ប្រជាពលរដ្ឋខ្មែរ ពិតជាធ្លាប់ឃើញ និងបានចាយក្រដាសប្រាក់៥មុឺនរៀលខ្មែរយើងហើយ ក៏ប៉ុន្តែបងប្អូនមានដែលចាប់អារម្មណ៍លើរូបដំរី ដែលមាននៅក្នុងក្រដាសប្រាក់នោះដែរឬអត់ តើថាស្ថិតនៅក្នុងប្រាសាទអ្វី?
ចម្លាក់រូបដំរី ដែលស្ថិតនៅក្នុងក្រដាស់៥មុឺនរៀល ជារូបចម្លាក់នៃប្រាសាទមួយក្នុងរាជធានីបុរាណកោះកេរ្តិ៍។ ប្រាសាទនោះមានឈ្មោះថាប្រាសាទដំរី ជាបុរាណដ្ឋានមួយក្នុងចំណោមរាប់រយក្នុងបរិវេណតំបន់រាជធានីបុរាណកោះកេរ្តិ៍។
រូបចម្លាក់ដំរី ដែលនៅព័ទ្ធជុំវិញប្រាសាទត្រូវបានបែកបាក់ និងធ្លាក់មកខាងក្រោមជាដើម គឺមានតែរូបចម្លាក់មួយប៉ុណ្ណោះដែលបានរក្សារូបរាងល្អជាងគេ ហើយក៏ត្រូវបានយកប្រើនៅលើក្រដាសប្រាក់ ៥០០០០រៀល តែម្ដង។
គួរបញ្ជាក់ផងដែរថា ប្រាសាទនៅតំបន់កោះកេរ្តិ៍ភាគច្រើនត្រូវបានកសាងឡើងក្នុងរជ្ជកាលព្រះបាទជ័យវរ្ម័នទី៤ ក្នុងសតវត្សទី១០ (៩២៨-៩៤២)។ ក្នុងរាជ្យព្រះបាទជ័យវរ្ម័នទី៤ ទ្រង់បានផ្លាស់ប្ដូររាជធានីពីយសោធបុរៈ(អង្គរ) ទៅតំបន់កោះកេរ្តិ៍ ហើយបច្ចុប្បន្នកម្ពុជាកំពុងស្នើបញ្ចូលជាបេតិកភណ្ឌពិភពលោក៕