Kim Ji Won បង្ហើបថា Daesung ជាអ្នកអញ្ជើញនាងឱ្យទៅចូលរួមការប្រគំតន្ត្រីរបស់ BIGBANG

ជាមនុស្សដែលអ្នកគាំទ្រចាត់ទុកថាស្ងប់ស្ងាត់ពុំសូវបង្ហាញសកម្មភាពសូម្បីតែការបង្ហោះរូបនៅលើបណ្តាញសង្គមតារាសម្តែង Kim Ji Won បានធ្វើឱ្យអ្នកគាំទ្រភ្ញាក់ផ្អើលមិនតិចនោះនាកន្លងមកនេះបន្ទាប់ពីបង្ហាញខ្លួននៅក្នុងការប្រគំតន្រ្តីរបស់ BIGBANG Jennie រួមទាំង Aespa ផងដែរ។ នាពេលថ្មីៗនេះ Ji Won ក៏បានបង្ហាញពីហេតុផលរបស់ខ្លួនសម្រាប់ការចូលរួម ការប្រគំតន្រ្តីរបស់សិល្បករទាំងនេះ។

នៅក្នុងកម្មវិធីមួយ Kim Ji Won តួឯកស្រីក្នុងរឿង «Queen of Tears» បានបង្ហើបថា នាងបានចូលរួមការប្រគំតន្ត្រីខួបលើកទី ២០ របស់ BIGBANG តាមការអញ្ជើញរបស់ Daesung ។ អ្នកទាំងពីរបានស្គាល់គ្នាអស់រយៈពេលប្រហែល១៥ ឆ្នាំមកហើយចាប់តាំងពីបានធ្វើការជាមួយគ្នាក្នុងខ្សែភាពយន្តមួយ។ Kim Ji Won និង Daesung បានសម្តែងជាមួយគ្នាក្នុងរឿង «What’s Up» នៅពេលនាងមានអាយុប្រហែល ១៩-២០ឆ្នាំ។ បន្ទាប់ពីរឿងភាគនេះបានបញ្ចប់ ពួកគេនៅតែទាក់ទងគ្នា ទោះបីជាមិនញឹកញាប់ក៏ដោយ។

មិនត្រឹមតែនាងបានចូលរួមការប្រគំតន្ត្រីរបស់ BIGBANG ប៉ុណ្ណោះទេ Kim Ji Won ក៏បានទៅមើលការប្រគំតន្ត្រីរបស់ Aespa ផងដែរ។ តារាស្រីរូបនេះបាននិយាយថា នាង និងសមាជិក Aespa ទាំងអស់សុទ្ធតែបានធ្វើខ្លួននៅហាងសាឡនដូចគ្នា ដែលនាំឱ្យនាងស្គាល់ពួកគេ និងត្រូវបានអញ្ជើញឱ្យទៅទស្សនាការប្រគំតន្ត្រីរបស់ពួកគេ។

Kim Ji Won ក៏បានចូលរួមការប្រគំតន្ត្រីរបស់ Jennie សមាជិក Blackpink ផងដែរ។ ការអញ្ជើញនេះបានមកពីការភ្ជាប់ទំនាក់ទំនងនៅហាងកាត់សក់ និងផាត់មុខមួយ។ តារាស្រីរូបនេះបាននិយាយថា នាងឱ្យតម្លៃចំពោះឱកាសបែបនេះ ព្រោះវាជាឱកាសដើម្បីរីករាយនឹងការសម្តែងដោយផ្ទាល់ដោយសិល្បករដែលនាងចូលចិត្ត។

ទោះបីជាមានឱកាសជួបជាមួយសិល្បករជាច្រើនក៏ដោយក៏ Kim Ji Won មិនបានរក្សាទំនាក់ទំនងផ្ទាល់ខ្លួនបន្ទាប់ពីការប្រគំតន្ត្រីនោះទេ។ នាងបាននិយាយថា នាងមិនប្តូរលេខទូរសព្ទទេ ប៉ុន្តែជាធម្មតានាងមើលកម្មវិធីពីចម្ងាយ សរសើរសិល្បករ ហើយបន្ទាប់មកត្រឡប់ទៅផ្ទះវិញ។ របៀបដែលនាងរីករាយនឹងការសម្តែងទាំងនេះក៏ឆ្លុះបញ្ចាំងពីបុគ្គលិកលក្ខណៈដែលតារាសម្តែងរូបនេះបានចែករំលែកនៅក្នុងកម្មវិធីផងដែរ។

Kim Ji Won បាននិយាយថានាងជាមនុស្សដែលចូលចិត្តនៅម្នាក់ឯង ហើយមានទំនោររក្សាអារម្មណ៍របស់នាងទុកសម្រាប់ខ្លួនឯង។ សូម្បីតែពេលដែលនាងចង់ស្និទ្ធស្នាលជាមួយនរណាម្នាក់ក៏ដោយ នាងបង្ហាញអារម្មណ៍របស់នាងបានត្រឹមតែប្រហែល ៣០% ប៉ុណ្ណោះ៕