ជាធម្មតាតាមវេជ្ជសាស្រ្ដ បានបង្ហាញប្រាប់ឲ្យដឹងថា ជាទូទៅរាងកាយរបស់មនុស្សពេញវ័យត្រូវការការសម្រាកគ្រប់គ្រាន់គឺចន្លោះពី 7-8 ម៉ោងក្នុងមួយថ្ងៃ។ ដោយឡែកចំពោះ ទារក និងកុមារទើបចេះដើរតេះតះត្រូវការការគេងចន្លោះពី 12 ទៅ 18 ម៉ោងក្នុងមួយថ្ងៃ។ សម្រាប់ក្មេងដែលមានអាយុចាប់ពី2ខួបឡើងទៅ ត្រូវការគេងចន្លោះពី 11 ទៅ 14 ម៉ោង។ កុមារអាយុចាប់ពី 14 ទៅ 17 ឆ្នាំត្រូវការការគេងចន្លោះពី 8 ទៅ 10 ម៉ោង។
ដោយឡែក បើយោងទៅតាមការសិក្សាឆ្នាំ 2018 ដែលត្រូវបានចេញផ្សាយនៅក្នុងទិនានុប្បវត្តិ Nature and Science of Sleep បានរកឃើញថា មិនមានព័ត៌មានច្បាស់លាស់ណាមួយដែលកំណត់អំពីរយៈពេលគេងច្រើន ឬតិច ល្អចំពោះសុខភាពរាងកាយនោះទេ តែផ្ទុយទៅវិញគឺវាអាស្រ័យលើអារម្មណ៍របស់មនុស្សទៅវិញទេ ។
យ៉ាងណាមិញ បើយោងទៅតាម វេជ្ជបណ្ឌិត J. Rodriguez មកពីមជ្ឈមណ្ឌល Sleep នៅ NYU Langone Health ក្នុងទីក្រុងញូវយ៉ក (សហរដ្ឋអាមេរិក) បាននិយាយថា៖ មនុស្សដែលមានទំនោរចង់គេងច្រើនជាងធម្មតា អាចមានស្ថានភាពសុខភាពមិនល្អប៉ុន្មាននោះទេ។ ដោយលោកវេជ្ជបណ្ឌិត Rodriguez បាននិយាយថា ផ្ទុយទៅវិញ ចំពោះមនុស្សដែលមានសុខភាពល្អ ភាគច្រើនត្រូវការការគេងត្រឹមតែ 5 ឬ 6 ម៉ោងប៉ុណ្ណោះក្នុងមួយថ្ងៃ ។
លើសពីនេះទៅទៀត ចំពោះមនុស្សដែលមាន IQ ខ្ពស់ គឺត្រូវបានគេរកឃើញថា ពួកគេមានវេលាក្នុងការគេងតិចតួចបំផុត ប៉ុន្តែភាគច្រើនពួកគេមានសុខភាពល្អ ហើយខួរក្បាលនៅតែដំណើរការបានល្អ។ ប៉ុន្តែក្នុងន័យនេះ មិនមែនមានន័យថា អ្នកត្រូវបង្ខំខ្លួនឯងឱ្យគេងតិចនោះទេ ព្រោះថាការគេងមិនបានគ្រប់គ្រាន់ វានឹងធ្វើឲ្យមានការកាត់បន្ថយផលិតភាព សមត្ថភាពខួរក្បាលរបស់អ្នក ព្រមទាំងបណ្ដាលឲ្យសុខភាពចុះខ្សោយថែមទៀតផង ។
មិនតែប៉ុណ្ណោះប្រសិនបើអ្នកធ្វើសកម្មភាពទាំងអស់នេះក្នុងរយៈពេលយូរ វាក៏អាចបំផ្លាញបេះដូងរបស់អ្នក ប៉ះពាល់យ៉ាងធ្ងន់ធ្ងរដល់ការរំលាយអាហារ និងទម្ងន់របស់អ្នក ធ្វើឱ្យស្បែករបស់អ្នកកាន់តែអាក្រក់ និងធ្វើឱ្យប្រព័ន្ធភាពស៊ាំរបស់អ្នកចុះខ្សោយជាដើម ។