នាយ ក្រាន់ ទទួលបានពាក្យសរសើរក្រោយនិយាយឱ្យតម្លៃភរិយា ខណៈ ងួន សុបិន ផ្លែផ្កាកម្មវិធី

តារាកំប្លែង នាយក្រាន់ បានធ្វើឱ្យអ្នកលេងបណ្តាញសង្គមជាច្រើនកោតសរសើរយ៉ាងខ្លាំងបន្ទាប់ពីនិយាយឱ្យតម្លៃភរិយាទោះទៅណាមកណាក៏ចង់នាំទៅតាមដើម្បីឱ្យប្រពន្ធខ្លួនដឹងពីសង្គមខាងក្រៅ ហើយការដែលមានគ្រួសារមិនមែនជារឿងដែលធ្វើឱ្យបាត់បង់សេរីភាពដើរហើរទៅខាងក្រៅឡើយ។ ទន្ទឹមនឹងការសរសើររបស់មហាជនទៅកាន់ នាយក្រាន់ គេស្រាប់តែឃើញ ងួន សុបិន បានបង្ហោះសំណេរដែលធ្វើឱ្យមានការសង្ស័យថាលោកផ្លែផ្កាឱ្យកម្មវិធី។

ថ្មីៗនេះ នាយក្រាន់ បាននិយាយនៅក្នុងកម្មវិធីមួយដែលបង្ហាញថាសេរីភាពដែលល្អសម្រាប់លោកគឺទៅណាមកណាមានប្រពន្ធទៅជាមួយ ហើយការនាំមកនេះគឺដើម្បីឱ្យប្រពន្ធបានស្គាល់ពិភពខាងក្រៅ ស្រួលក្នុងការរស់នៅ។ ចំពោះមតិយោបល់ដែលថាការហើយគ្មានសេរីភាព នាយក្រាន់ បានឆ្លើយតបថា ស្រលាញ់គ្រួសារឱ្យច្រើនអ្វីដែលតានតឹងថាខ្លួនឯងអត់សេរីភាពគឺមិនមានឡើយ។

តារាកំប្លែងរូបនេះពន្យល់ទៀតថា សម្រាប់លោកពេលមកពីថតវិញគឺបន់ឱ្យតែបានមកដល់ផ្ទះបានជួបប្រពន្ធ បានជួបកូន ហើយភាពសប្បាយរីករាយនៅក្នុងគ្រួសារគឺកក់ក្តៅជាងយើងទៅក្រៅជួបជុំជាមួយនឹងមិត្តភក្តិ។ ក្នុងនោះ នាយក្រាន់ ថាទាល់តែអ្នកមានគ្រួសារបានដឹង។ នៅក្នុងកិច្ចសម្ភាសន៍ដដែលនេះ នាយក្រាន់ ក៏បានលើកឡើងទៀតថាពេលឈ្លោះជាមួយប្រពន្ធលោកមិនតបតភ្លាមៗទេចាំត្រជាក់ចិត្តទើបនិយាយ ទោះប្រពន្ធ បង្កកំហុសក៏ចាំដល់ត្រជាក់ចិត្តទើបលោកណែនាំដោយទន់ភ្លន់។
ពាក្យសម្តីរបស់ នាយក្រាន់ បានធ្វើឱ្យអ្នកប្រើប្រាស់បណ្តាញសង្គមបញ្ចេញមតិសរសើរជាច្រើនជាពិសេសគឺស្រ្តីៗដោយចាត់ទុកថា នាយក្រាន់ គឺជាប្តីល្អមិនងាយរកបាន។ មតិខ្លះទៀតក៏សរសើរលោកចំពោះការនិយាយឱ្យតម្លៃប្រពន្ធខ្លួនឯង យកគ្រួសារជាធំជាងការសប្បាយនៅខាងក្រៅ។

ទន្ទឹមនឹងមានការចែករំលែកភ្លូកទឹកភ្លូកដីពីពាក្យសម្តីរបស់ នាយក្រាន់ គេស្រាប់តែឃើញ ងួន សុបិន ដែលធ្លាប់រងនូវមតិរិះគន់យ៉ាងក្លាចេញមកបង្ហោះសំណេរមួយដែលធ្វើឱ្យមានមតិប្រតិកម្មបន្តទៀត។

ងួន សុបិន បានសរសេរថា «កម្មវិធី១បើគេលើកអ្នកជាតួឯកអ្នកនឹងក្លាយជាតួឯក បើគេឱ្យអ្នកជាតួចិត្តអាក្រក់ អ្នកនឹងក្លាយជាតួចិត្តអាក្រក់ភ្លាម»។ ពាក្យសម្តីរបស់អ្នកនិពន្ធរូបនេះត្រូវបានអ្នកមួយចំនួនសង្ស័យថាលោកផ្លែផ្កាទៅដល់កម្មវិធី។ ក្រោយពេលពាក្យពេចន៍នេះរងនូវការជជែកវែកញែក ងួន សុបិន សម្រេចចិត្តលុបការបង្ហោះនេះចេញផងដែរ៕