អនុប្រធាននាយកដ្ឋាននីតិកម្មនៃក្រសួងសុខាភិបាល លោកស្រី Tran Thi Trangបាននិយាយថា ច្បាប់ស្តីពីការទប់ស្កាត់ថ្នាំជក់បច្ចុប្បន្ន មិនមានអំណាចសម្រាប់ដោះស្រាយជាមួយបារីអេឡិចត្រូនិច និងផលិតផលថ្នាំជក់ នោះទេ ដូច្នេះក្រសួងសុខាភិបាលរបស់ប្រទេសវៀតណាម បានស្នើឱ្យមានការហាមឃាត់ផលិតផលថ្នាំជក់ជំនាន់ថ្មី ដោយលើកឡើងពីផលប៉ះពាល់អវិជ្ជមានដែលពួកគេអាចមានលើយុវជន ក៏ដូចជាការចំណាយលើការគ្រប់គ្រងបន្ថែមទៀត។
ដោយឡែក លោកស្រី Nguyen Thi Thu Huong មកពីក្រសួងសុខាភិបាលបាននិយាយថា ភាគរយនៃប្រជាជនប្រើប្រាស់បារីអេឡិចត្រូនិចក្នុងឆ្នាំ ២០២០ បានកើនឡើង ១៨ដង ធៀបនឹងឆ្នាំ ២០១៥ (ពី ០.២% ទៅ ៣.៦%)។ លោកស្រីបានបន្ថែមថា ជារៀងរាល់ឆ្នាំ មនុស្សប្រហែល ៤០,០០០ នាក់ បានស្លាប់ដោយសារមូលហេតុទាក់ទងនឹងថ្នាំជក់នៅក្នុងប្រទេសវៀតណាម។
លោកស្រីបានសង្កត់ធ្ងន់ថាការអនុញ្ញាតឱ្យចែកចាយផលិតផលទាំងនេះនៅលើមូលដ្ឋានសាកល្បង បានបង្ហាញឱ្យឃើញពីផលប៉ះពាល់អវិជ្ជមានដែលអាចកើតមាន រួមទាំងការចំណាយលើការគ្រប់គ្រង ដែលមានន័យថា រដ្ឋត្រូវចំណាយធនធានមនុស្ស និងការគ្រប់គ្រង ដើម្បីដោះស្រាយបញ្ហាសង្គមដែលកើតចេញពីការប្រើប្រាស់ និងការរំលោភបំពានផលិតផលថ្នាំជក់ថ្មី ជាពិសេសផលប៉ះពាល់របស់វា លើអាកប្បកិរិយា និងរបៀបរស់នៅរបស់យុវជន៕
ប្រភព៖ VN Express