មេរោគ RSV ឬឈ្មោះពេញហៅថា Respiratory Syncytial Virus ត្រូវបានគេដឹងថាគឺជាមេរោគមួយប្រភេទដែលឆ្លងតាមរយៈភ្នាក់ងារបង្កជំងឺក្នុងផ្លូវដង្ហើម។ ជាពិសេសចំពោះកុមារតូចៗ មេរោគនេះអាចបង្កឲ្យកើតមាននូវជំងឺរលាកសួតបានយ៉ាងងាយ ។
ចំពោះដំណើរការសម្រាប់ការព្យាបាលលើកុមារតូចៗ ជាពិសេសគឺចំពោះទារកកើតមិនគ្រប់ខែ កុមារដែលមានជំងឺសួត ជំងឺបេះដូង ឬជំងឺហឺតស្រាប់ ។ នៅពេលដែលឆ្លងមេរោគនេះ រោគសញ្ញាត្រូវបានគេកត់សម្គាល់ឃើញថា ពួកគេនឹងជួបប្រទះជាមួយហានិភ័យខ្ពស់ជាងកុមារដែលមានសុខភាពធម្មតា ដែលអាចនឹងបណ្ដាលឲ្យឈប់ដកដង្ហើម ឬខ្សោយផ្លូវដង្ហើម ដែលត្រូវបញ្ជូនទៅកាន់បន្ទប់ ICU ហើយត្រូវភ្ជាប់ជាមួយម៉ាស៊ីនអុកស៊ីសែន រហូតដល់អាការៈបានធូរស្បើយចន្លោះប្រហែលពី ៥-៧ ថ្ងៃ។
ដោយឡែកចំពោះថ្នាំព្យាបាលនៃជំងឺនេះ គឺមិនទាន់ត្រូវបានអ្នកជំនាញសិក្សាស្រាវជ្រាវរកឃើញថ្នាំជាក់លាក់ណាមួយដែលអាចព្យាបាលជម្ងឺនេះបានឡើយ។ ប៉ុន្តែជាទូទៅវេជ្ជបណ្ឌិតភាគច្រើន បានធ្វើការព្យាបាលរោគសញ្ញានៃជំងឺនេះតាមអាការៈជាក់ស្ដែងរបស់អ្នកជម្ងឺ ដើម្បីថែរក្សាការដកដង្ហើម និងបន្ទោរបង់ ។ ដោយវេជ្ជបណ្ឌិតនឹងចេញវេជ្ជបញ្ជាថ្នាំក្អក expectorant , ថ្នាំ bronchodilator ឬថ្នាំបន្ថយគ្រុនក្តៅ ទៅតាមរោគសញ្ញារបស់អ្នកជំងឺម្នាក់ៗដើម្បីជួយកែប្រែស្ថានភាពអ្នកជំងឺឲ្យមានភាពប្រសើរឡើង ។
តែយ៉ាងណាមិញក្នុងករណីដែលអ្នកជំងឺមានបញ្ហាក្នុងការពិបាកដកដង្ហើម នឿយហត់អស់កម្លាំង ឬចាប់ផ្តើមមានកម្រិតអុកស៊ីសែនទាបក្នុងឈាម នោះការព្យាបាលរបស់វេជ្ជបណ្ឌិតនឹងស្ថិតក្នុងទម្រង់នៃការប្រើប្រាស់ឧបករណ៍ជំនួយ ដូចជាការប្រើប្រាស់ថ្នាំ nebulizers ឬការបញ្ចូលជាតិទឹកតាមសរសៃ ការបឺតស្លេស និងការបញ្ចូលអុកស៊ីហ្សែនក្នុងករណីដែលអ្នកជំងឺធ្ងន់ធ្ងរខ្លាំង ព្រមទាំងទាមទារឲ្យពួកគេត្រូវស្នាក់នៅក្នុងបន្ទប់ ICU ដើម្បីពិនិត្យមើលរោគសញ្ញារបស់ពួកគេរហូតដល់ពួកគេធូរស្រាលផងដែរ ។ប៉ុន្តែក្នុងពេលជាមួយគ្នានេះ អ្នកជំងឺRSVដែលមានអាការៈធ្ងន់ធ្ងរ ក៏អាចវិវត្តទៅជាការកើតមាននូវផលវិបាកពីមេរោគផ្សេងៗ ដូចជា mycoplasma គ្រុនផ្តាសាយ ឬបាក់តេរីផ្សេងៗទៀតផងដែរ ។
ជាមួយគ្នានេះ លោកអ្នកក៏អាចធ្វើការការពារពីជំងឺRSVនេះបានតាមរយៈការលាងដៃរបស់អ្នក និងសម្អាតដៃរបស់អ្មកមុនពេលចូលទៅជិត ប៉ះ ឬកាន់កូនតូចរបស់អ្នក ឬថើបថ្ពាល់ជាដើម ។ មិនថាកូនរបស់អ្នក ឬកូនរបស់អ្នកដទៃទេ ព្រោះភាគច្រើនជាមនុស្សពេញវ័យច្រើនតែមិនឆ្លងជំងឺនេះទេ ប៉ុន្តែវាអាចបង្កឲ្យមានផលប៉ះពាល់មេរោគដោយចៃដន្យពីកន្លែងណាមួយ ហើយមិនបានលាងដៃ នោះវាអាចធ្វើឲ្យកុមារឆ្លងមេរោគពីយើងបានទោះបីជាយើងមានសុខភាពល្អក៏ដោយ។
