ភ្នំពេញ៖ វីដេអូចំនួន០២ឃ្លីប ត្រូវបានសិស្សលាសាថតបង្ហោះចែកចាយលើបណ្តាញសង្គម បង្ហាញអោយឃើញ លោក ម៉ម សុធានី ជានាយកវិទ្យាល័យហ៊ុនសែន សេរីភាព ក្រុងតាខ្មៅ ខេត្តកណ្តាល វាយសិស្សស្រីម្នាក់។
ក្រោយពីមានព័ត៌មានចុះផ្សាយវីដេអូលើបណ្ដាញសង្គម នៅរសៀលថ្ងៃទី១៤ ខែកញ្ញា ឆ្នាំ២០២២នេះ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានអោយដឹងថា ករណីមានបាតុភាពនៅតាមគ្រឹះស្ថានសិក្សា ចាំបាច់យើងត្រូវបើកការស្រាវជ្រាវជាមុនសិន មុនចាត់វិធានការរដ្ឋបាល ហើយក្រសួងក៏កំពុងពិនិត្យមើលករណីនេះហើយ ។
ជាមួយគ្នានេះ ក៏មានមតិខ្លះលើកឡើងថា «ក្នុងនាមខ្ញុំជាប្រជាពលរដ្ឋមិនពេញចិត្តនិងទង្វើររបស់លោកនាយកនេះឡើយ ខុសត្រូវណែនាំ មិនត្រូវប្រើហិង្សាទេ ក្នុងនាមយើងជាអ្នកអប់រំ ម្យ៉ាងសិស្សជាស្រីទៀត សូមបងប្អូន និងមិត្តភក្ត្រទាំងអស់ជួយស៊ែរ អោយលោកនាយកបានល្បីផង» ។
យ៉ាងណាមិញនាព្រឹកនេះមានអ្នកម្ដាយសិស្សម្នាក់បានបញ្ចេញសារមួយយ៉ាងអន្លាយដោយបានផ្តល់សុភនិច្ឆ័យជូនលោកគ្រូនាយក ខណៈសារនោះបានរៀបរាប់យ៉ាងដូច្នេះថា៖ «ព្រឹកម៉ិញពេលដែលខ្ញុំជាម្ដាយយកអាវថ្មីទៅអោយកូនផ្លាស់…មានអារម្មណ៍ថារំជួលចិត្តទប់ទឹកភ្នែកមិនជាប់ព្រោះថាអាវសស្អាតដែលម្ដាយទិញអោយកូនពាក់រៀនបែរជាមានរូបភាពប្រលាក់ស្រមកបែបនេះ!។
ក្នុងនាមខ្ញុំជាម្ដាយរបស់សិស្សដែលនៅក្នុងហេតុការណ៍នោះខ្ញុំសុំលើកដៃសំពះសុំទោសលោកគ្រូនាយកដែលខំយកចិត្តទុកដាក់អប់រំវិន័យ..សីលធម៌ដល់កូននាងខ្ញុំនិងកូនសិស្សទូទៅជាច្រើនឆ្នាំកន្លងមក!…លោកគ្រូហត់នឿយខ្លាំងណាស់…តាមដែលនាងខ្ញុំតែងតែទៅសាលាសេរីភាពដើម្បីមើលកូនក៏សំគាល់ឃើញថាលោកគ្រូគ្រប់គ្រងសិស្សរាប់ពាន់នាក់ក្នុង១ឆ្នាំៗមានវិន័យល្អ…ប៉ុន្ដែមានសិស្សរឹងត្អឹងមិនគោរពវិន័យប្រហែលតិចតួចទេដោយសារឪពុកម្ដាយខ្លះគាត់រវល់ការងារខាងក្រៅមិនសូវបានពិនិត្យនឹងណែនាំកូនបន្ថែម!ហើយតិចតួចទៀតនោះគឺស្រលាញ់នឹងជឿជាក់ខ្លាំងភ្លេចបានមើលកំហុសរបស់កូន!….ហើយ១ទៀតនោះគឺក្មេងខុសតាមគ្នា….គាត់រៀនថ្នាក់ទី១២ហើយគាត់គិតថាជីវិតគាត់ឯករាជ្យតែគាត់អត់បានគិតពីអនាគតគាត់ឡើយ…គឺគាត់សប្បាយតាមគ្នា!…។
លោកគ្រូខ្ញុំសោកស្ដាយណាស់បើសិនជាមានការចោទប្រកាន់ធ្ងន់ធ្ងរ….ព្រោះខ្ញុំគិតថាអយុត្តិសំរាប់ការលះបង់របស់លោកគ្រូខ្លាំងណាស់!… ខ្ញុំសូមអរគុណដល់ក្រសួង.មន្ទីរ.និងសារពត៌មានដែលបានអានខមិននាងខ្ញុំ….សង្ឃឹមថាលោកមិនបោះបង់ធនធានមនុស្សដ៏មានតំលៃនេះផងចុះ!….អរគុណ» ៕