វីតូ និង វណ្ណដា ចេញបទថ្មីស្រាប់តែមានគណនីមួយលើកឡើងថា វណ្ណដា ច្រៀងតែពី «លុយ»

បន្ទាប់ពីពន្យារពេលក្នុងការចេញផ្សាយអាចដោយសារតែភាពចម្រូងចម្រាសជីវិតឯកជនរបស់ វណ្ណដា ពេលនេះបទចម្រៀង «ដៃថ្មី» របស់ វីតូ ដែលសហការជាមួយនឹងតារារ៉េបរូបនេះបានចេញផ្សាយជាផ្លូវការហើយ។ ទន្ទឹមនឹងការរីករាយនិងជក់ចិត្តក្នុងការស្តាប់បទថ្មីនិងមានមតិយោបល់វិជ្ជមានជាច្រើនពីអ្នកគាំទ្រ គេស្រាប់តែឃើញគណនីមួយបានចូលទៅបញ្ចេញមតិដោយបង្ហាញថា វណ្ណដា បច្ចុប្បន្នច្រៀងលើកតម្កើនតែពី «លុយ» ដោយចង់ឱ្យតារារ៉េបរូបនេះផ្លាស់ប្តូរបារ៉ូលបែបនេះចេញពីព្រោះមិនចង់ឱ្យ វណ្ណដា ធ្លាក់កូដ។

នាវេលាម៉ោង៧យប់ថ្ងៃទី៣០ ខែកញ្ញា បទ«ដៃថ្មី» ដែលជាការសហការលើកដំបូងរបស់ វីតូ និង វណ្ណដា បានចេញផ្សាយហើយបន្ទាប់ពីធ្លាប់សម្តែងនៅក្នុងការប្រគំតន្រ្តីកន្លងមកនិងមានការពន្យារពេលម្តងជាពីរដងមក។ អ្នកគាំទ្របានបញ្ចេញមតិប្រតិកម្មជាច្រើន ខណៈអត្ថន័យបទមួយនេះទាំង វីតូ និង វណ្ណដា បានលើកឡើងពីផ្នែករបស់ខ្លួននៅក្នុងវិស័យតន្រ្តីនិងអ្វីដែលពួកគេជួបប្រទះកន្លងមក។

ទន្ទឹមនឹងការចូលចិត្តពីសំណាក់អ្នកគាំទ្រជាច្រើនទៅលើបទ «ដៃថ្មី» របស់ វីតូ និង វណ្ណដា គេស្រាប់តែឃើញគណនីមួយចូលបញ្ចេញមតិថាចុងក្រោយនេះ វណ្ណដា ច្រៀងលើកឡើងតែពី «លុយ»។ គណនីនោះបានសរសេរថា «អត្ថន័យVD អីឡូវមេចក៏ដដែលចឹង និយាយតែលុយ only ពីfan ម្នាក់ដែលមិនចង់អោយVDធ្លាក់កូត ស្នើឱ្យ VDកាត់បន្ថយអត្ថន័យដដែលចោលខ្លះដដែលគ្រប់បទ១រយៈចុងក្រោយនេះ»។ មិនត្រឹមតែមានការបញ្ចេញមតិនៅលើហ្វេកប៊ុកប៉ុណ្ណោះទេប៉ុន្តែគណនីនេះហាក់ដូចជាបានបញ្ចេញមតិនៅលើឆាណែលយូធូបរបស់ វីតូ ផងដែរ។

បន្ទាប់ពីគណនី «ចាន់ សុភាព» បញ្ចេញមតិខាងលើនេះគេបានឃើញគណនីអ្នកគាំទ្រផ្សេងទៀតបានចូលទៅឆ្លើយឆ្លងជាច្រើនបានបង្ហាញថានេះជាទម្រង់នៃបទចម្រៀងរ៉េបដែលមានលក្ខណៈ Hype ដូច្នេះការច្រៀងពីសម្ភារៈនិយម ឬអួតអាងជារឿងធម្មតា។ មតិផ្សេងទៀតក៏បានជំរុញឱ្យគណនីនេះស្តាប់បទផ្សេងដែលមានអត្ថន័យលើកឡើងទឹកចិត្ត។

ទោះយ៉ាងណាមតិភាគច្រើនបានបង្ហាញការគាំទ្រចំពោះស្នាដៃថ្មីរបស់តារាចម្រៀង វីតូ និង វណ្ណដា ដោយមានអ្នកគាំទ្រខ្លះថែមទាំងចង់ឱ្យបទនេះមាន MV ទៀតផង៕