តារាសម្តែង ស៊ីន យូប៊ីន នៅតែបន្តចូលរួមក្នុងសកម្មភាពសង្គមយ៉ាងសកម្ម។ថ្មីៗនេះនាងបានចូលរួមជាមួយយុទ្ធនាការ «ភ្នែកល្អ ជីវិតល្អ» របស់មន្ទីរពេទ្យកុមារអង្គរដែលប្រព្រឹត្តទៅរយៈពេល ៤ សប្តាហ៍ ចាប់ពីថ្ងៃទី២៨ ខែកញ្ញា ដល់ថ្ងៃទី២៣ ខែតុលា ឆ្នាំ២០២៦។
កន្លងមក ស៊ីន យូប៊ីន បានចូលរួមក្នុងសកម្មភាពសង្គមជាច្រើន។ កាលពីខែមិថុនា កន្លងទៅនាងត្រូវបានតែងតាំងជាទូតសុច្ឆន្ទៈជាតិដំបូងរបស់អង្គការយូនីសេហ្វប្រចាំប្រទេសកម្ពុជា។ តារាសម្តែងរូបនេះក៏បានចុះទៅកាន់សាលារៀន មណ្ឌលសុខភាព និងតំបន់ដាច់ស្រយាលនានា ដើម្បីសួរសុខទុក្ខ និងនាំយកសម្ភារសិក្សា ទឹកស្អាត និងអាហារូបត្ថម្ភទៅផ្តល់ជូនកុមារ និងគ្រួសារដែលភៀសសឹក។ ក្រៅពីនេះនាងក៏ធ្លាប់ចូលរួមក្នុងយុទ្ធនាការរបស់មន្ទីរពេទ្យគន្ធបុប្ផាផងដែរ។
សកម្មភាពការងារសង្គមរបស់ ស៊ីន យូប៊ីន នៅតែបន្តជាបន្តបន្ទាប់។ថ្មីៗនេះនាងបានក្លាយជាទូតសុច្ឆន្ទៈផ្លូវការសម្រាប់យុទ្ធនាការ «ភ្នែកល្អ ជីវិតល្អ» របស់មន្ទីរពេទ្យកុមារអង្គរ។ នៅល្ងាចថ្ងៃទី៣០ ខែកញ្ញា ស៊ីន យូប៊ីន បានបង្ហោះវីដេអូមួយដើម្បីផ្សព្វផ្សាយអំពីយុទ្ធនាការប្រចាំឆ្នាំរបស់មន្ទីរពេទ្យនិងអំពាវនាវដល់សប្បុរសជននានា ចូលរួមជាមួយនាងក្នុងការគាំទ្រការពិនិត្យ ព្យាបាល និងថែទាំភ្នែករបស់កុមារនៅកម្ពុជា។
មន្ទីរពេទ្យកុមារអង្គរ ក៏បានលើកឡើងថាចំនួនកុមារដែលមកស្វែងរកសេវាពិនិត្យ និងព្យាបាលជំងឺភ្នែកមានការកើនឡើងពីមួយឆ្នាំទៅមួយឆ្នាំ។ ដោយហេតុនេះ មន្ទីរពេទ្យបានរៀបចំយុទ្ធនាការផ្សព្វផ្សាយ និងរៃអង្គាសថវិកា ដើម្បីគាំទ្របន្ថែមដល់សេវាពិនិត្យ ព្យាបាល និងថែទាំសុខភាពភ្នែករបស់កុមារ។
តាមការលើកឡើងរបស់ ស៊ីន យូប៊ីន ក្នុងមួយឆ្នាំ មន្ទីរពេទ្យបានផ្តល់សេវាពាក់ព័ន្ធនឹងសុខភាពភ្នែកដល់កុមារប្រមាណ ១៥,០០០ នាក់។ ទោះជាយ៉ាងណា កុមារប្រមាណ ៤០ ភាគរយនៅតែមិនអាចទទួលបានសេវាដែលពួកគេត្រូវការដោយសារឧបសគ្គផ្សេងៗ ដូចជាកង្វះឧបករណ៍ និងថវិកាសម្រាប់ការវះកាត់។
ក្នុងនាមជាទូតសុច្ឆន្ទៈ ស៊ីន យូប៊ីន បានអំពាវនាវឱ្យប្រជាពលរដ្ឋចូលរួមគាំទ្រមន្ទីរពេទ្យកុមារអង្គរ តាមលទ្ធភាពរៀងៗខ្លួន មិនថាតាមរយៈការបរិច្ចាគថវិកា ការចែករំលែកព័ត៌មានអំពីយុទ្ធនាការនៅលើបណ្តាញសង្គម ឬការផ្តល់មតិយោបល់ និងការគាំទ្រល្អៗចំពោះយុទ្ធនាការ «ភ្នែកល្អ ជីវិតល្អ»៕
