សំឡេងធំ! ឱក សុគន្ធកញ្ញា ថានៅពេលគ្រងឈុត «ស្បៃខ្មែរ»អារម្មណ៍មិនអាចបរិយាយបាន

តារាចម្រៀងឱក សុគន្ធកញ្ញា បានប្រើប្រាស់សំឡេងរបស់ខ្លួនបង្ហាញពី «ស្បៃខ្មែរ» ដ៏ស្រស់ស្អាតដែលជាកេរដំណែលពីដូនតា។ ជាមួយនឹងការបង្ហាញពីវប្បធម៌ខ្មែរតារាចម្រៀងដែលមានអ្នកតាមដានរាប់លាននាក់រូបនេះបានបង្ហាញថានៅពេលគ្រងឈុតស្បៃខ្មែរអារម្មណ៍គឺមិនអាចបរិយាយបាន។

ប្រិយមិត្តមួយចំនួនធំជ្រាបមកហើយថារយៈពេលចុងក្រោយនេះបវរកញ្ញា តារាល្បីៗនិងអ្នកមានឥទ្ធិពលលើបណ្តាញសង្គម បានពួតដៃគ្នាជាធ្លុងមួយបង្ហាញពីវប្បធម៌ខ្មែរទាំងតួអង្គ «យាយសុខ» រួមទាំងការបង្ហាញពី «ស្បៃខ្មែរ»ដ៏ស្រស់ស្អាត។ មិនត្រឹមតែប៉ុណ្ណោះនិន្នាការនេះបានជំរុញឱ្យមានពាក្យមួយឃ្លាយ៉ាងស្រស់ស្អាតថា «ស្រ្តីការពារវប្បធម៌ បុរសការពារទឹកដី»។

ក្នុងនាមជាសិល្បការិនីជួរមុខមួយរូបប្រចាំប្រទេសកម្ពុជាតារាចម្រៀង ឱក សុគន្ធកញ្ញា ក៏មិនរំលងដោយបានប្រើប្រាស់សំឡេងធំរបស់ខ្លួនបង្ហាញពី «ស្បៃខ្មែរ» និងបានទម្លាយពីអារម្មណ៍នៅពេលគ្រងឈុតខ្មែរមួយនេះ។

ជាមួយនឹងរូបថតជាច្រើនសន្លឹកបង្ហោះនៅយប់ថ្ងៃទី២៩ ខែកញ្ញា អ្នកនាង ឱក សុគន្ធកញ្ញា បានថ្លែងថា «ស្បៃខ្មែរ កេរដំណែលពីដូនតា បានគ្រងកាលណា មានអារម្មណ៍ពិសេស ពុំមានអ្វីអាចកាត់ថ្លៃបាន…»។ ម្ចាស់បទ «ព្រហ្មលិខិត» ដែលជួយលើកស្ទួយវិស័យទេសចរណ៍មួយផ្នែកបានបង្កត់ធ្ងន់ទៀតថា «ស្បៃខ្មែរ ជាមរតកវប្បធម៌ខ្មែរ ដែលបង្កប់នូវភាពថ្លៃថ្នូរ ស្រស់ស្អាត និងអត្តសញ្ញាណខ្មែរ ដែលបងប្អូនខ្មែរគ្រប់រូប គួរបន្តថែរក្សាឱ្យគង់វង្សតទៅជំនាន់ក្រោយ»។

ការលើកឡើងរបស់តារាចម្រៀង ឱក សុគន្ធកញ្ញា ត្រូវបានគេមើលឃើញថាជាការចូលរួមបង្ហាញពីវប្បធម៌ខ្មែរ ជាពិសេសដាស់ស្មារតីកូនខ្មែរគ្រប់រូបគួរចូលរួមបន្តការថែរក្សាមរតកដ៏ផូរផង់មួយនេះ ស្របពេលមានប្រទេសខ្លះចិញ្ចឹមចិត្តចង់បាននិងចង់ធ្វើជាកម្មសិទ្ធិ៕