Jiwon សមាជិកក្រុម fromis_9 បានធ្វើឱ្យអ្នកគាំទ្រភ្ញាក់ផ្អើលបន្ទាប់ពីបង្ហើបពីការលំបាកផ្នែកហិរញ្ញវត្ថុដែលនាងនិងសមាជិកក្រុមបានឆ្លងកាត់ក្នុងអំឡុងពេលជាច្រើនឆ្នាំនៃការធ្វើការជាតារា K-pop មិនទទួលបានប្រាក់សូម្បីមួយសេននិងត្រូវពឹងផ្អែកការជួយពីគ្រួសារថែមទៀត។
ក្នុងកម្មវិធីមួយរបស់ JTBC Jiwon បាននិយាយថា ក្នុងរយៈពេលប្រហែល ៧ឆ្នាំដំបូងនៃសកម្មភាពរបស់ fromis_9 នាងមិនទទួលបានប្រាក់ចំណូលដែលអាចយកមកប្រើប្រាស់ជាប្រចាំឡើយ។ក្នុងអំឡុងពេលនោះ នាងត្រូវពឹងផ្អែកលើប្រាក់ឧបត្ថម្ភពីម្តាយ។ Jiwon ក៏បានបង្ហើបថា មានពេលខ្លះនាងត្រូវចំណាយលើអាហារដោយខ្លួនឯង ហើយតែងតែបារម្ភថា កាតឥណទានរបស់នាងអាចត្រូវបានបដិសេធ ដោយសារមិនមានប្រាក់គ្រប់គ្រាន់។ស្ថានភាពនេះកាន់តែពិបាកនៅពេលដែលវាស្របពេលនឹង ការរីករាលដាលនៃជំងឺកូវីដ១៩ ដែលធ្វើឱ្យសកម្មភាពសម្តែង ការប្រគំតន្ត្រី និងការងារផ្សេងៗរបស់សិល្បករត្រូវបានកាត់បន្ថយយ៉ាងខ្លាំង។
ទោះជាជួបការលំបាកផ្នែកហិរញ្ញវត្ថុក៏ដោយ Jiwon បាននិយាយថាសមាជិក fromis_9 នៅតែបន្តខិតខំ ព្រោះពួកគេមានទំនាក់ទំនងជិតស្និទ្ធ និងមានចិត្តស្រលាញ់ចំពោះក្រុម។
ពេលពិធីករសួរថា តើពេលនេះសមាជិកទាំងអស់បានចាប់ផ្តើមទទួលប្រាក់ចំណូលហើយឬនៅ Jiwon បានឆ្លើយដោយសើចថា «មែនហើយ… ឥឡូវនេះខ្ញុំបានទទួលប្រាក់ខ្លះហើយ…» ដែលធ្វើឱ្យអ្នកចូលរួមក្នុងកម្មវិធីសើច។
គេចាំបានថាក្នុងកម្មវិធីមួយផ្សេងទៀតកាលពីខែមិថុនា Jiwon ក៏ធ្លាប់និយាយអំពីស្ថានភាពហិរញ្ញវត្ថុរបស់ខ្លួនថា រហូតដល់ប្រហែលមួយទៅពីរឆ្នាំមុន នាងស្ទើរតែមិនមានប្រាក់សន្សំ ហើយទើបតែទទួលបានការទូទាត់ប្រាក់ដែលនាងរង់ចាំនាពេលថ្មីៗនេះ។
រឿងរ៉ាវរបស់ Jiwon ក៏បង្ហាញពីផ្នែកមួយនៃឧស្សាហកម្ម K-pop ដែលអ្នកគាំទ្រមិនសូវបានឃើញ។ ការក្លាយជាតារាល្បីមិនមានន័យថាសិល្បករនឹងទទួលបានប្រាក់ខែប្រចាំខែជាប្រចាំដូចការងារធម្មតានោះទេ។ ប្រាក់ចំណូលរបស់ពួកគេអាចពាក់ព័ន្ធនឹងប្រាក់ចំណូលពីអាល់ប៊ុម ការផ្សាយតន្ត្រី ការសម្តែង ការផ្សាយពាណិជ្ជកម្ម និងសកម្មភាពផ្សេងៗ ហើយត្រូវគោរពតាមលក្ខខណ្ឌក្នុងកិច្ចសន្យាជាមួយក្រុមហ៊ុន។ រឿងរ៉ាវរបស់ Jiwon បានធ្វើឱ្យអ្នកគាំទ្រជាច្រើនយល់កាន់តែច្បាស់ថា នៅពីក្រោយពន្លឺ និងភាពល្បីល្បាញរបស់តារា K-pop ក៏អាចមានការតស៊ូ និងការលះបង់ជាច្រើនឆ្នាំដែលមហាជនមិនបានឃើញផងដែរ។
គួរបញ្ជាក់ថា fromis_9 ត្រូវបានបង្កើតឡើងតាមរយៈកម្មវិធី Idol School របស់ Mnet ក្នុងឆ្នាំ ២០១៧ និងបានបង្ហាញខ្លួនជាផ្លូវការនៅថ្ងៃទី ២៤ ខែមករា ឆ្នាំ២០១៨ ជាមួយបទចម្រៀង To. Heart។ សម្រាប់ Jiwon នាងគឺជាសមាជិកសំខាន់ម្នាក់របស់ fromis_9 ដែលត្រូវបានគេស្គាល់ថាមានសមត្ថភាពច្រៀងខ្ពស់ និងការសម្តែងលើឆាកដ៏ស្វាហាប់៕
