សុខភាពរាងកាយ គឺពិតជាសំខាន់ខ្លាំងណាស់ចំពោះមនុស្សគ្រប់គ្នា ។ ដោយការទួលទានអាហារដែលល្អ និងមានគុណប្រយោជន៍ច្រើន ក៏បានរួមចំណែកយ៉ាងសំខាន់ក្នុងការជួយឲ្យសុខភាពរាងកាយទទួលបានភាពពេញលេញនិងរឹងមាំផងដែរ ។
ខាងក្រោមនេះ គឺជាបន្លែដែលសម្បូរទៅដោយសារធាតុចិញ្ចឹមល្អសម្រាប់សុខភាព ប៉ុន្តែមនុស្សជាច្រើនតែងតែមើលរំលង ៖
- មើមឆៃថាវ
មើមឆៃថាវ ត្រូវបានគេប្រដូចទៅនឹងយិនស៊ិននារដូវរងាដែលមានសារធាតុចិញ្ចឹមជាច្រើនសម្រាប់សុខភាព។ ជាពិសេស វាក៏ជួយជម្រះកំដៅ បន្សាបជាតិពុល និងជួយឲ្យត្រជាក់ថ្លើមថែមទៀតផង ។ ដូច្នេះវាល្អខ្លាំងណាស់សម្រាប់អ្នកដែលមានឈាមក្តៅ និងចំពោះអ្នកដែលឧស្សាហ៍ឡើងកម្តៅ និងកើតមុន។
- ដើមខ្ទឹម
ស្លឹកខ្ទឹម មិនត្រឹមតែត្រូវបានគេប្រើប្រាស់ក្នុងអាហារជាច្រើនមុខដើម្បីបន្ថែមនូវរសជាតិ និងក្លិនឈ្ងុយប៉ុណ្ណោះទេ ប៉ុន្តែវាក៏ថែមទាំងជារុក្ខជាតិឱសថព្យាបាលជំងឺជាច្រើនមុខទៀតផង។ ដោយដើមខ្ទឹម ត្រូវបានគេដឹងថាវាជាបន្លែមួយប្រភេទដែលមានសមត្ថភាពខ្ពស់ជំនួយទៅដល់ក្រលៀន ជួយបំប៉ន និងជំរុញការរំលាយអាហារ។ បន្ថែមពីនេះវាក៏មានផ្ទុកនូវវីតាមីន និងជាតិសរសៃឆៅជាច្រើន ដែលមានប្រសិទ្ធភាពក្នុងការព្យាបាលការទល់លាមក និងការពារមហារីកពោះវៀនធំផងដែរ ។
ទន្ទឹមនឹងនោះ ដើមខ្ទឹមក៏មានឥទ្ធិពលក្នុងការរំលាយកំណកឈាម លើកកម្ពស់ឈាមរត់ និងបន្សាបជាតិពុល។ ដោយជាទូទៅវាត្រូវបានគេប្រើសម្រាប់ព្យាបាលការឈឺទ្រូង រួមទាំងជួយធ្វើឱ្យថ្លើម ក្រលៀនមានសុខភាពល្អឡើងវិញ ។
- ផ្សិតខ្មៅ
ផ្សិតខ្មៅ ត្រូវបានគេប្រដូចទៅនឹង “ស្តេចផ្សិត” ព្រោះវាអាចបរិភោគបាន ព្រមទាំងអាចប្រើប្រាស់ជាឱសថក្នុងការព្យាបាលជំងឺថែមទៀតផង។ មិនតែប៉ុណ្ណោះ វាក៏ត្រូវបានគេប្រើជាញឹកញាប់ដើម្បីព្យាបាលខ្យល់ ឈឺក្បាល វិលមុខ និងជំងឺក្រពះជាដើម នេះក៏ព្រោះតែផ្សិតខ្មៅមានផ្ទុកនូវសារធាតុចិញ្ចឹមជាច្រើនសម្រាប់រាងកាយ រួមទាំងជួយពង្រឹងប្រព័ន្ធភាពស៊ាំ កាត់បន្ថយដុំសាច់ និងការពារជំងឺមួយចំនួនទៀតផងដែរ ។