Michelle និយាយលើកដំបូងនៅក្នុងបទសម្ភាសន៍ជុំវិញការលែងលះជាមួយ Chen Xiao

តារាសម្តែងតៃវ៉ាន់ Michelle Chen បានបើកចំហជាលើកដំបូងអំពីអារម្មណ៍របស់នាងក្រោយការលែងលះជាមួយតារាសម្តែងចិន Chen Xiao ហើយបានបញ្ជាក់យ៉ាងច្បាស់ថាបច្ចុប្បន្ននាងមិនមានបំណងរៀបការម្តងទៀតទេ។

ក្នុងកម្មវិធីទូរទស្សន៍មួយដែលចាក់ផ្សាយនៅថ្ងៃទី ៣០ ខែសីហា ឆ្នាំ ២០២៦ Michelle បាននិយាយថា ការលែងលះប្រាកដជាមានការសោកស្តាយ ប៉ុន្តែនាងជ្រើសរើសទទួលយកការពិត និងបន្តដំណើរជីវិតទៅមុខ។ នាងមិនបានបង្ហាញការចោទប្រកាន់ ឬរិះគន់អតីតស្វាមីឡើយ។ Michelle ក៏បានបង្ហាញទស្សនៈរបស់នាងចំពោះស្នេហាថ្មី ដោយនិយាយថា ការជឿលើស្នេហា និងការជឿថាស្នេហាអាចស្ថិតស្ថេរជារៀងរហូត គឺជារឿងពីរផ្សេងគ្នា។ ទោះបីអាពាហ៍ពិពាហ៍របស់នាងបានបញ្ចប់ក៏ដោយ នាងនៅតែជឿថា ស្នេហាអាចនាំមកនូវសុភមង្គល និងភាពស្រស់ស្អាតក្នុងជីវិត។

នៅពេលត្រូវបានសួរថា តើនាងមានគម្រោងរៀបការម្តងទៀតឬអត់ Michelle បានឆ្លើយយ៉ាងច្បាស់ថា «ខ្ញុំពិតជាមិនមានបំណងរៀបការម្តងទៀតទេ»។ ទោះជាយ៉ាងណា នាងមិនបាននិយាយថា ខ្លួននឹងបដិសេធស្នេហានាពេលអនាគតទាំងស្រុងឡើយ។ ប្រសិនបើមានអារម្មណ៍ស្រលាញ់ ឬជួបមនុស្សដែលធ្វើឱ្យនាងមានអារម្មណ៍ពិសេស នាងនៅតែអាចជ្រើសរើសឱ្យតម្លៃលើអារម្មណ៍នៅពេលនោះ។

Michelle Chen និង Chen Xiao បានរៀបការនៅឆ្នាំ២០១៦ បន្ទាប់ពីស្គាល់គ្នាតាមរយៈការសម្តែងរឿង (យ៉ាងគួនិងសៀវឡុងនី២០១៤) (The Romance of the Condor Heroes) ហើយមានកូនប្រុសម្នាក់ជាមួយគ្នា។ អ្នកទាំងពីរបានប្រកាសលែងលះជាផ្លូវការនៅថ្ងៃទី១៨ ខែកុម្ភៈ ឆ្នាំ ២០២៥ បន្ទាប់ពីជីវិតអាពាហ៍ពិពាហ៍ប្រហែល៩ឆ្នាំ។

ក្រោយការលែងលះ Michelle បានផ្តោតការយកចិត្តទុកដាក់ទៅលើ កូនប្រុស ការងារ និងជីវិតផ្ទាល់ខ្លួន។ នាងក៏បានបញ្ជាក់ថា នាងមិនសោកស្តាយចំពោះការរៀបការ និងការមានកូនឡើយ ព្រោះកូនប្រុសគឺជាផ្នែកដ៏មានតម្លៃបំផុតមួយនៃជីវិតរបស់នាង៕