ក្នុងឈុតស្បៃខ្មែរ ពេជ្រ វត្តីសារ៉ាវឌ្ឍី បញ្ជាក់កាន់តែច្បាស់ក្រោយជនបរទេសច្រឡំថាជារបស់ផ្ទះលេខ២

ពេលនេះជនបរទេសកាន់តែច្បាស់បន្ថែមទៀតបន្ថយការយល់ច្រឡំអំពីឈុតប្រពៃណីខ្មែរ ជាពិសេសគឺឈុតស្បៃខ្មែរដែលមានជនបរទេសមួយចំនួនយល់ច្រឡំថាជារបស់ថៃបន្ទាប់ពី ពេជ្រ វត្តីសារ៉ាវឌ្ឍី និង មាលា បញ្ជាក់ទៅកាន់ស្រ្តីជាជនបរទេសថាជា«របស់ខ្មែរ»។ ទន្ទឹមនឹងស្រ្តីជាជនបរទេសយល់ច្រឡំគេសង្កេតឃើញថាជនបរទេសដែលជាបុរសក្បែរនោះបានដឹងថាឈុតនេះគឺជាឈុតរបស់ខ្មែរ ហើយលោកក៏បង្ហាញពីការស្រលាញ់ចូលចិត្តប្រទេសកម្ពុជាផងដែរ។

ដូចប្រិយមិត្តដែលតាមដានបណ្តាញសង្គមជ្រាបមកហើយថាតារាម៉ូដែល មាលា និង បវរកញ្ញា ពេជ្រ វត្តីសារ៉ាវឌ្ឍី បានបង្ហាញពីឈុត «ស្បៃខ្មែរ» នៅឯប្រទេសបារាំងម្តុំ Eiffel Tower ដែលប្រមូលផ្តុំដោយទេសចរចម្រុះជាតិសាសន៍។ អ្នកទាំងពីរបានធ្វើឱ្យជនបរទេសចាប់អារម្មណ៍មិនតិចនោះទេក្នុងឈុតដ៏ស្រស់ស្អាតនិងផូរផង់នេះ។

អ្វីដែលកាន់តែធ្វើឱ្យផ្ទះលេខ២ឆេះឆួល ពេជ្រ វត្តីសារ៉ាវឌ្ឍី បានចែករំលែកវីដេអូមួយនាយប់ថ្ងៃទី១ ខែតុលា ដោយគេបានឃើញមានស្រ្តីជាជនបរទេសបានសួរ មាលា និង ពេជ្រ វត្តីសារ៉ាវឌ្ឍី ថានេះគឺជាឈុតថៃ យ៉ាងណា ប៉ុន្តែត្រូវបានអ្នកទាំងពីរបដិសេធដោយអះអាងថានេះគឺជារបស់និងប្រពៃណីកម្ពុជា ស្របពេលជនបរទេសជាបុរសនៅក្បែរនោះក៏បានប្រាប់ស្រ្តីនោះដែរថាគឺ «ឈុតកម្ពុជា»។

ក្រោយពីទទួលបានចម្លើយថាជាសំលៀកបំពាក់ប្រពៃណីវប្បធម៌របស់ប្រទេសកម្ពុជាស្រ្តីរូបនោះក៏បានថតរូបអ្នកទាំងពីរខណៈបុរសជាជនបរទេសបានបង្ហាញអារម្មណ៍រំភើបចិត្តដែលបានថតរូបជាមួយនឹង មាលា និង ពេជ្រ វត្តីសារ៉ាវឌ្ឍី ហើយលោកក៏បានបង្ហាញថាលោកស្រលាញ់ប្រទេសកម្ពុជាផងដែរ។

ស្របពេលវីដេអូនេះបានរីកសាយភាយនៅលើបណ្តាញសង្គមរបស់ ពេជ្រ វត្តីសារ៉ាវឌ្ឍី បានជំរុញឱ្យអ្នកគាំទ្រកម្ពុជាពេញចិត្តយ៉ាងខ្លាំង ខណៈអ្នកលេងបណ្តាញសង្គមផ្ទះលេខ២អមដោយអារម្មណ៍ខឹងសម្បារនិងចូលមកបញ្ចេញមតិយោបល់លើការបង្ហោះរបស់នាងដោយនិយាយប្រឌិតថាជាសំលៀកបំពាក់របស់ថៃ។ ឃើញថៃចូលមកខម្មិនយ៉ាងច្រើនមិនស្គាល់របស់ពិត ពេជ្រ វត្តីសារ៉ាវឌ្ឍី បានតបវិញយ៉ាងត្រជាក់ថា «រៀនតែប្រវត្តិសាស្រ្តក្លែងក្លាយគឺតែប៉ុណ្ណឹងឯង»។

គួរឱ្យដឹងថា ពេជ្រ វត្តីសារ៉ាវឌ្ឍី និងមាលា នឹងបង្ហាញខ្លួនក្នុងកម្មវិធី Paris Fashion Week សម្រាប់ម៉ាកយីហោកូនខ្មែរផងដែរ៕