ឈុតស្រើ.បស្រា.លខុសសីលធម៌សង្គមរបស់ Fan Bingbing បង្កឱ្យមានការជជែកវែ.កញែ.ក

តារាសម្តែង Fan Bingbing កំពុងទទួលបានការចាប់អារម្មណ៍ពីសំណាក់អ្នកទស្សនាបន្ទាប់ពីខ្សែភាពយន្ត «Diary of a Mad Old Man» ដែលនាងសម្តែងបានបង្ហាញពីទំនាក់ទំនងចម្រូងចម្រាស និងការចង់បានផ្លូវចិត្តដែលលើសពីព្រំដែនសីលធម៌ធម្មតា។ ការសម្តែងរបស់តារាស្រីរូបនេះកំពុងប្រឈមនឹងការរិះគន់ក៏ដូចជាវែកញែកពីអ្នកលេងបណ្តាញសង្គមមួយចំនួន

យោងតាម QQ ខ្សែភាពយន្តនេះមិនទាន់មានការចាក់បញ្ចាំងជាផ្លូវការនៅរោងកុននៅឡើយទេ ប៉ុន្តែបានចាក់បញ្ចាំងក្នុងមហោស្រពភាពយន្តអន្តរជាតិមួយចំនួនដូចជា Toronto, Busan និង Tokyo។ ទន្ទឹមនឹងនេះ ឃ្លីបមួយចំនួនពីភាពយន្តត្រូវបានចែកចាយនៅលើបណ្តាញសង្គម និងបង្កឱ្យមានការជជែកវែកញែកពីសំណាក់អ្នកទស្សនា។ ក្នុងរឿង Fan Bingbing សម្តែងជាតួ Satsuko ដែលជាកូនប្រសាររបស់បុរសមានទ្រព្យសម្បត្តិម្នាក់។ តួអង្គ Utsugi សម្តែងដោយ Lily Franky បានជួបបញ្ហាសុខភាពធ្ងន់ធ្ងរ និងត្រូវពឹងផ្អែកលើ Satsuko ក្នុងការថែទាំ និងជួយស្តារកាយសម្បទា។

ទំនាក់ទំនងរវាងតួអង្គទាំងពីរត្រូវបានបង្ហាញតាមរយៈទស្សនៈផ្លូវចិត្តដ៏ស្មុគស្មាញរបស់ Utsugi ដែលបង្កើតការចង់បាន និងការស្រមើស្រមៃចំពោះកូនប្រសាររបស់ខ្លួន។ ភាពយន្តប្រើការបង្ហាញជានិមិត្តសញ្ញា និងការថតបែបប្រយោល ដើម្បីបង្ហាញពីភាពតានតឹង និងទំនាក់ទំនងដែលសង្គមចាត់ទុកថាមិនសមរម្យ ឬមិនអាចទទួលយកបាន (taboo) ជាជាងការបង្ហាញឈុតអាក្រាតដោយផ្ទាល់។
យ៉ាងណាក៏ដោយ ខ្លឹមសាររបស់ភាពយន្តបានធ្វើឱ្យអ្នកទស្សនាមួយចំនួនមានការភ្ញាក់ផ្អើល។ អ្នកប្រើប្រាស់បណ្តាញសង្គមមួយចំនួនបានរិះគន់ថា ឈុតឆាកមួយចំនួនមានភាពហ៊ានខ្លាំងពេក ខណៈអ្នកផ្សេងទៀតបានប្រៀបធៀបស្ទីលរបស់ភាពយន្តទៅនឹងខ្សែភាពយន្តបែបអាសអាភាស។

ទោះជាយ៉ាងណា ផលិតករបានពន្យល់ថា ឈុតដែលពាក់ព័ន្ធនឹងការថែទាំ និងលំហាត់ស្តារកាយសម្បទា ត្រូវបានរៀបចំឡើងដោយផ្អែកលើវិធីសាស្ត្រដែលមានលក្ខណៈវិទ្យាសាស្ត្រ ខណៈទិដ្ឋភាពបែបផ្លូវភេទដែលកើតឡើងក្នុងខ្សែភាពយន្ត គឺជាការបង្ហាញតាមរយៈការស្រមើស្រមៃរបស់តួអង្គឪពុកក្មេក។ ន័យរបស់វាគឺសកម្មភាពថែទាំធម្មតាត្រូវបានតួអង្គយកទៅបកស្រាយ និងពង្រីកក្នុងចិត្តរបស់ខ្លួនទៅជាការស្រមើស្រមៃបែបផ្លូវភេទ។

ភាពយន្តនេះដឹកនាំដោយ Wayne Wang និងផ្អែកលើប្រលោមលោកមានចំណងជើងដូចគ្នារបស់អ្នកនិពន្ធជប៉ុន Junichiro Tanizaki ដែលមានខ្លឹមសារសំខាន់ទាក់ទងនឹងភាពចាស់ជរា ចំណង់ប្រាថ្នា និងផ្នែកងងឹតនៃចិត្តមនុស្ស។ ក្រៅពីការរិះគន់ ក៏មានអ្នកទស្សនាមួយចំនួនយល់ថា ភាពយន្តជប៉ុនមានប្រវត្តិយូរមកហើយក្នុងការស្វែងយល់ពីចំណង់ប្រាថ្នា និងផ្នែកស្មុគស្មាញនៃធម្មជាតិមនុស្ស។ អ្នកដឹកនាំ Wayne Wang ក៏បានពណ៌នាថា ខ្សែភាពយន្តនេះផ្តោតលើ «ទំនាក់ទំនងរវាងមនុស្ស» ដែលលោកចាត់ទុកថាជារឿងមានតម្លៃជាពិសេសក្នុងពិភពលោកដែលមានភាពច្របូកច្របល់៕