ភ្នំពេញ៖ លោក វ៉ី ហ្វុងហឺ (Wei Fenghe) រដ្ឋមន្ត្រីការពារជាតិនៃ សាធារណរដ្ឋប្រជាមានិតចិន បានថ្លែងបញ្ជាក់ប្រាប់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ថាចិន នឹងបន្តជួយដល់កម្ពុជាថែមទៀត ។
នាថ្ងៃទី២០ ខែវិច្ឆិកា សម្ដេចតេជោ ហ៊ុន សែន បានទទួលជួបពិភាក្សាការងារជាមួយលោក វ៉ី ហ្វុងហឺ ខណៈ លោកមកចូលរួម កិច្ចប្រជុំ រដ្ឋមន្ត្រីការពារជាតិ អាស៊ាន និងកិច្ចប្រជុំរដ្ឋមន្ត្រីការពារជាតិបូក ដែលនឹងប្រព្រឹត្តិទៅនៅខេត្តសៀមរាប នាថ្ងៃទី២៣ វិច្ឆិកា ខាងមុខ។
លោក អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន បានឱ្យដឹងថា នៅក្នុងជំនួបនេះ ឯកឧត្ដម វ៉ី ហ្វុងហឺ បានគោរពវាយតម្លៃខ្ពស់ និងសម្ដែង នូវការ អបអរសាទរជូនសម្ដេចតេជោ ចំពោះការអភិវឌ្ឍន៍យ៉ាងឆាប់រហ័សរបស់កម្ពុជាជាមួយ នឹងការដឹកនាំកិច្ចប្រជុំកំពូល អាស៊ាន និងកិច្ចប្រជុំកំពូល ពាក់ព័ន្ធទទួលបានលទ្ធផលយ៉ាងជោគជ័យ។
លោក វ៉ី ហ្វូងហឺ ក៏បានសម្ដែងនូវការរីករាយចំពោះទំនាក់ទំនងរវាងប្រទេសទាំងពីរ ជាពិសេសរវាងកងទ័ព និងកងទ័ព ដែលកំពុងមាន ទំនាក់ទំនងល្អ និងកិច្ចសហប្រតិបត្តិការល្អប្រកបដោយផ្លែផ្កា។ ឆ្លៀតក្នុងឱកាសនោះដែរ លោកក៏បានជម្រាប ជូនសម្ដេចតេជោ ថា ចិន នឹងបន្តជួយដល់កម្ពុជាថែមទៀត។
ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូនចំពោះលោកវ៉ី ហ្វុងហឺ ដែលបានមកចូលរួម កិច្ចប្រជុំរដ្ឋមន្ត្រីការពារជាតិ អាស៊ានបូកដោយផ្ទាល់ ហើយក៏បានថ្លែងអំណរគុណជូនលោកផងដែរ ចំពោះការវាយតម្លៃអំពី ការរីកចម្រើនរបស់ កម្ពុជា និងការដឹកនាំកិច្ចប្រជុំកំពូលអាស៊ាននិងកិច្ចប្រជុំកំពូលពាក់ព័ន្ធកន្លងទៅ រួមជាមួយនឹងការថ្លែងអំណរគុណដល់ ជំនួយរបស់មិត្តចិន ដែល បានចូលរួមចំណែកក្នុងការអភិវឌ្ឍន៍ទាំងធនធានមនុស្ស និងការអភិវឌ្ឍន៍របស់កម្ពុជា៕