RM នាំយកស្នាដៃសិល្បៈកូរ៉េរបស់ខ្លួនទៅកាន់សារមន្ទីរមួយនៅសហរដ្ឋអាម៉េរិក

RM កំពុងណែនាំស្នាដៃសិល្បៈផ្ទាល់ខ្លួនជាលើកដំបូងដោយមានស្នាដៃចំនួន១៤២ នៅឯសារមន្ទីរសិល្បៈទំនើបសាន់ហ្វ្រាន់ស៊ីស្កូ (SFMOMA) តាមរយៈការតាំងពិព័រណ៍ «RM x SFMOMA: Between You and Me»។ តារាចម្រៀងរូបនេះបានចូលរួមដោយផ្ទាល់ក្នុងការជ្រើសរើសស្នាដៃសិល្បៈ និងអភិវឌ្ឍខ្លឹមសារសម្រាប់កន្លែងតាំងពិព័រណ៍។

ការតាំងពិព័រណ៍នេះនឹងបើកចាប់ពីថ្ងៃទី ៣ខែតុលា ដល់ថ្ងៃទី ៧ ខែកុម្ភៈ នៃឆ្នាំ២០២៧ មានស្នាដៃចំនួន ១៧៨ រួមទាំង ១៤២ ពីការប្រមូលផ្ទាល់ខ្លួនរបស់ RM និង ៣៦ ពី សារមន្ទីរសិល្បៈទំនើបសាន់ហ្វ្រាន់ស៊ីស្កូ ។ នេះគឺជាលើកទីមួយហើយដែលការប្រមូលផ្ទាល់ខ្លួនរបស់មេដឹកនាំក្រុម BTS ត្រូវបានដាក់តាំងបង្ហាញនៅក្នុងការតាំងពិព័រណ៍មួយនៅសារមន្ទីរអាម៉េរិក។

RM បានបម្រើការជាអ្នករៀបចំពិព័រណ៍រួមគ្នាដោយចូលរួមក្នុងដំណាក់កាលផ្សេងៗនៃដំណើរការ ចាប់ពីការជ្រើសរើស និងរៀបចំស្នាដៃសិល្បៈ រហូតដល់ការបង្កើតខ្លឹមសារណែនាំ។ លោកក៏បានថតការនិទានរឿងជាភាសាកូរ៉េ និងភាសាអង់គ្លេសដោយផ្ទាល់ ហើយបានចូលរួមចំណែកក្នុងការជ្រើសរើសតន្ត្រីផ្ទៃខាងក្រោយសម្រាប់ការតាំងពិព័រណ៍ផងដែរ។
ការប្រមូលផ្ដុំរបស់ RM ផ្តោតជាចម្បងលើសិល្បៈកូរ៉េ ចាប់ពីស្នាដៃប្រពៃណី រហូតដល់ស្នាដៃសម័យទំនើប និងសហសម័យ។ ប្រធានបទដែលធ្លាប់ស្គាល់នៅក្នុងដំណើរប្រមូលផ្ដុំរបស់តារាចម្រៀងរូបនេះ ដូចជាធម្មជាតិ មនុស្ស ជីវិត និងការចងចាំ ក៏ត្រូវបានឆ្លុះបញ្ចាំងនៅក្នុងការរៀបចំស្នាដៃសិល្បៈផងដែរ។
ការតាំងពិព័រណ៍នេះត្រូវបានបែងចែកជា៨ផ្នែក ដែលស្នាដៃពីការប្រមូលផ្ដុំរបស់ RM ត្រូវបានដាក់នៅជាប់នឹងស្នាដៃពីការប្រមូលផ្ដុំ SFMOMA។ ការរៀបចំនេះបង្កើតទំនាក់ទំនងរវាងសិល្បៈកូរ៉េ និងស្នាដៃរបស់វិចិត្រករអន្តរជាតិ។

ចំណុចលេចធ្លោគួរឱ្យកត់សម្គាល់មួយគឺស្នាដៃចំនួន ១៦ របស់ Yun Hyong Keun ដែលជាវិចិត្រករម្នាក់ដែល RM បានបង្ហាញចំណាប់អារម្មណ៍យ៉ាងខ្លាំង។ ការតាំងពិព័រណ៍នេះក៏មានស្នាដៃរបស់ Lee Seong Ja, Park Rae Hyun, Choi Wook Kyung និង Kim Yun Shin ផងដែរ។ ស្នាដៃមួយចំនួនរបស់វិចិត្រករកូរ៉េត្រូវបានដាក់រួមជាមួយស្នាដៃរបស់វិចិត្រករអន្តរជាតិផ្សេងទៀត។ RM ធ្លាប់បានចែករំលែកថា ការប្រមូលស្នាដៃសិល្បៈផ្ដល់ឱ្យលោកនូវវិធីមួយផ្សេងទៀតដើម្បីភ្ជាប់ទំនាក់ទំនងជាមួយនឹងរបស់ដែលលោកខ្វល់ខ្វាយ។ តារាចម្រៀងរូបនេះបាននិយាយថាទោះបីជាតន្ត្រី និងសិល្បៈប្រើប្រាស់សម្ភារៈខុសគ្នាក៏ដោយក៏ទាំងពីរមានគោលបំណងបង្ហាញអារម្មណ៍ និងសារផងដែរ។

ការតាំងពិព័រណ៍នេះក៏បន្តកិច្ចខិតខំប្រឹងប្រែងរបស់ RM ក្នុងការផ្សព្វផ្សាយវប្បធម៌កូរ៉េផងដែរ។ កាលពីខែមិថុនា លោកត្រូវបានតែងតាំងជាទូតសុច្ឆន្ទៈសកលសម្រាប់សារមន្ទីរជាតិកូរ៉េ។ តារាចម្រៀងរូបនេះក៏បានបរិច្ចាគប្រាក់ចំនួន១០០លានវ៉ុនដល់សារមន្ទីរដើម្បីគាំទ្រការទិញ និងការបន្ថែមវត្ថុបុរាណទៅក្នុងការប្រមូលផ្ដុំ។ ការតាំងពិព័រណ៍នេះជាលើកដំបូងដែលការប្រមូលផ្ដុំសិល្បៈផ្ទាល់ខ្លួនរបស់សិល្បករ K-pop ត្រូវបានដាក់តាំងបង្ហាញនៅក្នុងសារមន្ទីរមួយនៅសហរដ្ឋអាម៉េរិក៕