ថ្នាំប៉ារ៉ាសេតាមុល គឺជាថ្នាំដែលត្រូវបានគេស្គាល់ជាទូទៅ និងតែងតែមានប្រចាំនៅក្នុងផ្ទះគ្រប់ក្រុមគ្រួសារ។ ហើយវាមានប្រសិទ្ធភាពខ្ពស់នៅក្នុងការជួយបំបាត់អាការៈឈឺចុកចាប់ពីស្រាលទៅមធ្យមដូចជា ឈឺក្បាល ជំងឺផ្តាសាយ ឈឺធ្មេញ និងការឈឺចាប់ពេលមានរដូវ ឈឺសាច់ដុំ ឈឺខ្នង និងឈឺសន្លាក់ឆ្អឹង ជាដើម ។ដោយការលេបថ្នាំនីមួយៗ គួរតែលេបយ៉ាងហោចណាស់ចន្លោះពី 4-6 ម៉ោងខុសពីគ្នា ហើយប្រើតែនៅពេលដែលមានរោគសញ្ញាដូចជាការឈឺចាប់ ឬក្តៅខ្លួនតែប៉ុណ្ណោះ។
ដោយឡែកចំពោះកម្រិតនៃការប្រើប្រាស់ឲ្យបានត្រឹមត្រូវនៃថ្នាំប៉ារ៉ាសេតាម៉ុល ត្រូវបានអ្នកជំនាញណែនាំថា គួរតែលេបទៅតាមទម្ងន់ខ្លួន ដូចខាងក្រោម ៖
+ ចំពោះថ្នាំប៉ារ៉ាសេតាម៉ុលចំណុះ 325 មីលីក្រាម
- ទំងន់ 45-67 គីឡូក្រាម ត្រូវលេបចំនួន 2 គ្រាប់
- ទំងន់ ៣៤-៤៤ គីឡូក្រាម ត្រូវលេប1 គ្រាប់កន្លះ
- ទំងន់ ២២-៣៣ គីឡូក្រាម ត្រូវលេប 1 គ្រាប់
+ ចំពោះប៉ារ៉ាសេតាមុល 500 មីលីក្រាម
- ទម្ងន់ 67 គីឡូក្រាម ឬច្រើនជាងនេះ ត្រូវលេប 2 គ្រាប់
- ទំងន់ 51-67 គីឡូក្រាម ត្រូវលេប 1 គ្រាប់កន្លះ
- ទម្ងន់ 33-50 គីឡូក្រាម ត្រូវលេប 1 គ្រាប់
យ៉ាងណាមិញ បើយោងទៅតាមព័ត៌មានរបស់មន្ទីរពេទ្យជាច្រើនផ្សេងទៀត បានផ្តល់ព័ត៌មានដូចគ្នាថាមនុស្សគ្រប់រូប មិនគួរប្រើថ្នាំប៉ារ៉ាសេតាម៉ុលលើសពី៥ថ្ងៃជាប់គ្នានោះទេ ។ចំពោះមូលហេតុចម្បងដែលត្រូវបានក្រុមគ្រូពេទ្យជំនាញហាមឃាត់នោះគឺ៖
1. ការប្រើប្រាស់ថ្នាំប៉ារ៉ាសេតាម៉ុលក្នុងរយៈពេលយូរអាចបណ្តាលឱ្យមុខងារថ្លើមចុះខ្សោយ
2. ជាធម្មតា ប្រសិនបើប្រើប្រាស់លើសពី 5 ថ្ងៃ រោគសញ្ញានៅតែមិនប្រសើរឡើង វាអាចជាសញ្ញានៃជំងឺផ្សេងទៀត ដូច្នេះអ្នកគួរតែឈប់ប្រើប្រាស់ ហើយស្វែងរកគ្រូពេទ្យដើម្បីធ្វើការពិនិត្យបន្ថែម
3. ថ្នាំប៉ារ៉ាសេតាម៉ុល ទោះបីជាវាជាឱសថដែលអាចប្រើប្រាស់នៅតាមផ្ទះបានធម្មតា ហើយមើលទៅដូចជាថ្នាំដែលគ្មានគ្រោះថ្នាក់អ្វីក៏ពិតមែន ។ តែទោះយ៉ាងណាក៏ដោយ ក៏អ្នកគួរតែមានការប្រើប្រាស់វាឲ្យបានត្រឹមត្រូវ និងតាមវេជ្ជបញ្ជាផងដែរ ។ លើសពីនេះទៅទៀត អ្នកក៏គួរតែអានស្លាកសញ្ញានៃការណែនាំដោយប្រុងប្រយ័ត្នជានិច្ច ឬពិគ្រោះជាមួយវេជ្ជបណ្ឌិតរបស់អ្នកជាមុនសិន ប្រសិនបើអ្នកត្រូវការប្រើប្រាស់វាក្នុងរយៈពេលយូរ។
