ក្រុមឧទ្ទាមភាគខាងត្បូងថៃបង្កចលាចលកាន់ខ្លាំង ចំពេលប្រទេសកំពុងវឹកវរនឹងទឹកជំនន់

ខណៈពេលដែលរដ្ឋាភិបាលទីក្រុងបាងកកកំពុងជាប់ដៃដោះស្រាយវិបត្តិទឹកជំនន់ដ៏ធំធ្ងន់ធ្ងរ ដែលលិចលង់ខេត្តជាង ៤០ និងប៉ះពាល់ពលរដ្ឋជាង ២.៥ លាននាក់ នៅភាគខាងត្បូងឯណោះ ក្រុមឧទ្ទាមផ្ដាច់ខ្លួនបានឆ្លៀតឱកាសបំផ្ទុះគ្រា.ប់បែ.កកែច្នៃ និងដុតបំផ្លាញរថយន្តដឹកទំនិញធុនធំទាំងកណ្តាលអាធ្រាត្រ បង្កការវឹកវរទ្វេដង!
___________
ខណៈពេលថៃភាគកណ្ដាល ខាងកើត និងខាងជើងកំពុងលិចទឹក ថៃភាគខាងត្បូងឯណោះ កំពុងស្ថិតក្នុងស្ថានភាពអសន្តិសុខយ៉ាងគួរឲ្យបារម្ភ ដោយក្រុមឧទ្ទាមបំបែករដ្ឋ បានបង្កើនសកម្មភាពវាយប្រហារប្រដាប់អាវុធ និងបង្កចលាចលរបស់ពួកគេកាន់តែខ្លាំងឡើង ធ្វើឲ្យរដ្ឋាភិបាលទីក្រុងបាងកក ត្រូវប្រឈមមុខនឹងសម្ពាធវិបត្តិពីរមុខព្រួញក្នុងពេលតែមួយយ៉ាងធ្ងន់ធ្ងរបំផុត។

យោងតាមការចុះផ្សាយរបស់សារព័ត៌មានរដ្ឋថៃ Thai PBS World គិតត្រឹមថ្ងៃទី ៣០ ខែកញ្ញា ឆ្នាំ២០២៦ ហេតុការណ៍បំផ្ទុះគ្រាប់បែក និងអំពើហិង្សាបែបភេរវកម្ម នៅតែបន្តកើតមានឡើងគួរឱ្យតក់ស្លុត។ ជាក់ស្តែង កាលពីវេលាម៉ោង ១២:១០ នាទីយប់រំលងអធ្រាត្រ ឈានចូលថ្ងៃទី ៣០ ខែកញ្ញា ក្រុមសង្ស័យប្រដាប់អាវុធពាក់ម៉ាសបិទមុខប្រមាណ ៦ ទៅ ៧ នាក់ បានធ្វើសកម្មភាពបំផ្ទុះគ្រាប់បែកច្នៃ (IED) ទម្ងន់ ១០ គីឡូក្រាម នៅពីមុខផ្សារទំនើប Sri Samai Superstore ក្នុងស្រុក Nong Chik ខេត្តប៉ាតានី។ មិនត្រឹមតែប៉ុណ្ណោះ ក្រុមឧទ្ទាមបានដុតបំផ្លាញរថយន្តដឹកទំនិញធុនធំ ១០ កង់មួយគ្រឿងបណ្តាលឱ្យឆេះសន្ធោសន្ធៅ ព្រមទាំងបានដុតបំផ្លាញកាមេរ៉ាសុវត្ថិភាព និងព្រង្រាយដែកគោលច្នៃពេញផ្លូវជាតិខ្សែ ប៉ាតានី-ហាត់យ៉ៃ ដើម្បីទប់ស្កាត់ការតាមប្រមាញ់របស់សមត្ថកិច្ច។ ទោះបីជាមិនមានមនុស្សស្លាប់ តែវាបានដុតបំផ្លាញទ្រព្យសម្បត្តិសាធារណៈ និងបង្កការភ័យខ្លាចជាខ្លាំងដល់ពលរដ្ឋក្នុងតំបន់។

សកម្មភាពបះបោរដ៏គគ្លើនរបស់ក្រុមផ្ដាច់ខ្លួនភាគខាងត្បូងនាពេលនេះ គឺកំពុងឆ្លៀតឱកាសបន្ថែមសម្ពាធកាន់តែខ្លាំងឱ្យរដ្ឋាភិបាលថៃ ស្របពេលដែលប្រទេសនេះកំពុងជួបប្រទះនឹងបញ្ហាផ្ទៃក្នុងប្រទេសជាច្រើនស្រាប់ទៅហើយ។ បច្ចុប្បន្ន ទីក្រុងបាងកកកំពុងមមាញឹកខ្លាំងក្នុងការបង្វែរកម្លាំងទាហានរាប់ម៉ឺននាក់ និងកញ្ចប់ថវិកាជាតិរាប់ពាន់លានបាត ដើម្បីទៅសង្គ្រោះប្រជាពលរដ្ឋជាង ២.៥ លាននាក់ដែលកំពុងលិចលង់ដោយទឹកជំនន់ទូទាំង ៤១ ខេត្ត ។ ការដែលក្រុមឧទ្ទាមឆ្លៀតឱកាសវាយប្រហារចំពេលប្រទេសជាតិជួបគ្រោះធម្មជាតិបែបនេះ មិនត្រឹមតែធ្វើឱ្យកម្លាំងសន្តិសុខជាតិត្រូវហែកជាពីរនោះទេ តែវាក៏បានបង្កការរាំងស្ទះដល់ខ្សែច្រវាក់ដឹកជញ្ជូនស្បៀងអាហារ និងទំនិញដែលកំពុងខ្វះខាត ធ្វើឱ្យសេដ្ឋកិច្ចជាតិថៃដែលដុនដាបស្រាប់ពីព្រលានយន្តហោះវឹកវរ និងរោងចក្របិទទ្វារ កាន់តែធ្លាក់ចូលក្នុងស្ថានភាពដុនដាបទ្វេដង។

សរុបសេចក្តីមក ស្ថានភាពរបស់ប្រទេសថៃនៅពេលនេះ គឺកំពុងធ្លាក់ចូលក្នុងគ្រោះមហន្តរាយជាន់លើគ្រោះ ពោលគឺត្រូវឈឺក្បាលដោះស្រាយបញ្ហាគ្រោះទឹកជំនន់ដ៏អាក្រក់នៅភាគខាងជើងនិងភាគកណ្តាលផង និងខិតខំទប់ស្កាត់អំពើហិង្សាបំបែករដ្ឋដ៏រ៉ាំរ៉ៃនៅភាគខាងត្បូងផង។ នេះគឺជាសញ្ញាដាស់តឿនដ៏សំខាន់មួយសម្រាប់អាជ្ញាធរ និងប្រជាពលរដ្ឋខ្មែរយើង ឱ្យបង្កើនការតាមដានស្ថានភាពសន្តិសុខនៅតាមតំបន់ព្រំដែនឱ្យបានជាប់លាប់ ដើម្បីត្រៀមលក្ខណៈបង្ការ និងឆ្លើយតបចំពោះផលប៉ះពាល់ណាមួយដែលអាចជះឥទ្ធិពលមកលើប្រទេសកម្ពុជាយើងជាយថាហេតុ៕