ភ្នំពេញ៖ កាលពីថ្ងៃទី១២ ខែសីហា ឆ្នាំ២០២២ ធនាគារ អេស៊ីលីដា បានប្រារព្ធខួប១០ឆ្នាំ ក្នុងភាពជាដៃគូជាមួយធនាគារជប៉ុន SMBC នៅការិយាល័យកណ្តាលរបស់ធនាគារអេស៊ីលីដា។ នេះគឺជាថ្ងៃប្រវត្តិសាស្ត្រដែលធនាគារអេស៊ីលីដា និងធនាគារ ជប៉ុន Sumitomo Mitsui Banking Corporation (SMBC) បានចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការធុរៈកិច្ចព្រមព្រៀងលើផ្នែក សាជីវកម្មអន្តរជាតិ នៅក្នុងការិយាល័យកណ្តាលរបស់ធនាគារ អេស៊ីលីដា នាថ្ងៃទី១២ ខែសីហា ឆ្នាំ២០១២ កន្លងទៅ ក្នុងគោលបំណងជួយ និងគាំទ្រដល់ធនាគារអេស៊ីលីដា ក្នុងការពង្រីកផលិតផល និងសេវាកម្មរបស់ធនាគារដើម្បីឆ្លើយរបទៅនឹងតម្រូវការអតិថិជនអន្តរជាតិ ជាពិសេសគឺតម្រូវការរបស់អតិថិជនសាជីវកម្មជប៉ុន។ អ្វីកាន់តែពិសេស SMBC បានជួយផ្តល់ការគាំទ្រដល់ធនាគារអេស៊ីលីដាជាច្រើនផ្នែកតាំងពីថ្នាក់គ្រប់គ្រង ក្រុមប្រឹក្សាភិបាល និងភាគហ៊ុននិកជាដើមទាំងបច្ចេកទេស និងការបណ្តុះបណ្តាលដោយផ្ទាល់ដល់និយោជិតរបស់ធនាគារអេស៊ីលីដា ការចុះពិនិត្យនិងបណ្តុះបណ្តាលពីសេវាកម្មធនាគារអេឡិចត្រូនិក និងសេវាឌីជីថលជាច្រើនទៀតផង។
លោកបណ្ឌិត អ៊ិន ចាន់នី បានមានប្រសាសន៍ផងដែរថា គោលដៅសហប្រតិបត្តិការរវាងធនាគារ ទាំងពីរគឺដើម្បីពង្រឹងសមត្ថភាពវិជ្ជាជីវៈមន្ត្រីក្រុមប្រឹក្សាភិបាល រហូតដល់ ភាគហ៊ុននិក ដោយយើងបានសហការគ្នាបានល្អណាស់។ លោកបណ្ឌិត អ៊ិន ចាន់នី បានបន្តទៀតថាបន្ទាប់ពីការចុះអនុស្សរណៈជាមួយគ្នារួចហើយ ធនាគារជប៉ុន SMBC បានចូលហ៊ុន និងបានកាន់កាប់ភាគហ៊ុនចំនួន ១២.២៥% នៅឆ្នាំ ២០១៤ និង បង្កើនភាគហ៊ុនរហូតដល់ទៅ១៨.២៥% រហូតមកដល់ពេលបច្ចុប្បន្ននេះ ។ ជាងនេះទៅទៀត« ការជួបជុំគ្នាថ្ងៃនេះ ដើម្បីអបអរសាទរនូវសមិទ្ធផលដែលធនាគារ យើងទាំងពីរបានសហការគ្នាល្អ និងប្តេជ្ញា ពង្រឹងភាពជាដៃគូជាមួយគ្នាបន្ថែមទៀត ដើម្បីបង្កើនយុទ្ធសាស្ត្រថ្មីៗទៅមួយកំរិតទៀត»។
ក្រៅពីនេះ ធនាគារទាំងពីរក៏បានសហការគ្នាលើការងារចំនួន៣ ធំៗគឺ ៖
– ចំណុចទី១ គឺផ្តោតទៅលើកម្ចីត្រូវតែគិតលើបរិស្ថាន មានន័យថា « ការផ្តល់សេវាកម្ម ធនាគារ និងហិរញ្ញវត្ថុ មិនមែន ចេះតែផ្តល់ ដើម្បីទទួលបានផលចំណេញ តែមួយមុខនោះទេ គឺត្រូវតែគិតអំពីបរិស្ថានផងដែរថាមានផលប៉ះពាល់អ្វីខ្លះដល់បរិស្ថាន
– ចំណុចទី២: គឺផ្សារភ្ជាប់ទៅនឹងសង្គម មានន័យថា«ត្រូវពិនិត្យមើលសុខមាលភាព ទាំងអ្នកពាក់ព័ន្ធ សហការី និងអតិថិជន របស់យើងឱ្យចូលរួមជាមួយគ្នា ក្នុងកម្មវិធីសង្គមផ្សេងៗ ដែលធ្លាប់បានធ្វើកន្លងមកឱ្យបានល្អ និងបង្កើនការចូលរួមបន្ថែមទៀតផងដែរ»
– ចំណុចទី៣: គឺការពង្រឹងអភិបាលកិច្ចសាជីវកម្ម ដោយបច្ចុប្បន្ននេះ ទោះបីជាធនាគារទទួលបានចំណាត់ថ្នាក់ល្អហើយក៏ដោយ ក៏ត្រូវគិតគូរបន្តទៀត ដើម្បីឱ្យក្លាយទៅជាក្រុមហ៊ុន ដែលមានអភិបាលកិច្ចខ្នាតអន្តរជាតិ និងជាសាកលថែមទៀតផងដែរ ៕