អ្នកគាំទ្ររំភើបចិត្តក្រោយឃើញ រ៉ាប៊ី ជួបជាមួយនឹង Bosco Wong

តារាចម្រៀង រ៉ាប៊ី បានធ្វើឱ្យអ្នកគាំទ្រមានការរំភើបចិត្តយ៉ាងខ្លាំងនៅពេលឃើញរូបនាងបានជួបនឹងតារាសម្តែងហុងកុង Bosco Wong នៅឯប្រទេសម៉ាឡេស៊ីក្នុងកម្មវិធីមួយ។ តារាប្រុសរូបនេះមានប្រជាប្រិយភាពយ៉ាងខ្លាំងនៅក្នុងប្រទេសកម្ពុជាដោយមានរហ័សនាមថា «បុរសខ្មឺត»។

ជឿជាក់ថាអ្នកដែលតាមដានរឿងភាគរបស់ TVB ប្រាកដជាស្គាល់ Bosco Wong មិនខានពីព្រោះលោកបានសាងភាពល្បីល្បាញតាមរយៈខ្សែភាពយន្តជាច្រើនហើយចុងក្រោយនេះគឺភាពល្បីល្បាញនៃខ្សែភាពយន្ត «រាជិនីសារព័ត៌មាន វគ្គ ២» (The Queen of News 2)។ ជាមួយគ្នានេះ រ៉ាប៊ី បានធ្វើឱ្យអ្នកគាំទ្ររំជើបរំជួលនៅពេលតារាចម្រៀងរូបនេះបានជួបជាមួយនឹង Bosco Wong ព្រមទាំងបានថតរូបជាមួយគ្នា។

តាមរយៈការបង្ហោះរបស់ រ៉ាប៊ី នៅលើបណ្តាញសង្គមនៅយប់ថ្ងៃទី២តុលា នាងបានបង្ហោះវីដេអូជាមួយនឹង Bosco Wong ដោយភ្ជាប់មកជាមួយនឹងចំណងជើងខ្លីថា «មករួមការងារជាមួយតួហុងកុង TVB នៅ Malaysia»។ បន្ទាប់ពីវីដេអូនេះត្រូវបានចែកចាយនៅលើអ៊ីនធឺណិតមានអ្នកគាំទ្រជាច្រើនបានបង្ហាញការរំភើបចិត្តនិងច្រណែន រ៉ាប៊ី ជាខ្លាំងដែលនាងមានឱកាសជួបតារាក្នុងដួងចិត្តរបស់ពួកគេ។ កន្លងមកនេះ រ៉ាប៊ី ក៏ធ្លាប់ជួបជាមួយនឹងតារាចម្រៀង Jay Park ផងដែរដែលធ្វើឱ្យទស្សនិកជនមានការចាប់អារម្មណ៍មិនតិចនោះទេ។

ជំនួបដ៏គួរឱ្យចាប់អារម្មណ៍នេះបានធ្វើឱ្យអ្នកគាំទ្ររំភើបជាពិសេស ព្រោះ Bosco Wong គឺជាតារាហុងកុងមួយរូបដែលមានប្រវត្តិសម្តែងជាច្រើនឆ្នាំ និងធ្លាប់បង្ហាញខ្លួនក្នុងរឿងភាគល្បីៗរបស់ TVB ជាច្រើន។ លោកក៏ជាតារាសម្ដែង និងជាតារាចម្រៀងដែលមានអ្នកគាំទ្រនៅតំបន់អាស៊ីផងដែរ។

ទោះបីជាប្រឡូកក្នុងអាជីពសិល្បៈច្រើនឆ្នាំនិងជោគជ័យលើការងារមកទល់នឹងវ័យ៤៥ឆ្នាំ Bosco Wong ពុំទាន់រៀបការកសាងគ្រួសារនៅឡើយទេទាំងដែលអតីតមិត្តស្រី ឬអ្នកសិល្បៈផ្សេងទៀតគេរៀបការជាច្រើនគូមកហើយ។ ការដែលទុកខ្លួនឱ្យនៅទំនេរមិនមានចំណងប្រាំប្រការនេះទើបបានជាធ្វើឱ្យអ្នកគាំទ្រកម្ពុជាបានហៅលោកថាជា «បុរសខ្មឺត»៕