Yang Chaoyue ឈ្នះពានតារាសម្ដែងស្រីគាំទ្រល្អបំផុតនៅមហោស្រពភាពយន្តកម្ពុជា-អាស៊ី

តារាសម្ដែង និងតារាចម្រៀង Yang Chaoyue កំពុងទទួលបានការចាប់អារម្មណ៍យ៉ាងខ្លាំងបន្ទាប់ពីនាងបានឈ្នះពានរង្វាន់ តារាសម្ដែងស្រីគាំទ្រល្អបំផុត (Best Supporting Actress) នៅក្នុងមហោស្រពភាពយន្តកម្ពុជា-អាស៊ីលើកទី៤ ដោយសារការសម្ដែងក្នុងភាពយន្ត «Being Towards Death »(10间敢死队)។

ពានរង្វាន់នេះកាន់តែមានការចាប់អារម្មណ៍ទាំងក្នុងនិងក្រៅប្រទេសពីព្រោះវាជាភាពយន្តខ្នាតធំដំបូងដែល Yang Chaoyue បានចូលរួមសម្ដែង ហើយជាជំហានថ្មីមួយក្នុងការផ្លាស់ប្តូររូបភាពរបស់នាងពីតារាចម្រៀង និងតារាកម្មវិធីកម្សាន្ត មកកាន់វិស័យសម្ដែងភាពយន្ត។ ប្រភពមួយបានចាត់ទុកពាននេះថា ជាចំណុចសំខាន់មួយក្នុងដំណើរអាជីពសម្ដែងរបស់នាង។ ក្រោយទទួលបានពានរង្វាន់ Yang Chaoyue ក៏បានបង្ហាញអារម្មណ៍របស់ខ្លួនតាមបណ្តាញសង្គម ដោយថ្លែងអំណរគុណដល់ក្រុមការងារភាពយន្ត អ្នកទស្សនា និងអ្នកគាំទ្រដែលបានផ្តល់ការគាំទ្រកន្លងមក។

ក្នុងដំណើរមកចូលរួមមហោស្រពភាពយន្តនៅកម្ពុជា Yang Chaoyue ក៏ទទួលបានការចាប់អារម្មណ៍ពីអ្នកគាំទ្រ តាមរយៈការបង្ហាញខ្លួនលើកម្រាលព្រំក្រហម និងការថតរូបផ្សេងៗដូចជារូបភាពនៅសារៈមន្ទីរជាតិ និងសកម្មភាពទទួលអាហារ។

អ្នកគាំទ្រមួយចំនួនយល់ថាការឈ្នះពាននៅមហោស្រពភាពយន្តអន្តរជាតិគឺជាការទទួលស្គាល់ចំពោះការខិតខំរបស់នាង។
សម្រាប់ Yang Chaoyue ការឈ្នះពាននេះអាចចាត់ទុកជាជំហានដ៏គួរឱ្យចាប់អារម្មណ៍មួយ ក្នុងការបន្តអភិវឌ្ឍអាជីពសម្ដែង ខណៈមហាជនក៏កំពុងរង់ចាំមើលថា តើនាងនឹងអាចបន្តបង្ហាញសមត្ថភាពសម្ដែង និងទទួលបានការទទួលស្គាល់បន្ថែមទៀតនៅក្នុងស្នាដៃបន្ទាប់ដែរឬទេ។

គួរបញ្ជាក់ផងដែរថា Yang Chaoyue កើតក្នុងឆ្នាំ១៩៩៨ ជាកូនគ្រួសារកសិករមួយនៅតំបន់ជនបទក្នុងខេត្ត Jiangsu។ ក្រោយបញ្ចប់ការសិក្សាកម្រិតមធ្យម នាងបានចេញទៅធ្វើការដើម្បីជួយគ្រួសារ ហើយធ្លាប់ធ្វើការជា កម្មការិនីរោងចក្រកាត់ដេរ និងបុគ្គលិកបម្រើក្នុងភោជនីយដ្ឋាន មុនពេលចូលប្រឡូកក្នុងវិស័យសិល្បៈ៕