អាជ្ញាធរខេត្តប៉ៃលិន ចុះផ្អាកទីតាំងស្តង់ពោត និងដំឡូងមីចំនួន ៩កន្លែង ក្រោយរកឃើញថាជញ្ជីងថ្លឹងមិនប្រក្រតី

ភ្នំពេញ ៖ អាជ្ញាធរខេត្តប៉ៃលិនកាលពីថ្ងៃទី២៤ ខែវិច្ឆិកា ឆ្នាំ២០២២ បានចុះផ្អាកទីតាំងស្តង់ពោត និងដំឡូងមីចំនួន ៩កន្លែងដែលទទួលទិញកសិផល ពោតក្រោម និងដំឡូងរបស់ប្រជាកសិករ ក្រោយរកឃើញថាជញ្ជីងថ្លឹងមិនប្រក្រតី ក្នុងសង្កាត់ប៉ៃលិន សង្កាត់អូរតាវ៉ៅ និងសង្កាត់បយ៉ាខា ក្រុងប៉ៃលិន ខេត្តប៉ៃលិន។

ប្រភពពីអាជ្ញាធរបានឲ្យដឹងថា អាជ្ញាធរបានរកឃើញថា និងចុះផ្អាកទីតាំងស្តង់ពោត និងដំឡូងមីចំនួន៩ ដែលមានភាពមិនប្រក្រតីនៃជញ្ជីងថ្លឹងកសិផល ក្នុងនោះនៅសង្កាត់ប៉ៃលិន មានចំនួន ៥ស្តង់ នៅសង្កាត់អូរតាវ៉ៅ មានចំនួន ៣ស្តង់ និងនៅសង្កាត់បយ៉ាខា មានចំនួន ១ស្តង់។

នៅថ្ងៃទី២៤ ខែវិច្ឆិកា អាជ្ញាធរបានចុះរៀបចំបច្ចេកទេសជញ្ជីងថ្លឹងតាមសៃឡូឡើងវិញ ដើម្បីធានាភាពសុក្រឹតសម្រាប់ទទួលទិញកសិផលរបស់ប្រជាពលរដ្ឋ។

ជាមួយគ្នានោះអាជ្ញាធរខេត្ត បានណែនាំឱ្យម្ចាស់ស្តង់នីមួយៗ ផ្អាកដំណើរការមួយរយ:ពេលសិន រង់ចាំរហូតដល់ក្រសួងចុះទៅពិនិត្យមើលជញ្ជីង និងរៀបចំកែតម្រូវឱ្យមានសុក្រិតភាពឡើងវិញ ទើបអនុញ្ញាតឱ្យដំណើរការតាមធម្មតាឡើងវិញ៕