BTS វ៉ាដាច់ BLACKPINK ដោយបង្កើតកំណត់ត្រាថ្មីលើប្រាក់ចំណូលដំណើរទេសចរណ៍ ARIRANG

ដំណើរទេសចរណ៍ពិភពលោក «ARIRANG» របស់ BTS កំពុងបន្តបង្កើតសមិទ្ធផលគួរឱ្យចាប់អារម្មណ៍នៅលើឆាកអន្តរជាតិ ដោយតាមតួលេខដែលបានរាយការណ៍ ដំណើរទេសចរណ៍នេះរកចំណូលបានប្រមាណ ៤៣៣,២ លានដុល្លារ ពីការលក់សំបុត្រជាង ២,៣ លានសន្លឹក សម្រាប់ការប្រគំតន្ត្រីចំនួន ៣៨។ ការប្រគំតន្ត្រីទាំង ៣៨ លើកត្រូវបានរាយការណ៍ថា លក់សំបុត្រអស់ (Sold Out) ដែលបង្ហាញពីកម្លាំងអ្នកគាំទ្រ និងប្រជាប្រិយភាពរបស់ BTS នៅលើទីផ្សារអន្តរជាតិ។

ដំណើរទេសចរណ៍ «ARIRANG» បានចាប់ផ្តើមនៅខែមេសា ឆ្នាំ២០២៦ ហើយត្រូវបានចាត់ទុកថា ជាការវិលត្រឡប់ដ៏ធំរបស់ BTS បន្ទាប់ពីសមាជិកទាំងអស់បានបញ្ចប់កាតព្វកិច្ចយោធា។ ចាប់តាំងពីការចាប់ផ្តើមមក ការប្រគំតន្ត្រីរបស់ពួកគេនៅទីក្រុងជាច្រើនត្រូវបានអ្នកគាំទ្រទិញសំបុត្រអស់យ៉ាងឆាប់រហ័ស។ ការសម្តែងនៅ អាម៉េរិកខាងជើងចំនួន ១៥ លើក ត្រូវបានរាយការណ៍ថា ទាក់ទាញអ្នកទស្សនាប្រមាណ ៨៤០,០០០ នាក់ ខណៈប្រាក់ចំណូលពីទីផ្សារនេះក៏បានរួមចំណែកយ៉ាងសំខាន់ដល់តួលេខសរុបរបស់ដំណើរទេសចរណ៍។

ក្នុងខែឧសភា BTS ត្រូវបានរាយការណ៍ថា រកចំណូលបានដល់ទៅ ១២៧,៨ លានដុល្លារ ពីការសម្តែងចំនួន ១២ លើក។ តួលេខនេះបានក្លាយជាកំណត់ត្រាប្រាក់ចំណូលប្រចាំខែខ្ពស់បំផុតសម្រាប់សិល្បករមួយក្រុម ចាប់តាំងពី Billboard Boxscore Top Tours ចាប់ផ្តើមកត់ត្រាក្នុងឆ្នាំ២០១៩ ដោយវ៉ាដាច់កំណត់ត្រារបស់ The Rolling Stones ដែលរកបាន ៩៥ លានដុល្លារក្នុងខែសីហា ឆ្នាំ២០១៩។

អ្វីដែលគួរឱ្យចាប់អារម្មណ៍បន្ថែមទៀត គឺប្រាក់ចំណូល ៤៣៣,២ លានដុល្លារ របស់ «ARIRANG» បានវ៉ាដាច់ដំណើរទេសចរណ៍ «BORN PINK» របស់ BLACKPINK ដែលរកចំណូលបានប្រមាណ ៣៣១,៨ លានដុល្លារ។ ជាមួយនឹងលទ្ធផលនេះ «ARIRANG» កំពុងឈរជាដំណើរទេសចរណ៍របស់សិល្បករ K-pop ដែលរកចំណូលបានខ្ពស់បំផុតតាមតួលេខដែលបានរាយការណ៍។

ជាងនេះទៅទៀតតួលេខ ៤៣៣,២ លានដុល្លារ មិនទាន់ជាតួលេខចុងក្រោយឡើយ ព្រោះដំណើរទេសចរណ៍ «ARIRANG» នៅមានការប្រគំតន្ត្រីជាច្រើនទៀតដែលត្រូវបន្ត។ BTS នៅមានគម្រោងសម្តែងនៅតំបន់ផ្សេងៗទៀតរហូតដល់ចុងឆ្នាំ២០២៦ និងបន្តចូលដល់ដើមឆ្នាំ២០២៧។ ដូច្នេះប្រាក់ចំណូលនិងចំនួនអ្នកទស្សនារបស់ «ARIRANG» ត្រូវបានរំពឹងថា នឹងបន្តកើនឡើងថែមទៀត៕