មនុស្សជាច្រើនបានធ្វើការជ្រើសរើសនូវវិធីសាស្រ្ដក្នុងការផ្លាស់រាងកាយរបស់ខ្លួន ដោយការតមអាហារ និងប្រើប្រាស់នូវអាហារបំប៉ន ក៏ដូចជាប្រើប្រាស់ថ្នាំមួយចំនួនដើម្បីទទួលបានរាងស្អាតផងដែរ។ តែយ៉ាងណាមិញ ពួកគេមិនបានដឹងទេថា អាហារធម្មជាតិដែលយើងបរិភោគជាប្រចាំថ្ងៃមួយចំនួន ក៏មានគុណសម្បត្តិក្នុងការជួយឲ្យអ្នកទទួលបានរាងស្អាតផងដែរ ជាពិសេសសម្រាប់អ្នកសម្រកគីឡូ ដោយពួកគេតែងតែមើលរំលង។
ខាងក្រោមនេះគឺជាអាហារពណ៌ត្នោតមួយចំនួន ដែលជួយឲ្យអ្នកស្រកទម្ងន់បានយ៉ាងមានប្រសិទ្ធភាព ៖
- អង្ករសំរូប
អង្ករសំរូបជារឿយៗត្រូវបានគេឃើញលេចឡើងនៅក្នុងម៉ឺនុយរបបអាហារអ្នកហាត់ប្រាណ។ ដោយយោងទៅតាមការស្រាវជ្រាវបានបង្ហាញថា អង្ករសំរូបមានលក្ខណៈសម្បត្តិប្រឆាំងនឹងជំងឺទឹកនោមផ្អែម ប្រឆាំងកូឡេស្តេរ៉ុល ប្រឆាំងអុកស៊ីតកម្ម និងមានលក្ខណៈសម្បត្តិការពារបេះដូង។
ជាមួយគ្នានេះបើយោងទៅតាមលោក Amy Richter ជាអ្នកឯកទេសអាហារូបត្ថម្ភបានបញ្ចប់ការសិក្សាពីសាកលវិទ្យាល័យ Missouri State (សហរដ្ឋអាមេរិក)មានប្រសាសន៍ឲ្យដឹងថា ៖ អង្ករសំរូប គឺដូចជាគ្រាប់ធញ្ញជាតិទាំងមូល ដែលមានជាតិសរសៃច្រើន ល្អសម្រាប់សុខភាព ហើយមានកាឡូរីតិចចំពោះរាងកាយ ។ លើសពីនេះវាក៏ជាអង្ករមួយប្រភេទដែលមានជីវជាតិច្រើនជាងអង្ករស ហើយជាតិស្ករត្នោតក្នុងអង្ករសំរូបក៏មិនធ្វើឱ្យឡើងទម្ងន់ដូចអង្ករសផងដែរ ដូច្នេះអ្នកអាចញ៉ាំវាបានដោយមិនខ្លាចធាត់នោះឡើយ ។
- គ្រាប់អាល់ម៉ុន
គ្រាប់អាល់ម៉ុន គឺជាគ្រាប់ធញ្ញជាតិមួយប្រភេទ ដែលមានជាតិកាបូអ៊ីដ្រាតទាប សម្បូរទៅដោយប្រូតេអ៊ីន និងជាតិសរសៃ ដូច្នេះហើយពួកវាគឺស័ក្តិសមបំផុតសម្រាប់អ្នកតមអាហារ។ ដោយការទទួលទានគ្រាប់អាល់ម៉ុនជាប្រចាំ មិនត្រឹមតែជួយបង្កើនការឆ្អែតបានយូរប៉ុណ្ណោះទេ ប៉ុន្តែវាក៏ជួយទប់ស្កាត់ការឃ្លានអាហារ និងជួយឲ្យស្រកទម្ងន់បានយ៉ាងឆាប់រហ័សថែមទៀតផង។
យ៉ាងណាមិញបើយោងទៅតាមការស្រាវជ្រាវបានបង្ហាញថា ការទទួលទានគ្រាប់អាល់ម៉ុង ៤៣ ក្រាមជារៀងរាល់ថ្ងៃវានឹងជួយកាត់បន្ថយការឃ្លានបានច្រើន។ លើសពីនេះ គ្រាប់អាល់ម៉ុនក៏មានផ្ទុកសារធាតុចិញ្ចឹមជាច្រើនដែលពិបាករំលាយ ដែលធ្វើឲ្យរាងកាយបង្កើនការរំលាយអាហារដើម្បីដំណើរការ ជួយដុតបំផ្លាញជាតិខ្លាញ់លើសឲ្យដំណើរការទៅដោយរលូនជាងមុន និងជួយឱ្យអ្នកទទួលបានរាងស្គមយ៉ាងឆាប់រហ័សផងដែរ។ ហើយអ្វីដែលកាន់តែពិសេសជាងនេះទៅទៀតនោះគឺ វីតាមីន E ដែលមានក្នុងគ្រាប់អាល់ម៉ុនក៏ជួយស្បែកស្ត្រីតឹងណែន និងភ្លឺរលោងជាងមុនផងដែរ ។
