កម្ដៅការទូតកំពុងពុះកញ្ជ្រោល! ថៃទាត់ចោលរបាយការណ៍ជនភៀសសឹកខ្មែរ ដោយបានប្រើប្រាស់ «សិទ្ធិតតាំងបំភ្លឺ» យ៉ាងលាក់ពុត នៅក្នុងឱកាសសម័យប្រជុំលើកទី៨១ នៃមហាសន្និបាតអង្គការសហប្រជាជាតិ ដើម្បីលាបពណ៌បំភ្លៃតថភាពជាក់ស្តែង តាមរយៈការចោទប្រកាន់ពលរដ្ឋខ្មែរថា បានចូលមកឈ្លានពានរស់នៅលើទឹកដីថៃ និងថែមអះអាងភូតភរប្រាប់ពិភពលោកថា ប្រទេសថៃនៅតែប្រកាន់ខ្ជាប់នូវការចរចា និងការជ្រើសរើសយកផ្លូវការទូតជាជម្រើសទីមួយ ទាំងដែលសកម្មភាពជាក់ស្តែងរាល់ថ្ងៃ យោធាថៃកំពុងតែបន្តបំពាន និងជាន់ឈ្លីច្បាប់អន្តរជាតិឈ្លានពានព្រំដែនខ្មែរយ៉ាងកំរោល។
_____________
យោងតាមការចុះផ្សាយរបស់សារព័ត៌មានថៃ THE STANDARD នៅថ្ងៃទី២៩ ខែកញ្ញា នេះ លោក ឆើតឆាយ ឆៃវិឌ (Cherdchai Chaivaivid) ឯកអគ្គរាជទូត និងជាតំណាងអចិន្ត្រៃយ៍ថៃប្រចាំអង្គការសហប្រជាជាតិ បានឡើងថ្លែងសុន្ទរកថាវាយបកការទូតយ៉ាងចាស់ដៃ ដោយបានច្រានចោលទាំងស្រុងចំពោះរបាយការណ៍របស់កម្ពុជា។ ភាគីថៃបានភូតកុហកថា ប្រជាពលរដ្ឋជាង ២ ម៉ឺននាក់នោះ មិនមែនជាជនភៀសខ្លួនខ្មែរដែលរងការបណ្តេញចេញដោយសារសង្គ្រាមឈ្លានពានរបស់យោធាថៃឡើយ ប៉ុន្តែគឺជាប្រជាជនកម្ពុជាដែលបានលបលួចចូលមកស្នាក់នៅក្នុងមណ្ឌលភៀសខ្លួនបណ្តោះអាសន្នលើទឹកដីថៃ តាំងពីទសវត្សរ៍ឆ្នាំ១៩៧០ មកម្ល៉េះ ហើយមិនព្រមចាកចេញ។ ថៃថែមទាំងបានបង្វែរសាច់រឿងចោទប្រកាន់មកលើកម្ពុជាវិញថា ការដែលខ្មែរទាមទារដីធ្លីតំបន់នោះ គឺស្មើនឹងការរំលោភបំពាន និងទន្ទ្រានឈ្លានពានចូលដីធ្លីអធិបតេយ្យភាពរបស់ប្រទេសថៃទៅវិញ។
ទោះបីជាថៃប្រកាសស្រឡាញ់សន្តិភាពនៅលើឆាកអន្តរជាតិ និងអះអាងថាខ្លួនប្រកាន់ខ្ជាប់នូវយន្តការចរចាជាធំ រួមទាំងកិច្ចព្រមព្រៀងចុះថ្ងៃទី២៧ ខែធ្នូ ឆ្នាំ២០២៥ យ៉ាងណាកក្តី ប៉ុន្តែយោធាថៃកំពុងប្រើប្រាស់អាវុធ និងកម្លាំងបំពានជាន់ឈ្លីច្បាប់អន្តរជាតិនៅនឹងជើង។ កាន់តែធ្ងន់ធ្ងរជាងនេះ ថៃបានដេញជើងការទូតដាក់សម្ពាធឱ្យកម្ពុជាផ្អាកសកម្មភាពយោធាព្រំដែន ព្រមទាំងជម្រុញឱ្យខ្មែរសហការបោសសម្អាតមីន និងបង្ក្រាបក្រុមឆបោកអនឡាញទៅវិញ។ យុទ្ធនាការយោធារបស់ថៃ បាននិងកំពុងបង្កការខូចខាតយ៉ាងធ្ងន់ធ្ងរដល់តំបន់បេតិកភណ្ឌវប្បធម៌ដូនតាខ្មែរ ដែលធ្វើឱ្យអ្នកលេងបណ្តាញសង្គមកម្ពុជា បើកយុទ្ធនាការបកស្រាត និងចាត់ទុកវោហាសាស្ត្ររបស់ថៃនៅ UN ថាជាចរិតភូតភរ ក្រឡេចក្រឡុះ មិនអាចជឿទុកចិត្តបានឡើយ។.jpg)
ជារួមមក ពាក្យសម្ដីអួតអាងរបស់ទូតថៃនៅចំពោះមុខមហាសន្និបាត UN គ្រាន់តែជាឆាកល្ខោនភូតភរដើម្បីបិទបាំងទង្វើឈ្លានពានជាក់ស្តែងរបស់យោធាខ្លួននៅលើដីតែប៉ុណ្ណោះ។ យុទ្ធនាការលាបពណ៌នេះបានជម្រុញឱ្យកូនខ្មែរគ្រប់រូបកាន់តែមានស្មារតីជាតិនិយម រួមគ្នាក្រោកឈរគាំទ្រជំហររាជរដ្ឋាភិបាល និងកងទ័ពជួរមុខក្នុងការប្រើប្រាស់ខែលច្បាប់អន្តរជាតិ ដើម្បីការពារបូរណភាពទឹកដី និងអធិបតេយ្យភាពជាតិខ្មែរឱ្យបានគង់វង្សជានិរន្តរ៍៕
