នៅក្នុងប្រវត្តិសាស្ត្រប្រចាំតំបន់អាសុីអាគ្នេយ៍យើងនេះ មានតែប្រទេសថៃតែមួយគត់ដែលមិនធ្លាប់ស្ថិតក្រោមអាណានិគម ក្រៅពីនោះ សុទ្ធតែធ្លាក់ក្រោមការត្រួតត្រារបស់មហាអំណាចអឺរ៉ុប និងជប៉ុន។
កត្តាដែលធ្វើឱ្យសៀមគេចផុតពីអណានិគមនោះ ក៏ព្រោះតែភាពវៃឆ្លាតរបស់ សម្ដេចជូឡាឡុងកន ដែលដឹងថាអឺរ៉ុបនឹងមកពង្រីកឥទ្ធិពលនៅអាស៊ាន ដូច្នេះទ្រង់ក៏បានប្តូររបបនយោបាយទៅតាមបែបនយោបាយអឺរ៉ុបវិញ។
ម្យ៉ាងវិញទីតាំងភូមិសាស្ត្ររបស់សៀម មានភាពអំណោយផល ដោយនៅចន្លោះតំបន់ត្រួតត្រាអាណានិគមអង់គ្លេសនៃឧបទ្វីបម៉ាឡេ និងអាណានិគមបារាំងនៃឥណ្ឌូចិន ដែលគ្រានោះប្រទេសទាំងពីរ បានចុះកិច្ចព្រមព្រៀងមួយ ដើម្បីបែងចែកដែនឥទ្ធិពលគ្នា ទាក់ទងនឹងនគរសៀម។
យោងតាមកិច្ចព្រមព្រៀង ចុះឆ្នាំ១៨៩៦ បារាំងបានព្រមព្រៀងជាមួយអង់គ្លេសថានឹងទុកឱ្យនគរសៀមនៅជាប្រទេសឯករាជ្យ ដើម្បីទុកប្រទេសសៀមធ្វើជារបាំងរវាងដែនដីអាណានិគមអង់គ្លេស (ភូមា និងម៉ាឡេស៊ី) និងដែនដីអាណានិគមបារាំង (សហភាពឥណ្ឌូចិន)។
ក៏ប៉ុន្តែក្នុងកិច្ចព្រមព្រៀងបារាំង-អង់គ្លេស ឆ្នាំ១៨៩៦នេះ អង់គ្លេសបានកាត់យកខេត្តមួយចំនួន នៅប៉ែកពាយ័ព្យនគរសៀម ប្រគល់ទៅឱ្យភូមាវិញ ហើយខេត្តប៉ែកខាងត្បូងនគរសៀម ក៏ត្រូវបានកាត់យកទៅដាក់បញ្ចូលទៅក្នុងដែនដីម៉ាឡេស៊ីផងដែរ៕