ជុំវិញវិស័យភាពយន្ត និងការផ្តល់តម្លៃដល់ស្នាដៃសិល្បៈ លោក ឆាយ បូរ៉ា ផលិតករជើងចាស់ដ៏មានឈ្មោះបោះសំឡេងក្នុងវិស័យភាពយន្តខ្មែរ បានលើកឡើងពីតម្លៃនៃការខិតខំប្រឹងប្រែង ការវិនិយោគ សិល្បៈច្នៃប្រឌិតក្នុងការរៀបចំឆាក ពេលវេលា និងការលះបង់របស់អ្នកបង្កើតស្នាដៃ។ ការលើកឡើងរបស់លោកគឺស្របពេលដែលស្នាដៃកុនខ្មែរ «សូម៉ា» ត្រៀមនឹងបញ្ចាំងនាពេលឆាប់ៗខាងមុខនេះ។
.png)
រឿង «សូម៉ា» គឺជាស្នាដៃកុនខ្មែរខ្នាតធំដែលកំពុងទទួលបាននូវការចាប់អារម្មណ៍ពីសាធារណៈជនដោយសារតែសាច់រឿងនិងបច្ចេកទេសក្នុងការកាត់តកាន់តែមានភាពលេចធ្លោ។ ស្នាដៃរបស់ផលិតកម្ម Wonder Film មួយនេះគឺបានថតកាលពីដើមខែឆ្នាំ២០២៤ ដោយចំណាយពេលជាច្រើនឆ្នាំមុនពេលប្រកាសចាក់នៅក្នុងរោងកុននៅថ្ងៃទី៨ ខែតុលា ឆ្នាំ២០២៦។
ជុំវិញស្នាដៃកូនខ្មែរមួយនេះបានជំរុញឱ្យលោក ឆាយ បូរ៉ា បានបង្ហាញពីទស្សនៈរបស់ខ្លួនឡើងមក។ នៅថ្ងៃទី២៩ ខែកញ្ញា អ្នកដឹកនាំរឿងរូបនេះបានសង្កត់ធ្ងន់ថា មិនគួរផ្តល់តម្លៃដល់ភាពយន្តបរទេសខ្លាំងពេក រហូតមើលរំលង ឬមិនឱ្យតម្លៃដល់ស្នាដៃភាពយន្តខ្មែរនោះទេ។ ជាពិសេស លោកបានព្រមានថាមិនគួរយកផលប្រយោជន៍ផ្នែកហិរញ្ញវត្ថុជាចម្បង រហូតដល់ប៉ះពាល់ដល់គ្រឹះវប្បធម៌របស់ខ្លួនឡើយ។
លោក ឆាយ បូរ៉ា បានលើកឡើងថា ប្រសិនបើស្នាដៃបរទេសដែលប៉ះពាល់ដល់វប្បធម៌ខ្មែរ គួរត្រូវបានសង្គមពិចារណានិងចូលរួមទប់ស្កាត់នោះស្នាដៃខ្មែរដែលអាចប៉ះពាល់ ឬបំផ្លាញស្នាដៃជាតិរបស់ខ្លួនឯង ក៏គួរតែធ្វើឱ្យមានការពិចារណាឡើងវិញផងដែរ។
សាររបស់លោកផ្តោតសំខាន់លើការឱ្យតម្លៃដល់ស្នាដៃភាពយន្តខ្មែរ ព្រមទាំងការយល់ឃើញថា ការអភិវឌ្ឍវិស័យភាពយន្ត មិនគួរផ្តោតតែលើផលចំណេញផ្នែកសេដ្ឋកិច្ចប៉ុណ្ណោះទេ ប៉ុន្តែគួរគិតគូរដល់តម្លៃសិល្បៈ វប្បធម៌ និងការខិតខំប្រឹងប្រែងរបស់អ្នកបង្កើតស្នាដៃផងដែរ។
គួរបញ្ជាក់ផងដែរថាខ្សែភាពយន្ត «សូម៉ា» គឺជាស្នាដែដែលមានទម្រង់ថ្មីបំផុតក្នុងឧស្សាហកម្មកុនខ្មែរដែលសាច់រឿងឆ្លុះបញ្ចាំងពីជីវិតនារីម្នាក់ដែលមាន ជីវភាពក្រីក្រ ព្រមលះបង់ខ្លួនឯងដើម្បីគ្រួសារ៕
