បវរកញ្ញា លីវ ជីលី និងនារីម្នាក់ដែលធ្លាប់បំពាក់មកុដនៅក្នុងកម្មវិធីបវរកញ្ញាបានធ្វើឱ្យមានមតិវែកញែកយ៉ាងក្តៅគគុកបន្ទាប់ពី លីវ ជីលី ចោទប្រកាន់និងទាមទារថ្លៃកម្លាំងពលកម្មសម្រាប់ការឡើងច្រៀងរបស់នាងនៅក្នុងក្លិបកម្សាន្ត។ យ៉ាងណានារីរូបនេះបានប្រកែកថាមិនបានអញ្ជើញ ជីលី ឡើងច្រៀងនោះទេ ខណៈចោទនាងវិញថាជាមនុស្ស «ពូកែសុំខ្លាំងជាងអ្នកសុំទានទៅទៀត»។
នៅយប់ថ្ងៃទី៣០ ខែកញ្ញា លីវ ជីលី បានបង្ហោះសារមួយថា «យាយម្នាក់ធ្លាប់ពាក់លីអូបំពាក់មកុដចង់ល្បី»។ មុននឹងការបង្ហោះនេះ ជីលី ហាក់ដូចជាបង្ហោះសំណេរមួយទាក់ទងនឹងការមិនទាន់ទទួលបានកម្រៃនៃការច្រៀងរបស់នាង។ ក្រោយពីបង្ហោះសំណេរខាងលើនេះគណនីមួយមានឈ្មោះថា «Julie Hoeung »(ជូលី ហឿង) បានចេញមកបដិសេធការចោទប្រកាន់ខាងលើនេះនិងបានចោទ ជីលី វិញថាជាអ្នកមកសុំច្រៀងដោយខ្លួនឯង។
ម្ចាស់ប្រ៊េនរូបនេះបានខម្មិននៅក្រោមការបង្ហោះរបស់ លីវ ជីលី ថា «តារាអើយសុំគេច្រៀងងូចៗដូច សុនក (ឆ្កែ) គេឱ្យច្រៀងហើយទាំងដែលគេមិនចង់ឱ្យច្រៀងផងហើយមកចង់បានលុយគេអត់ខ្មាសអៀន តម្លៃតារាថោកព្រោះតែទង្វើ។ ត្រូវចាំថាក្រុមខ្លួនជាអ្នកសុំគេច្រៀងងូចៗសោះ សុំគេចេញថ្លៃ hotel ហើយនៅរមើលគុណគេទៀត»។
ក្រោយមកគណនីនេះបាន Screenshot ការបង្ហោះរបស់ លីវ ជីលី ដោយបានបង្ហោះចោទប្រកាន់ទៅកាន់បវរកញ្ញារូបនេះវិញថា «បវរកញ្ញា ជីលី ទេវី យកលេសស្បៃខ្មែរ តែធ្វើអំពើខុសច្បាប់របស់វីសាប្រទេសកូរ៉េ វីសាដើរលេងរបស់ប្រទេសកូរ៉េគឺមិនមានសិទ្ធិលួចរកលុយក្រៅបានទេ តែបវរកញ្ញារូបនេះបានប្រព្រឹត្តិខុសច្បាប់ដូចនេះហើយសូមកុំយកស្បៃខ្មែរមកពាក់ព័ន្ធជាមួយទង្វើខុសច្បាប់របស់បវរកញ្ញារូបនេះ។ ស្ថានទូតបានដឹងលឺអំពីទង្វើខុសច្បាប់របស់បវរកញ្ញារូបនេះរួចហើយ មូលហេតុបវរកញ្ញារូបនេះ មកសុំគេច្រៀងងូចៗ »។ គណនី Julie Hoeung ចោទ លីវ ជីលី ថាជាមនុស្សពូកែសុំខ្លាំងជាងអ្នកសុំទានទៅទៀត និងបានអះអាងថាទោះបីជាខ្លួនមិនល្បីប៉ុន្តែមានលុយចាយពេញៗដៃមិនដូចជាបវរកញ្ញាខ្លះល្បីតែធាតុពិតចង់បានលុយគេឥតខ្មាស។
ក្រោយមក លីវ ជីលី បានបង្ហោះសំណេរមួយផ្សេងទៀតដោយបញ្ជាក់ថានាងមិនបានទៅសុំខាងក្លិបឡើងច្រៀងនោះទេពីព្រោះនាងមានតម្លៃសម្រាប់ខ្លួនឯងដោយក្រុមការងារជាអ្នកទាក់ទងអញ្ជើញនាងឡើងច្រៀងជាក្រុមជាមួយនឹងសិល្បករផ្សេងទៀតទើបនាងព្រមទទួលការងារនោះ ដូច្នេះនាងទាមទារតែតម្លៃការងារនាងប៉ុណ្ណោះមិនបានស្រេកឃ្លានលុយដូចការលាបពណ៌ឡើយ។ លីវ ជីលី ថាគណនីខាងលើនេះតាមខាំនាងមិនព្រមលែងដោយសារតែចង់ល្បីប៉ុន្តែមនុស្សមានកិត្តិយសដូចនាងមិនចង់ជ្រលក់មាត់ឈ្លោះជាមួយមនុស្សប្រភេទនេះទេឱ្យឆ្កួតតែម្នាក់ឯងទៅ»៕
