាធយ៉ាងចាស់ដៃពីរដ្ឋមន្ត្រីក្រសួងទេសចរណ៍ថៃ។
_____________
វិបត្តិនៅព្រលានយន្តហោះសុវណ្ណភូមិក្នុងអំឡុងពេលទឹកជំនន់! ភាពវឹកវរនៃការលុបចោលជើងហោះហើរ និងរលកនៃការរិះគន់យ៉ាងចាស់ដៃពីសំណាក់ភ្ញៀវទេសចរណ៍បរទេស ជុំវិញបញ្ហាកកស្ទះវ៉ាលីសឥវ៉ាន់រាប់ពាន់កាបូប បានរុញច្រានឱ្យក្រុមហ៊ុនអាកាសចរណ៍ជាតិថៃ Thai Airways សម្រេចចិត្តកាត់ក្បាលដកតំណែងនាយកប្រតិបត្តិ (CEO) ចោលភ្លាមៗទាំងកម្រោល កាលពីថ្ងៃសុក្រ ទី២ ខែតុលា ឆ្នាំ២០២៦ នេះ។

យោងតាមការចុះផ្សាយរបស់សារព័ត៌មានអន្តរជាតិ AFP និងសារព័ត៌មានក្នុងស្រុក The Thaiger ក្រុមប្រឹក្សាភិបាលរបស់ក្រុមហ៊ុន Thai Airways បានប្រកាសបណ្តេញលោក Chai Eamsiril ចេញពីតំណែងនាយកប្រតិបត្តិ (CEO) ដោយមានប្រសិទ្ធភាពភ្លាមៗ។ ចំណាត់ការក្តៅគគុកនេះ ធ្វើឡើងបន្ទាប់ពីលោករដ្ឋមន្ត្រីក្រសួងទេសចរណ៍ និងកីឡាថៃ Surasak Phancharoenworakul បានរិះគន់ និងព្រមានឱ្យថ្នាក់ដឹកនាំក្រុមហ៊ុនចុះចេញពីតំណែង ប្រសិនបើមិនអាចដោះស្រាយវិបត្តិយឺតយ៉ាវបានទេ ព្រោះវាបាននិងកំពុងបំផ្លាញកេរ្តិ៍ឈ្មោះរបស់ប្រទេសថៃ និងជះឥទ្ធិពលអាក្រក់យ៉ាងធ្ងន់ធ្ងរដល់វិស័យទេសចរណ៍។ ទឹកជំនន់ដ៏ធំធ្ងន់ធ្ងរនៅក្នុងរាជធានីបាងកក បានធ្វើឱ្យបុគ្គលិកព្រលានយន្តហោះពាក់កណ្តាលមិនអាចធ្វើដំណើរមកធ្វើការបាន បណ្តាលឱ្យមានការលុបចោលជើងហោះហើរសរុបចំនួន ១៩ ជើង និងបន្សល់ទុកនូវវ៉ាលីសរបស់ភ្ញៀវទេសចរណ៍កកស្ទះគរចោលជាង ៥,៦០០ កាបូប នៅក្នុងព្រលានយន្តហោះអន្តរជាតិសុវណ្ណភូមិ។

ដើម្បីស្រោចស្រង់មុខមាត់ និងដោះស្រាយវិបត្តិសន្តិសុខឡូជីស្ទីកនេះជាបន្ទាន់ ក្រុមប្រឹក្សាភិបាលបានសម្រេចតែងតាំង លោក Samrit Samniang ដែលមានជំនាញខាងផ្នែកហិរញ្ញវត្ថុ និងគណនេយ្យ ឱ្យឡើងមកកាន់តំណែងជានាយកប្រតិបត្តិស្តីទី ភ្លាមៗ។ នៅក្នុងសេចក្តីថ្លែងការណ៍ដំបូង លោកនាយកប្រតិបត្តិស្តីទីថ្មី បានផ្ញើសារសុំទោសជាសាធារណៈទៅកាន់អ្នកដំណើរ និងភ្ញៀវបរទេសទាំងអស់ ព្រមទាំងបានប្តេជ្ញាចិត្តយ៉ាងមុតមាំក្នុងការកែលម្អប្រព័ន្ធគ្រប់គ្រង និងពន្លឿនការរំដោះយកកាបូបឥវ៉ាន់ដែលកកស្ទះទាំងអស់មកប្រគល់ជូនម្ចាស់វិញ។ ក្រុមហ៊ុនក៏បានអះអាងផងដែរថា ប្រតិបត្តិការ និងកាលវិភាគជើងហោះហើរទាំងអស់របស់ក្រុមហ៊ុន Thai Airways នឹងត្រូវជម្រុញឱ្យវិលត្រឡប់មក រកភាពប្រក្រតីឡើងវិញឱ្យបានពេញលេញ ចាប់ពីថ្ងៃសៅរ៍ ទី៣ ខែតុលា ឆ្នាំ២០២៦ នេះតទៅ។

វិបត្តិដកតំណែងនាយកប្រតិបត្តិរបស់ក្រុមហ៊ុន Thai Airways នាដើមខែតុលានេះ បានឆ្លុះបញ្ចាំងឱ្យឃើញពីទណ្ឌកម្មដ៏ធ្ងន់ធ្ងរ និងឆាប់រហ័សផ្នែកគ្រប់គ្រងអាជីវកម្ម ក្នុងកាលៈទេសៈដែលរងសម្ពាធពីគ្រោះធម្មជាតិ៕