ថ្មីៗនេះតារាម៉ូដែល Terry ជាកូនកាត់ខ្មែរ-ចិន បានធ្វើឱ្យអ្នកលេងបណ្តាញសង្គមមានការភ្ញាក់ផ្អើលកាន់តែច្រើនបន្ទាប់ពីនាងបង្ហោះវីដេអូមួយដែលបង្ហាញពីឈុតក្រៅឆាកក្នុងថតពាណិជ្ជកម្មជាមួយនឹងតារាសម្តែងកូរ៉េល្បីឈ្មោះ Park Seo Joon ដែលថតកាលពី១ឆ្នាំមុន។ មុននឹងបោះជំហ៊ានចូលអាជីពជាម៉ូដែល Terry គឺជាឱសថការីម្នាក់។
ប្រិយមិត្តមួយចំនួនក៏បានស្គាល់ចំណែកឯប្រិយមិត្តមួយចំនួននៅមិនទាន់ស្គាល់ Terry នោះទេ។ នាងគឺជាតារាម៉ូដែលដែលមានម្តាយជាជនជាតិខ្មែរ និងបានថតឱ្យម៉ាកយីហោល្បីៗលំដាប់អន្តរជាតិជាច្រើនផងដែរ។ រយៈពេលចុងក្រោយនេះ Terry ក៏បានលេចមុខតំណាងឱ្យផលិតផលរបស់ អ្នកនាង ផន សុផារី ជាមួយនឹង ស៊ីដនី ម៉ារិទ្ធ។
អ្វីដែលកាន់តែភ្ញាក់ផ្អើល Terry ទើបតែទម្លាយវីដេអូក្រៅឆាកពីការថតពាណិជ្ជកម្មជាមួយនឹងតារាសម្តែង Park Seo Joon តួឯកដ៏ល្បីប្រចាំប្រទេសកូរ៉េតាំងពី១ឆ្នាំមុនហើយអ្នកគាំទ្រស្ទើរតែមិនអាចចំណាំនាងបាននោះទេទើបតែនាងបានបង្ហោះ ទើបពួកគេដឹងកាន់តែច្បាស់។ Park Seo Joon ជាតារាល្បីដែលសាងស្នាដៃលេចធ្លោតាមរយៈខ្សែភាពយន្តដូចជា « Parasite» «Itaewon Class» «What’s Wrong with Secretary Kim»។
គួរឱ្យដឹងថា Terry គឺបានកើតនៅក្នុងប្រទេសខ្មែរនិងបានចាកចេញទៅរស់នៅប្រទេសអូស្រ្តាលីតាំងពីអាយុ៦ឆ្នាំនិងបានធំធាត់ឡើងនៅទីនោះ។ បច្ចុប្បន្ននេះ Terry ក៏អាចនិយាយភាសាខ្មែរបានខ្លះៗ និងខិតខំរៀនអក្សរខ្មែរទៀតផង។ ការចេះនិយាយបែបនេះ Terry បានផ្តល់នៅក្នុងបទសម្ភាសន៍ រៀនថត ថាគឺនាងខិតខំប្រឹងខ្លាំងណាស់ដែរទើបអាចនិយាយបាន។
មុននឹងក្លាយជាម៉ូដែលនិងក្លាយជាអ្នកបង្កើតមាតិកា Terry បានសិក្សាផ្នែក Pharmacy រួមទាំងបានធ្វើការជាឱសថការីផងដែរ។ ការងានេះ បានធ្វើឱ្យ Terry មានភាពនឿយហត់ទាំងផ្លូវកាយ និងផ្លូវចិត្ត មិនស្របនឹងចំណង់ចំណូលចិត្តខ្លួនឯងនាងក៏សម្រេចចិត្តបោះបង់ដើម្បីសាកល្បងអាជីពដែលខ្លួនចូលចិត្ត ហើយទីបំផុតបានបង្កើតអត្តសញ្ញាណថ្មីជាម៉ូដែល និង Content Creator៕
